Yith 6 - JAM DE NHIALIC 2011

Nhialic Acɔl Yithaya bï Aa Tiët

¹ Në ruöön ɣɔn thouwë melik Yudhia, yɛn cï Bɛ̈nydït tïŋ. Aa rɛ̈ɛ̈r në thööc nɔm nhial, ku lupɔde ë luaŋdït thiɔ̈ɔ̈ŋic ëbɛ̈n.

² Ku yenɔm nhial akɛ̈ɛ̈c ë therapim lɔ riauriau cï ye gɛɛu cil, tök në keyiic ade wuök kadhetem. Ee yenyin kum në wuök kaarou, ku kum yecök në wuök kaarou, ku ye päär në wuök kɔ̈kkë kaarou.

³ Aake ye röt cɔɔl an, “Aɣeric Aɣeric, aɣeric! Bɛ̈nydït de rɛm aɣeric! Dhuëëŋde ë piny thiɔ̈ɔ̈ŋ nɔm.”

⁴ Awuɔɔu de kek röt ee këërkëër de Luaŋdït tɔ lɛthë, ku Luaŋdït guöpde acï thiäŋ ke tol.

⁵ Aguɔ lueel an, “Acïn aŋäth tɔ̈u ke yɛn! Amawoou në yɛn! Në luɔi ye wël rac bɛ̈n bei në yethok, ku yɛn rɛ̈ɛ̈r wokë kɔc ee wël rac bɛ̈ɛ̈i bei në kethook. Ku yɛn cï Melik, Bɛ̈nydït de rɛm tïŋ në yanyin.”

⁶ Ëtɛ̈ɛ̈n go therapim tök päär ke bɔ̈ të nu yɛn, ke muk col dɛ̈p cï kuany në kɛ̈ɛ̈p në yïk nɔm.

⁷ Go ya jak thok në col dɛ̈pë ku lueel an, “Kënë yï jak thok, ku ënɔɔnë awänydu acï jäl, ku karɛcku acï ke päl yïn.”

⁸ Ëtɛ̈ɛ̈n acä piŋ ke lueel Bɛ̈nydït an, “Eeŋa duɛ̈ɛ̈r tooc? Eeŋa bï aa tunyda?” Aguɔ bɛ̈ɛ̈r an, “Yɛn bï lɔ! Toc ɛn!”

⁹ Ago lɛ̈k ɛn bä ke lɔ lɛ̈k ee thoŋë an, “Ciɛk aa wek ë pïŋ, kë piɛŋkï acäkï bï yökic. Ciɛk aa wek ë daai, kë loi rɔt acäkï bï ŋic.”

¹⁰ Na wën ke lëk ɛn an, “Tɔ kɔckë ril nïïm, thiök keyïth ku tɔ ke miŋ, agokï cuö be daai në kenyïïn, ku cïkï be piŋ në keyïth, ku cïkï käŋ be yökiic në kepiɔ̈ɔ̈th. Ke ke cïï kepiɔ̈ɔ̈th bï puk aguɔ ke tɔ dem.”

¹¹ Na wën ke lɛ̈k ɛn an, “Agut cï nɛn Bɛ̈nydït, yen bï ee kënë tɔ̈u aya?” Go bɛ̈ɛ̈r an, “Agut të bïï pɛ̈ɛ̈nydït riɔ̈ɔ̈k ku cïn raan dɔ̈ŋ thïn, ku cïn raan rɛ̈ɛ̈r ë ɣööt yiic, ku riääk piny ku päl piny.

¹² Yɛn bï kɔc cuɔp tëmec ku ta piny päl ëbɛ̈n.

¹³ Cakaa raan tök yen ë dɔ̈ŋ ë kɔc kathiëër yiic, yen abïï riɔ̈ɔ̈k aya, abï ciët tim de ɣok cïï ë luc döŋ piny të cïï ë yen yep.” (Kɔc ɣeriic ke Nhialic kek ee luny bï röt bɛ jɔt.)