Yith 59 - JAM DE NHIALIC 2011

Tiët Ajäny Awäny de Kɔc

¹ Du ye tak nɔn cïn ë Bɛ̈nydït riɛl bïï Yen we kony, ku nɔn yen miŋ ka cïï cɔ̈tduön kaar wek kuɔɔny ee piŋ!

² Ee biäk de awɛ̈ɛ̈ckun yen acïï Yen week ee piŋ. Ku aa awɛ̈ɛ̈ckun kek ë pɛ̈ɛ̈k week në Bɛ̈nydït, të them wek luöi bä wek e lam.

³ Wek de gup awɛ̈ɛ̈c ke jam në lueth, ku aköörkuöör, ku nääk.

⁴ Wek ee lɔ në löŋ nɔm, ku acïn yic kääc në biäkdun. Wek ee rɔt kan në jam de lueth bä wek göönydun tiaam. Wek ee kïïtduön guiir bä wek kɔc kɔ̈k yiëk buɔ̈t.

⁵ Kiɛɛr rɛɛcduön yak tak ade awuɔɔk cït awuɔɔk ke toŋ ke kërac. Të cï ë tuɔŋ kuem kërac ee bɛ̈n bei thïn!

⁶ Ku kiɛɛr rɛɛcdun acïn këpiɛth bïï luöi week, acïnkï naamden cït lupɔ ë loi në bɔi de akarkar.

⁷ Wek ee kiɛɛr de riääk looi ë ceŋ, ku acïï ë tiit bä looi, ku ayak dap looi. Wek cie gääu ë näŋ de kɔc cïn gup awɛ̈ɛ̈c. Wek ee dhuur ku riääk nyääŋ të cä wek lɔ thïn ëbɛ̈n,

⁸ ku acïn raan ee piɔ̈u lɔ̈ŋ të rɛ̈ɛ̈r wek ë ke lɔ̈m. Kë yak looi ëbɛ̈n ee ciën yic. Wek ee kueer ŋɔlic kuany yic, ku acïn raan ee tëëk ee kueerë ee poth.

Gëm ë Kɔc Awɛ̈ɛ̈cken

⁹ Yeka yic amec ke wook, ku piathëpiɔ̈u acïï bɔ̈ në woyiic. Ayok ŋɔ̈ɔ̈th an bï ɣɛɛr bɛ̈n ë wolɔ̈m, ku ee mɔ̈ɔ̈th yen nu yetök, ku kɔɔrku ɣɛɛr, ku wok ee cath në cuɔlëpiny yic,

¹⁰ ka wok ee cath ë pääthpääth cï kɔc cï cɔɔr. Wok ee kɔ̈th aköl, abï ciët wakɔ̈u, abuk ciët ka nu paan de thuɔɔu.

¹¹ Wok cï riɔ̈ɔ̈c ku diɛɛrku arëët. Wok kɔɔr Nhialic bïï wo kony në yaaŋic ku awɛ̈ɛ̈cë, ku acïn kë loi rɔt.

¹² “Bɛ̈nydït awɛ̈ɛ̈ckuɔn cuk wäc yïn ajuëckï. Awɛ̈ɛ̈ckuɔ ayek wo gaany. Aŋicku keek apiɛth kedhie.

¹³ Yïn cuk jäi, ku reecku yïn, ku jiɛiku buk yïn kuany cök. Wok cï kɔc kɔ̈k yɔŋ, ku yiɛlku röt wei në yïcök. Ka yok tak ayek awäc, ku wëlkuɔ ayek lueth.

¹⁴ Luɔi de yic acï cuat wei, ku yic acï tɔ mec ke kɔc. Yith ayek kɔm në pëër dïït de wut yic, ku ja piathëpiɔ̈u ciën të be yök ëtɛ̈ɛ̈n.

¹⁵ Acïn yith nu, kɔc cï luɔi de karɛc pɔ̈l ayek yök ke ke ye luöi karɛc.” Bɛ̈nydït acï ee kënë tïŋ, ku acïï piɔ̈u diu në biäk de ciën yic.

Bɛ̈nydït Aguiir Luɔi bï Yen Kɔcke luök

¹⁶ Acï gäi arëët në yen e tïŋ ke cïn raan kony kɔc yɔŋ. Ka yen abï piathëpiɔ̈nde nyuɔɔth bïï yen kɔcke luök.

¹⁷ Yen abï piathëpiɔ̈u cieŋ cï lupɔ de yɔu, ku cieŋ akup de kunydewëi në yenɔm. Abï rɔt kuöm piny në luɔi bï yen käŋ cök piny, ku lui kɔc këtuc, ku guur guöm wään cïï kɔc kɔn kum.

¹⁸ Abï kɔc ke aterde luöi këtuc rɔ̈ŋ ke awɛ̈ɛ̈c cïk looi, aɣet cï kɔc rɛ̈ɛ̈r në piiny mec yiic.

¹⁹ Gɔl në të lɔ aköl amiäk leer të lɔ aköl athɛ̈i, raan ëbɛ̈n abï riɔ̈ɔ̈c në yen ku në riɛldïïtde. Abï bɛ̈n cï kuëër kiir, ku cït yom ril.

²⁰ Aye Bɛ̈nydït lɛ̈k kɔcke an, “Yɛn bï bɛ̈n Jeruthalem bä we bɛ̈n luök, ku kuɔny week wedhie, wek kɔc cï luɔiduön de awɛ̈ɛ̈c pɔ̈l.

²¹ Ku luɔi mät wo week: wek cä gäm riɛldï ku wëëtdï, ke bï ya këdun aɣet athɛɛr, ku gɔl ënɔɔnë ɣeet wadäŋ, wek bï ya riëëu, ku wɛ̈ɛ̈tkï mïthkun ku kuatdun bïk ɛn aa riëëu aköölnyïïn bï ëbɛ̈n.”