Yith 56 - JAM DE NHIALIC 2011

Kɔc ke Nhialic adekï Yiic Juöör Ëbɛ̈n

¹ Aye Bɛ̈nydït lɛ̈k kɔcke an, “Luɔikï ke röŋ ku ye yic, në biäk bïï Yɛn we kony në ee nïn lik bï bɛ̈në, ke piathëpiɔ̈ndï bï rɔt nyuɔɔth.

² Yɛn bï kɔc ee kööl de Thabath döt thieei, ku cïkï ë kuöc looi. Yɛn bï mɛnh ë raan cïï awɛ̈ɛ̈c ë looi thieei.”

³ Alen cï rɔt mät kɔc ke Bɛ̈nydït. Në cïï ee lueel an, “Bɛ̈nydït abï ya pöc bei në kɔcke yiic.” Ku raan cï roc ë cïï be tak an, në biäk cïï yen duëër bɛ dhiëth. Acïï duëër bɛ aa raan töŋ de kɔc ke Nhialic.

⁴ Aye Bɛ̈nydït lɛ̈k rooc an, “Të yak wek ɛn riëëu, në dön aa wek kööl de Thabath döt, ku yak kë bï ya miët piɔ̈u looi, ku yak mändï muk në piɔ̈n adöt,

⁵ ke rinkun abï keek aa tak Luaŋdït, ku në kɔckï yiic ke kaam dït, awär luɔi duëër yïn nɔm dɛ wäthii ku duet. Kɔc acïkï nïïm duëër kɔn në yïn.”

⁶ Ago Bɛ̈nydït lɛ̈k kɔc alɛi wään cï röt mat ë kɔcke Bɛ̈nydït yiic an, kɔc nhiaar en ku yek en luööi, kɔc ee kööl de Thabath döt ku yek mände döt në piɔ̈n adöt:

⁷ an, “Wek bä bɛ̈ɛ̈i Dhiɔn, në kuurdiën ɣeric nɔm, ku gäm yïn miɛtëpiɔ̈u ɣöndiën ë lɔ̈ŋ ku gam miɔ̈cduön ye nyop ëbɛ̈n cï gam në yïïŋdï nɔm. Luaŋdït abï ya cɔl ɣön ë lɔ̈ŋ de kɔc ke juöör ëbɛ̈n.”

⁸ Bɛ̈nydït Awärjäŋ wään cï kɔckɛn ke Yithriɛl lɔ puɔ̈k nïïm ciëën pinyden të wään cïï ë keek peec, acï gutguut lueel nɔn bïï yen ŋoot ke bïï kɔc kɔ̈k bï röt mät keek.

Bäny ke Yithriɛl Agäk Ke

⁹ Bɛ̈nydït acï juöör kɔ̈k yɔ̈ɔ̈k bïk bɛ̈n cï läi roor, ku bïk kɔcke bɛ̈n cuääl.

¹⁰ Aye lueel an, “Bäny kedhie, wën ee kek duëër kɔckï aa jɔ̈ɔ̈ny, acïk cɔɔr! Acïn kë ŋickï. Acïtkï jɔ̈k ë piny tiit, ku cïkï ye biöu, ayek gäk ke ke dhɔt piny ku jɔkï ya nyuöth. Anhiaarkï nin aläl!

¹¹ Acïtkï jɔ̈k dït piɔ̈ɔ̈th cie kuɛth. Kek ee bänykë acïkï käŋ ee yökiic. Raan ëbɛ̈n në keyiic aye ŋɛk kë nhiɛɛr ë piɔ̈nde looi, ku ye ŋɛk këdäŋ kɔɔr ke de kë bï yök thïn.

¹² Aye kɔc ye mɔ̈u wit lueel an, “Takï wo yïn ë mɔ̈n tuc, ku deku kë buk lëu! Ku miäk abï ee köölë wuöör aläl!”