Yith 55 - JAM DE NHIALIC 2011

Nhialic Agɛm Kokdepiɔ̈u

¹ Aye Bɛ̈nydït lueel an, “Bäkkï, wedhie wek kɔc nɛ̈k rou, pïïu kï! Bäkkï, wek kɔc cïn nïïn wëu, ɣackï rap ku cämkï! Bäkkï! Ɣackï mɔ̈u ku ca, acïn kë bïk jɔt tëdun!

² Eeŋö aa wek wëu riɔ̈ɔ̈r në ka cïï week bï kueth? Eeŋö aa wek ariöpdun thöl ku yak ŋoot ke we nɛ̈k cɔk? Piɛŋkï kë luɛɛl, ku luɔikï cït man luɛɛl Ɛn en, ku yïn bï piɔ̈u miɛt we këcam mit wär kacaam ëbɛ̈n.

³ “Piɛŋkï ënɔɔnë, kɔckï ku bäkkï tëdï, bäkkï tëdï ku wek bï dɛk pïïr! Yɛn bï man bï tɔ̈u athɛɛr looi wo week ku gäm week athiɛɛi wään cän gutguut lɛ̈k Debid.

⁴ Acä looi ke ye bɛ̈ny, ku ye bɛ̈ny tueŋ de juöör, ku në kueerde yɛn cï riɛldï bɛ̈n nyuöth keek.

⁵ Ënɔɔnë yïn bï juöör ke pinynɔm cɔɔl, aa e kööl ë kuc kek yïn, ku ënɔɔnë abïk aa bɛ̈n ke ke kɔt bïk röt bɛ̈n mät yïn! Yɛn Bɛ̈nydït Nhialicdun, Nhialic Ɣeric de Yithriɛl, yɛn bï ee kënë tɔ loi rɔt ëbɛ̈n, yïn bä gäm dhuëëŋ ku riëëu.”

⁶ Pukkï röt Bɛ̈nydït ku läŋkï, ënɔɔnë yen athiɔ̈k.

⁷ Takkï kɔc ee karɛc looi päl kueer ë pïïrden, ku waar kɔc cïï piɔ̈ɔ̈th piath täŋden ë ke puk röt Bɛ̈nydït, Nhialicda ee piɔ̈u kok ku ee karɛc dap pɔ̈l.

⁸ Aye Bɛ̈nydït lueel an, “Täŋdï acïï cït täŋdun,” ku kuɛɛrkiën ke täk awuöckï në kuɛɛrkuön ke täk.

⁹ Ameckï cït man mec ë paannhial ke piny, yen acït mɛc de kueerdï në kuɛɛrkun ku ee yen ee mɛc mec ë täŋdï ke täŋdun.

¹⁰ “Wëlkï acïtkï pïïu ke deŋ kɔɔi ku deŋ, ee bɛ̈n piny nhial ke tuëny piny pïïu. Ayek këcam tɔ cil, ku bïïkï kɔ̈th bï com ku këcam bïï cam.

¹¹ Yen abï ciët täu de wɛ̈t bä lueel ë yathok, acïï bï ya baaŋ, ke cïï kë cä guiir bï looi, abï këriëëc ëbɛ̈n cä tuöc en lɔ looi.

¹² “Yïn bï Babilon nyääŋ piny ke yï mit piɔ̈u, yïn bï lɛɛr biic në pänydïtic në mät. Kur dït ku kur kor abïk wou ke ke ket diɛt, ku tiim abïk dɔl në miɛtëpiɔ̈u.

¹³ Tiim ke ameth abïk cil të wään de yic athil, tiim ke merital abïk cil të wään de yic kuɔɔth. Kënë abï aa kïn bï tɔ̈u aɣet athɛɛr, kë bï kɔc täk nïïm në kë cï Bɛ̈nydït looi.”