Yith 54 - JAM DE NHIALIC 2011

Nhiëër Nhiɛɛr ë Bɛ̈nydït Yithriɛl

¹ Jeruthalem yïn cï ciët tiiŋ cïn meth, ku ënɔɔnë yïn duëër ket ku wuou në miɛtëpiɔ̈u. Ënɔɔnë yïn bï dɛk mïth juëc, awär tiiŋ kën ë monyde kɔn pɔ̈l!

² Loi paanyduön rëër yïn thïn ke dït, loi wïïnke ke ke bär ku piäätë lɔ̈cke aril!

³ Yïn bï akɛɛthku rat nïïn tueŋ në tuŋ thook kedhie, kɔcku abïk pinyden bɛ puk nɔm, piny cieŋ ë juöör kɔ̈k ënɔɔnë. Wuöt cï nyääŋ piny ënɔɔnë abïk bɛ thiäŋ në kɔc.

⁴ Du riɔ̈c, yïn cïï yäär bï bɛ nyɔk, ku cïï yïn bï bɛ kuɔɔr piny. Yïn bï nɔm määr në ayärduön ɣɔn yïn dhuk, ku mär nɔm në rëërdu yïtök cï tiiŋ abaar.

⁵ Aciëŋdu abï ciët moc tëde yïn, Bɛ̈nydït de rɛm kek aye rinke. Nhialic Ɣeric de Yithriɛl abï we kony, Yen ee Bɛ̈nydïït mac pinynɔm ëbɛ̈n.

⁶ Yithriɛl yïn cït tiiŋ ë piacë thiaak, tiiŋ cïï monyde nyääŋ piny ku cï piɔ̈u jiɛth arëët. Ku Bɛ̈nydït acï yï caal ciëën bä ku lueel an:

⁷ “Yïn aa nyääŋ piny në kaam thiinakäŋ, yïn bä pɔ̈k nɔm ciëën në nhiëër dït.

⁸ Yɛn cï rɔt rat wei në agɔ̈th në kaam thiin koor, ku yïn bä nyuöth nhiëërdï aɣet athɛɛr.” Yen kë cïï Bɛ̈nydït lueel ka raan ee yïn kony.

⁹ “Ɣɔn në run ke Nowa, Yɛn cï gutguut lueel, nɔn cän piny bï bɛ tɔ mol. Ku ënɔɔnë yɛn cï gutguut lueel nɔn cän bï bɛ gɔ̈th wo week, wek cä bï bɛ gɔ̈k ku cä we be luöi këtuc.

¹⁰ Kur dït ku kur kor aduëërkï kuɛm, ku nhiëërdiën agɔk acïï bï kɔn jäl tëde we, Yɛn bï gutguutdiën de mät muk aɣet athɛɛr.” Yen kë lueel ë Bɛ̈nydït nhiaar week ka.

Jeruthalem Wadäŋ

¹¹ Aye Bɛ̈nydït lueel an, “Jeruthalem oou, pänydïït gum këtuc tɔ̈u në guömic, ku cïn raan töŋ riit yepiɔ̈u, Yɛn bï këërkëërdu bɛ nyɔk në yïk në kur piɛth.

¹² Yɛn bï alocku yïk në kɔi lɔ bilbil, ku thook ke kɛ̈lku abï ke yïk në kur dɛ̈p cï mac, ku yïk päny cï ye gɛɛu cil në kuur läk.

¹³ “Yɛn guöpdï Yɛn bï kɔcku wɛ̈ɛ̈t, ku gäm keek kuɛth ku mät.

¹⁴ Piathëpiɔ̈u ku yic abïk yïn tɔ ril. Yïn bï kony në yaaŋ ku riɔ̈ɔ̈cdït.

¹⁵ Na de raan mɛk yïn, cie Yɛn ë looi yen, raan ëbɛ̈n raan ee yïn yiɛ̈n tɔŋ abï löny.

¹⁶ “Ee Yɛn ë cak thɛ̈th, raan ee mac thɔ̈ɔ̈c, ku thɛ̈ɛ̈th tɔɔŋ. Ku cak raan ee tɔŋ thɔ̈ɔ̈r aya, raan ee tɔɔŋ muk bï yen ke näk.

¹⁷ Ku acïn tɔŋ bï yïn gäm tëtök, yïn bï löŋ de kɔc ee yïn gaany ŋiëc aa bɛ̈ɛ̈r. Yɛn bï awuutkï kony, ku gäm keek tiëm.” Acïï Bɛ̈nydït lueel.