Yith 52 - JAM DE NHIALIC 2011

Nhialic abï Jeruthalem Luök

¹ Jeruthalem, jɔ bɛ riɛl ku bɛ ë dït nyɔk! Pänydïït ɣeric de Nhialic, kum rɔt në piath! Kɔc kën Nhialic gam acïkï bï bɛ tëëk në thook ke kɛ̈lku.

² Teŋ rɔt abä nɔm lääu, Jeruthalem! Jɔt rɔt në abuui yic ku nyuc në thöönydu nɔm! Däkkï kuɛɛt cïï ë we duöt, wek yï nyan de Dhiɔn cï peec!

³ Acïï Bɛ̈nydït Awärjäŋ lɛ̈k kɔcke an, “Të cä wek aa lïïm, acïn wëu cï ke gäm week, në ee kueerë ayadäŋ acïn kë bïï tääu piny bïï ë we tɔ lääu nïïm.

⁴ Wään la wek rëër Rip ke we ye alɛi, wek aake lɔ wapäc në kë cäk tak ë we nïïm, go Athiriya we jɔt në riɛl ku acïn kë cï tääu piny ë biäkdun.

⁵ Ku ënɔɔnë ë Babilonia kë cït ee kënë acï rɔt looi: wek aa pec ku acïn kë cï tääu piny ë biäkdun. Kɔc ceŋ week ayek kenïïm lɛc, ku në aköölnyïïn ëbɛ̈n ayek rinkï dhɔ̈l.

⁶ Në akööl bɔ̈ tueŋ abäk jɔ ŋic nɔn ee Yɛn Bɛ̈nydït Awärjäŋ, ku ee Yɛn ë jam wo week.”

⁷ Ee kë piɛth cït ŋö bä raan toc tïŋ ke bɔ̈ ke cath ë kur nïïm, ke bïï wëlpiɛth, wël ke mät, wël ke piath! Ee thoŋ de tiëm caal, ku lɛ̈k Dhiɔn an, “Nhialicdu ee melik!”

⁸ Kɔc ee pänydït tiit në ayek wuou në miɛtëpiɔ̈u! Ayek tïŋ në kenyïïn, yen luɔi puk ë Bɛ̈nydït yenɔm Dhiɔn!

⁹ Luɔikï awuɔɔu de miɛt ë piɔ̈u, we kak cï riääk ke Jeruthalem! Bɛ̈nydït abï pänydïïtde luök, ku riit kɔcke piɔ̈ɔ̈th.

¹⁰ Bɛ̈nydït abï riɛldɛn ɣeric luɔɔi, abï kɔcke kony në juöör nïïm ëbɛ̈n, ku piny thar ëbɛ̈n abï kuɔɔny ë Nhialic tïŋ.

¹¹ Dötkï apiɛth nɔn bä wek Babilonia nyääŋ piny, wek kɔc ɣɛ̈ɛ̈c kake Luaŋdït wedhie! Duökï ka cï pɛ̈ɛ̈n ee jak, takkï weyiic ɣer ku jälkï.

¹² Në ye aköölkë wek cïï bï jäl ë ruäny ruäny, wek cïï bï kɔc kɔɔr bäk röt kual. Bɛ̈nydït Nhialicdun abï week wat ku gël week në biäk kedhie.

Awun Nuan

¹³ Aye Bɛ̈nydït lueel an, “Awundï abï tiam në luɔide yic, abï riëëu guöp arëët.

¹⁴ Kɔc juëc acïk piɔ̈ɔ̈th bɛ̈n päu të wën tïŋ kek en, aacï puk guöp aläl në kɔc yiic abïï ciët kë cie raan.

¹⁵ Ku ënɔɔnë juöör juëc acïk gäi në yen, ku meliik abïk ciën kë bekï lueel në kë de gäi. Abïk aa tïŋ ku yökkï yic yen kë ɣɔn kënkï kɔn ŋic.”