Yith 51 - JAM DE NHIALIC 2011

Wël ke Duutë Jeruthalem Piɔ̈u

¹ Aye Bɛ̈nydït lueel an, “Piɛŋkï këdï, wek kɔc kɔɔr kuɔɔny, wek kɔc ee luääk kɔɔr tëde yɛn. Takï wenïïm në kuur ë bä wek thïn, të wään wëc ë week bei thïn.

² Takkï kuɛɛrëdun, Abraɣam, kekë Thara të wään bïï ë kuatdun. Wään caal ɛn Abraɣam, aa cïn nɔm meth, ku acä thieei ku gäm mïth, yɛn cï kuatde tɔ juëc.

³ “Yɛn bï Jeruthalem nyuöth kokëpiɔ̈u, nyuöth raan ëbɛ̈n raan rɛ̈ɛ̈r në ye ɣööt cï riääk yiic. Na cakaa nɔn ye pinyde jɔ̈ɔ̈r, abä tɔ ee dom, abï ciët dom cä com ë Eden. Dhuëëŋ ku miɛtëpiɔ̈u abïk tɔ̈u ëtɛ̈ɛ̈n, ku diɛt ke thieithieei ku lɛ̈c leecë Yɛn.

⁴ “Piɛŋkï kë luɛɛl kɔckï, piɛŋkï kë luɛɛl yɛn cï wëëtdï gäm juöör, lööŋkï abïk keek yiɛ̈n ɣɛɛr.

⁵ Yɛn bï dap bɛ̈n bä ke kony, kööl de tiëmdï acï thiɔ̈k. Yɛn guöpdï Yɛn bï juöör cieŋ. Piiny mec atitkï yɛn bä bɛ̈n, atitkï yɛn në aŋäth bän keek bɛ̈n luök.

⁶ Tïŋ paannhial, ku bɛ piny tïŋ! Paannhial abï määr cï nɔn ë tol, piny abï dhiap cï lupɔ thɛɛr, ku kɔcke kedhie abïk thou cït man ë luaŋ. Ku kuɔny bä bɛ̈ɛ̈i abï tɔ̈u aɣet athɛɛr, tiëmdï yen ee thök de käŋ.

⁷ “Piɛŋkï kë luɛɛl, wek kɔc ŋic piathëpiɔ̈u, kɔc tɔ̈u ë wëëtdï në kepiɔ̈ɔ̈th. Duökï ee riɔ̈ɔ̈c të lɛ̈ɛ̈t ë kɔc week ku karɛc luɛɛl ë wegup,

⁸ abïk riäär cï lupɔ cïï ë col cam! Ku luääk bä bɛ̈ɛ̈i abï tɔ̈u aɣet athɛɛr, ku tiëmdï abï tɔ̈u ë ceŋ.”

⁹ Pääcë Bɛ̈nydït ku luäk wook! Loi riɛldu ku kony wo, loi cït man ɣɔn looi yïn en ɣɔn thɛɛr. Aa ye yïn ë tem ŋuäldït Raɣab de wɛ̈ɛ̈r në thïïm.

¹⁰ Aa ye yïn ë tɔ wɛ̈ɛ̈r tɔ dëu aya ku loi kueer në pïïu yiic, ago kɔckuön kɔɔr bä ke kony wɛ̈ɛ̈r teem.

¹¹ Kɔc ɣɔn ca ke kony, abïk ɣet Jeruthalem në miɛtëpiɔ̈u, ke ke kët ku wuoukï në miɛtëpiɔ̈u. Abïk piɔ̈ɔ̈th miɛt aɣet athɛɛr, abïk nïïm lääu aɣet athɛɛr të cïn dhiëëu ku jiɛthëpiɔ̈u.

¹² Aye Bɛ̈nydït lueel an, “Yɛn ee raan ë tɔ we ril. Eeŋö ya wek riɔ̈ɔ̈c në mɛnh ë raan, kɔc cie ceŋ cï wäl?

¹³ Cäk nïïm guɔ määr në Bɛ̈nydït, raan ë cak week, raan ë thieth paannhial ku tɛ̈ɛ̈u këërkëër ke piny piny? Eeŋödäŋ ya wek tɔ̈u në riɔ̈ɔ̈c yic në agönh de kɔc yɔŋ week, kɔc kɔɔr bïk we riɔ̈ɔ̈k? Agönhden acïï week bï bɛ riɔ̈ɔ̈k.

¹⁴ Kɔc cï ke mac abïï keek lony, abïk pïïr ë run juëc abïk kacaamkɛn kɔɔrkï aa yök ëbɛ̈n.

¹⁵ “Yɛn Bɛ̈nydït Nhialicdun, Yɛn cï wɛ̈ɛ̈r liääp ku ta apiɔ̈ŋde wuur. Rinkï acɔlke Bɛ̈nydït de rɛm!

¹⁶ Yɛn aa thiëth paannhial ku tääu këërkëër de pinynɔm piny, ku lëk Jeruthalem an, ‘Wek ee kɔckï! Wek cä gäm wëëtdï, ku wek cä gël në yaciin.”’

Thök de Nuan de Jeruthalem

¹⁷ Jeruthalem jɔ pääc! Jɔt rɔt ku kääcë! Yïn cï dek në abïny de këtuc kë cï Bɛ̈nydït gäm yïn bä dek në agönhde, guɔ ë thölic ëbɛ̈n go yï tɔ cath ke yï tuëk.

¹⁸ Acïn raan bï yï wat, acïn raan në kɔckun yiic, bï yï thel ciin.

¹⁹ Riäŋdïït ee yic rou acï we lɔ̈ny: pinydun acï riääk në tɔɔŋ biɔ̈k, ku kɔckun anɛ̈k cɔk keek. Acïn raan nyuth we kokdepiɔ̈u.

²⁰ Në aguuk ke kuɛɛr kedhie, kɔckun ayek wïïk në kɔ̈c cï kek kɔ̈c, acïk ciët ŋeer cï dɔm në wïn yëëp. Acïk riɛl de agönh ë Nhialic jɔ yök thok.

²¹ Wek kɔc ke Jeruthalem nuan, wek kɔc ee tuëk cï ka cï wiɛɛt ë mɔ̈u,

²² Bɛ̈nydït Awärjäŋ ee we kony ku lueel an, “Yɛn bï abïïny nyaai abïïny wään cä gäm week në agönhdï. Wek cïï bï bɛ dek ë mɔ̈n ee week tɔ tuëk.

²³ Abä gäm kɔc ee we yɔŋ, kɔc ee we tɔ tɔ̈c piny ë kuɛɛr yiic ku jɔkï we duöm piny abäk ciët tiɔ̈k.”