Yith 5 - JAM DE NHIALIC 2011

Din de Dom ë Tiim

¹ Piëŋë të la yɛn ke ya kiit dinë, ee din ë mäth kekë domdɛn ë tiim ke enap: Mɛ̈thëdï ade nɔm dom ë tiim në kur nïïm tën ee ŋiëc luɔk aläl.

² Ë piny gɔ̈i ku lɛɛthic në kɔi ku com tiim piɛth. Acï alooc bäär yïk bï yen ke tiit, ë pul wec bï yen mɔ̈u dhiim. Go enap tiit ke bï luɔk go enap kɛc ëbɛ̈n

³ Ku ënɔɔnë määthkï luɛlkï an, “Wek kɔc rɛ̈ɛ̈r ë Jeruthalem ku Juda, tiëŋkï awäc ë kaamdï wokë domdiën ë tiim.

⁴ De kë cä wööc kë kɛ̈n luöi yen? Ka eeŋö tɔ ye lok në enap kec ke cie mïth ke enap piɛth ee kek ë ŋääth?

⁵ “Kë bä luöi domdiën enap kï, yɛn bï thɔc cän e geeu nyaai, ku thuöör kal wään cän e gël piny, ku ta ciɛm ë läi roor ku dumkï.

⁶ Yɛn bï wal tɔ cil thïn. Yɛn cïï tiim bï guaar kɔ̈ɔ̈th, ku cä ke puur thäär, ku yɛn bï wal kekë kuɔɔth pɔ̈l ke ke cil thïn ku kumkï keek piny. Ayï luäät abä pɛ̈n luɔi tuëny en dom.”

⁷ Baai de Yithriɛl ee dom de tiim de Bɛ̈nydït de rɛm, kɔc ke Juda ee kek ee tiim cï piith ee Ye miëët piɔ̈u. Aake ŋɛ̈ɛ̈th nɔn duëër kek yic aa looi, ke ke päl yic ku yek kɔc nɔ̈k. Aa ŋɛ̈ɛ̈th bï piathëpiɔ̈u yök tëde keek, ku kɔc yɔŋkï keek adhiëëukï yic.

Kërɛɛc Ye Kɔc Looi

⁸ Amawoou në week! Kɔc ee ɣööt ku duum ɣɔɔc ku matkï keek në kakuön thɛɛr yiic. Ee nïn bɔ̈yë acïn piny bï döŋ, të bï raan däŋ bɛ lɛɛr, ee kek abï nyääŋ piny ke ke ceŋ ëtɛ̈ɛ̈n kapäc.

⁹ Yɛn cï Bɛ̈nydït de rɛm piŋ ke lueel an, “Ɣön dït läk ëbɛ̈n abïk yiic ciën kɔc, ku abïk dhɔt piny ke ke cï riääk.

¹⁰ Duumdït ke tiim kathiëër abïk litiir kadhetem ke mɔ̈u bɛ̈ɛ̈i. Ku bɔt ku thiërbɛ̈t 180 ë litiir ke kɔ̈th, abïk litiir kabɛ̈t ke anyuɔl bɛ̈ɛ̈i.”

¹¹ Amawoou! Në kɔc ee röt jɔt miäk aduur ke ke lɔ dek ë mɔ̈n tuc, ku ruukï ke ke dek abï piny dït, abï mɔ̈u ke tuööc cït many dɛ̈p.

¹² Në dhuëëŋduön ë cämic, wek ee thoom gut ku lɔ̈r ku kuɔthkï aruöör, ku jɔ aa mɔ̈u. Ku kë looi ë Bɛ̈nydït acäkï ee yökic,

¹³ ka wek bï peec ke we mac. Bänykun abïk thou në cɔk, ku näk rou kɔc ke baai.

¹⁴ Paan ë thuɔɔu acïï cɔk dɔm në këden, acï yethok ŋaam arëët. Abï bäny ke Jeruthalem liek ëtök në kuut ke kɔc baai lɔ ke ke wou.

¹⁵ Raan ëbɛ̈n abï biɔɔn guöp, ku kɔc ee kenïïm mɔ̈k nhial në dït enɔm abï ke kuɔɔr piny.

¹⁶ Ku Bɛ̈nydït de rɛm ë dïtde nyuɔɔth në luɔi yen yic looi, ku nyooth Nhialic ɣeric ɣɛɛr ë yicde në piathëpiɔ̈nde.

¹⁷ Në wuöt cï riääk yiic amɛ̈l ku bɔɔth abïk aa lɔ nyuäth ëtɛ̈ɛ̈n.

¹⁸ Amawoou në week! Kɔc cïï röt ee miëët bei në awɛ̈ɛ̈ckun yiic.

¹⁹ Ayak lueel an, “Adï jɔ Bɛ̈nydït dap bɛ̈n, ku looi kë cï lueel an bï lëu ke buk tïŋ, Nhialic Ɣeric de Yithriɛl aduëër wo dap nyuöth kiɛɛu de kë buk ŋic.”

²⁰ Amawoou në week! Kɔc ee kërac cɔɔl an ee këpiɛth, ku këpiɛth an ee kërac. Ku pɔ̈kkï mɔ̈ɔ̈th ke ye ɣɛɛr, ku takï ɣɛɛr ë mɔ̈ɔ̈th. Ku takï këkec ë këŋar, ku ye këŋar këkec.

²¹ Amawoou në week! Kɔc ee röt tïŋ cï ka ŋic käŋ ku pɛlkï nïïm.

²² Amawoou në week! Wek jööt ril ke mɔ̈u ku yak wiɛɛt në ë mäu tuc cï määt nïïm!

²³ Në kumthok yen aya wek kɔc de guöp gääk pɔ̈l, ku pɛ̈nkï kɔc cïn kë cïk wööc yicden.

²⁴ Në biäk de ee kënë, wek bï määr cït man ë yuööt dɛ̈p, ku dhiap meikun, ku biɔɔr gaakdun ku gɔpë yom wei, në biäk cä wek löŋ de Bɛ̈nydït de rɛm cï Yen wo wɛ̈ɛ̈t rɛɛc, Nhialic Ɣeric de Yithriɛl.

²⁵ Bɛ̈nydït agöth ke kɔcke, ku ë Yecin jɔ̈t keek bï ke luöi këtuc, kur abï ke lath, ku gup ke kɔc cï thou abïï ke nyääŋ piny në kuɛɛriic ëbɛ̈n cït man ë nuöön. Cakaa yen ë tɔ̈u aya, agönh de Bɛ̈nydït abï ŋoot ke cïï thök, abï ŋoot ke nu ciin biic ke kɔɔr bï këtuc looi.

²⁶ Abï kïït nyuɔɔth kïn cɔl En jur nu tëmec. Ku koth kaaŋ bïï ë kɔc piŋ ë piny thar. Agokï dap bɛ̈n ke ke riŋ aläl!

²⁷ Acïkï ee dak ku cïkï ee kɔ̈th. Acïn raan ee nok ku cïkï ee tɔ̈c kueer. Acïn thiönh ë keyäc ee lääu ku acïn wïn ë waar ee tuɛny.

²⁸ Wiɛth ke dhɛ̈ŋken amothkï, ku acï röt guiir ke ke muc. Ku miɔt ke jöŋgöörken arilkï ëtör cï kuur, ku cök ke abëël ke jöŋgöörken ayek wïc cï kɔɔr.

²⁹ Rem de tɔŋ ayek ŋäär cï kɔ̈ɔ̈r cï lɛ̈i nɔ̈k, ku mukkï ke cïn raan duëër ye bɛ̈ɛ̈i bei tëde keek.

³⁰ Të le köölë bɛ̈n, abïk roor aläl ke ke bɛ̈k Yithriɛl cït man ë wɛ̈ɛ̈r. Tiëŋkï wut! Ee mɔ̈ɔ̈th ku nuandït! Ɣɛɛr acïï ë mɔ̈ɔ̈th liek.