Yith 49 - JAM DE NHIALIC 2011

Yithriɛl Ee ɣɛɛr de Juöör

¹ Piɛŋkï kë luɛɛl, wek juöör mec, wek kɔc rɛ̈ɛ̈r të mec! Wään kën ë ya dhiëëth, Bɛ̈nydït acï ya lɔc ku kuɛny yɛn ke ya ye awunde.

² Acï wël ke yɛn thok tɔ moth cï abätäu. Ee yɛn gël në yeciin. Acï yɛn tɔ cït winh ë dhaŋ, moth cï coc ku moc.

³ Acï ya yɔ̈ɔ̈k an, “Yithriɛl, yïn ee awundï, në biäkdu kɔc abïk yɛn aa dhuëëŋ guöp.”

⁴ Guɔ lueel an, “Yɛn cï luui, ku acïn aŋäth nu ke yɛn! Yɛn cï riɛldï thöl, ku acïn kë cä yök.” Ku yɛn bï ŋoot ke ya ŋäth Bɛ̈nydït bïï yicdï gël, abï yɛn gäm ariöp de kë cä looi.

⁵ Bɛ̈nydït ë yɛn lɔc ke ya kënë dhiëëth, acï yɛn tɔ ye awunde bä kɔcke pɔ̈k nïïm ciëën, bä kɔc ke Yithriɛl cï thiäi pɔ̈k nïïm ciëën. Bɛ̈nydït acï ya gäm dhuëëŋ, ee yen awaŋ de riɛldï.

⁶ Go ë Bɛ̈nydït lɛ̈k ɛn an, “Yɛn de këdïït luɔɔi në biäkdu, yïn awundï. Acie biäk bïï yïn dhiëën ke Jakop tɔ dït, ku ta Yithriɛl cï döŋ apïïr puk nɔm yetök, ku yïn bä tɔ ye ɣɛɛr de juöör aya, ago kɔc ke piny nɔm kony wëi.”

⁷ Acïï Nhialic de Yithriɛl ɣeric lɛ̈k, raan cï dhɔɔt guöp arëët, raan mɛɛn ë juöör ëbɛ̈n ku ye awun de bäny: “Meliik abïk yïn tïŋ ke yï cï lony, ku abïk röt jɔt ku nyuthkï yï riëëuden, abïï wɛ̈ɛ̈t meliik tïŋ aya, ku abïk kenïïm guöt piny riëëu rïïu kek yïn.” Kënë abï rɔt looi, në biäk cïï Bɛ̈nydït awunde lɔc, Nhialic Ɣeric de Yithriɛl ee gutguutke muk.

Jeruthalem Akimë Piny

⁸ Aye Bɛ̈nydït lɛ̈k kɔcke an, “Të le ë kööl bïï ë we luök bɛ̈n, wek bä nyuöth piath, ku yɛn bï dhiëndun kaar wek kuɔɔny bɛ̈ɛ̈r. Wek bä tiit ku gɛ̈l week ku në kueerdun yɛn bï mät looi wo kɔc kedhie. Wek bä bɛ tɔ ɣap pinyduön cï tɔ ye kë cï pɔ̈l ënɔɔnë.

⁹ Abä lɛ̈k kɔc cï mac an, ‘Lakkï në nɔm lääu!’ ‘Ku lɛ̈k kɔc tɔ̈u në mɔ̈ɔ̈th yic an, ‘Bäkkï bei lakkï ë ɣɛɛr yic!’ Abïk ciët amɛ̈l ee nyuäth në kur kor nïïm,

¹⁰ acïkï cɔk ke bï kɔn nɔ̈k ayï rou. Tuöc de akɔ̈l ku jɔ̈ɔ̈r acïï ke bï nɔ̈k, në biäk bïï raan nhiaar keek wat. Abïï keek lɛɛr në nyïïn ke pïïuwiic.

¹¹ “Yɛn bï kueer dït looi në kur kɔ̈ɔ̈th ku guiɛɛr kueer bïï kɔckï cath thïn.

¹² Kɔckï abïk bɛ̈n të mec, në biäk të lɔ rut, ku të lɔ aköl athɛ̈i, ku në Athwan në biäk de wöuwic.”

¹³ Kɛ̈të paannhial! Loi awuɔɔu de miɛtëpiɔ̈u, piny! Takï kur wuou ke ke ket diɛt! Bɛ̈nydït abï kɔcke duut piɔ̈ɔ̈th, abï piɔ̈u kok kekë kɔckɛn cï nuan.

¹⁴ Go ë kɔc ke Jeruthalem lueel an, “Bɛ̈nydït acï wo nyääŋ piny! Acï nɔm määr në wook.”

¹⁵ Go Bɛ̈nydït bɛ̈ɛ̈r an, “Duëër tik nɔm määr në mɛnhde ku cïï mɛnhdɛn ë dhiëëth nhiaar? Na cak man meth nɔm määr në mɛnhde, Yɛn cïï nɔm duëër määr ë week.

¹⁶ Jeruthalem, Yɛn cïï nɔm duëër kɔn määr në week! Wek cä ke gɔ̈ɔ̈r rin në cinkï yiic.

¹⁷ “Kɔc bï yï bɛ̈n bɛ yïk abïk bɛ̈n ee nïnkë yiic, ku kɔc ë riäk yïn abïk jäl.

¹⁸ Caathë yïnyin ku tïŋ kë loi rɔt! Kɔcku amɛ̈ɛ̈tkï röt ke ke bɔ̈ ciëën pinyden! Ke ya ye Nhialic pïïr ë yic, yïn bï rɔt lɛɛc në kɔcku, cït man ye nyan kaman rɔt lɛɛc në atekkɛn ceŋ keek.

¹⁹ “Pinydun aacï riɔ̈ɔ̈k ku abï döŋ ke ye jɔ̈ɔ̈r, ku ënɔɔnë abï kuur tëde kɔc bï bɛ̈n rëër ëtɛ̈ɛ̈n. Ku kɔc ë nyääŋ we piny në riääk yic abï ke nyaai në weyiic ku leerë keek tëmec.

²⁰ Kɔckuön wään le ke dhiëëth ë pɛ̈cic abïk we yɔ̈ɔ̈k në kööl tök an, ‘Pinyë acï kuur aläl, wok kɔɔr ɣööt kɔ̈k, buk ceŋ!’

²¹ Ku ëtɛ̈ɛ̈n abä aa lɛ̈k rɔt, Eeŋa ë dhiëth yɛn ë mïthkë kedhie? Mïthkï acïk määr, ku yɛn cïn nɔm mïth kɔ̈k. Yɛn aacï peec, copë ya wei, eeŋa ë muk ee mïthkë? Yɛn aacï döŋ yatök, mïthkë ë ke bɔ̈ tënou?”

²² Acïï Bɛ̈nydït Awärjäŋ lɛ̈k kɔcke: “Yɛn bï kïït nyuöth juöör, ku abïk mïthkun pɔ̈k nïïm baai.

²³ Meliik abïk ciët wärkun ku cït diäär ke meliik märken. Abïk kenïïm guöt piny në yïnɔm ku riëëukï yïn, abïk röt kuɔɔr piny ke ke nyuth yïn riëëuden. Ëtɛ̈ɛ̈n abä jɔ ŋic nɔn ee Yɛn Bɛ̈nydït, acïn raan tit kuɔɔnydï ee yäär.”

²⁴ Duɛ̈ɛ̈rë kak ë rum ë raan de tɔŋ jɔt, Duɛ̈ɛ̈rë raan cï kɔc rac dɔm luök?

²⁵ Go ë Bɛ̈nydït bɛ̈ɛ̈r an, “Kë bï rɔt looi ka ë dhöc. Kë cï raan de tɔŋ dɔm abïï jɔt, ku kë cï raan rac peec abïï dɔm. Yɛn bï thɔ̈ɔ̈r wo raan thäär ke week, ku yɛn bï mïthkun kony.

²⁶ Yɛn bï kɔc yɔŋ week tɔ näk röt kapäc, abïk miɔ̈l në riɛmden kapäc cï ka cï dek ë mɔ̈u. Ëtɛ̈ɛ̈n abïï ë kɔc jɔ ŋic ëbɛ̈n nɔn ee Yɛn Bɛ̈nydït Awärjäŋ, raan wën luɛ̈k we biic, ku tɔ we lääu nïïm. Abïk ŋic nɔn ee Yɛn Nhialic riil de Yithriɛl.”