Yith 44 - JAM DE NHIALIC 2011

Bɛ̈nydït Yen ee Nhialic Yetök

¹ Aye Bɛ̈nydït lueel an, “Piɛŋkï ënɔɔnë wek awuutkï, kɔc ke Yithriɛl, kɔckiën cä lɔc, kuat de Jakop.

² Yɛn ee Bɛ̈nydït ë cak week, në kööl ɣɔn dhiëëthë week, wek cä kony. Duökï riɔ̈c, wek ee awuutkï, kɔckiën cä lɔc, kɔc nhiaar keek.

³ “Yɛn bï piny nɛ̈k rou miɔɔc në pïïu, ku ta pïïu tɔ wat piny ril. Yɛn bï wëikï wäl në mïthkun gup, ku athiɛɛidï në kuatdun gup.

⁴ Abïk bɛ̈n nhial cï wal nu ë pïïuwiic, ku abïk ciët tiim cï cil në nyin ë pïïu yɔu.

⁵ “Abïï kɔc aa lueel ëtök tök nɔn ee Yɛn Bɛ̈nydït. Abïk bɛ̈n mɛ̈tkï röt kɔc ke Yithriɛl. Ku raan ëbɛ̈n abï kïn de rin ke Bɛ̈nydït aa gɔ̈ɔ̈r në ye kaam ku yek röt cɔɔl an wok ee kɔc ke Nhialic.”

⁶ Kë lueel ë Bɛ̈nydït melik de Yithriɛl, ku ye konyde, Bɛ̈nydït de rɛm kï: “Yɛn ee tueŋ, ku Ya ciëën, ku Yɛn ee Nhialic a tök, acïn yanh däŋ ee Yɛn a tök.

⁷ Duëër dɛk raan däŋ lëu kë cä looi? Eeŋa duëër këriëëc bï tuöl ëbɛ̈n caar gɔl të ɣɔn gɔlë käŋ aɣet cï ee kööl?

⁸ Duökï riɔ̈c, kɔckï! Aŋiɛckï ɣɔn gɔl ë käŋ aɣet cï ënɔɔnë yɛn cï këriëëc bï tuöl ëbɛ̈n caar, ku wek ee cätɔɔkï. De yanh däŋ nu? De yanh ril däŋ nu kɛ̈n ɛn këde piŋ?”

Läm de Yiëth Adɔl Guöp

⁹ Kɔc ee yiëth looi kedhie acïnkï naamden, ku yiëth yek leec aläl acïnkï thaarden. Kɔc ee yiëthkë lam acïk cɔɔr ku acïn kë ŋickï ku abïk gup yäär.

¹⁰ Acïï piɛth bï kɔc joth aa looi ke ke ye yiëth bïk aa lam.

¹¹ Raan ëbɛ̈n raan ee ke lam abïï kuɔɔr piny. Ku kɔc ee yiëth looi ayek kɔc ku acïn däŋ. Tɔ ke bɔ̈ bïk bɛ̈n kɔ̈ɔ̈c ë luk nɔm, abïk riɔ̈ɔ̈c ku jɔkï ayäär guum.

¹² Thɛ̈ɛ̈th ayek jonh thiiakäŋ nööm ku tɛ̈ɛ̈ukï mɛɛc. Kökkɛn ril ee dëi muk thɛ̈ɛ̈th en wëëth abï këdɛn kɔɔr thɔ̈ɔ̈ŋ. Të looi yen en aye cɔk nɔ̈k, ku nɛ̈k rou, ku jɔ dak.

¹³ Atën ee tiim guaŋ ee tim them. Ee giɛɛt käär në agalam, ku jɔ kiëët në kakɛn ke guëŋ, ku jɔ looi ke cït guöp raan, raan läk, ke bïï lɔ tääu ɣönde.

¹⁴ Aduëër tim de thidar lɔ yep bï yen luui, ku nɔn lɔc tim de ɣok, ku nɔn ee tim de thaipereth roor. Ku nɔn com tim de laurel ku jɔ deŋ tiit bï ye tɔ dït.

¹⁵ Raan ee biäk de tim tɔ ye këde thät, ku looi biäk ke ye yath. Biäk tök aye yen mac looi bïï yen yeguöp tuööc, ku thɛɛl kuïn cï pam, ku biäk däŋë looi yen yath ku ye lam.

¹⁶ Ee mac dɛ̈ɛ̈p në tiim kɔ̈k, ee rïŋ nyop ku ciëm ku jɔ kuɛth. Ee yeguöp tuööc ku jɔ lueel an, “Eeŋö jɔ yen moor apiɛth aya! Ee many ŋö ee këpiɛthë!”

¹⁷ Ku biäk däŋ de tim aye yen yath looi, ku jɔ yenɔm guöt piny ku lɛm. Aye lam ku lueel an, “Yïn ee yanhdï, kony ɛn!”

¹⁸ Kɔc cït ee kakë ayek dhän aläl, akuckï kë loikï. Ayek kenyïïn niɛɛn, ku thiökkï kenïïm në yic.

¹⁹ Kɔc ee yiëth looi acïkï ee tak ayï miɔ̈n bïk lueel an, “Biäk de tim acä dɛ̈ɛ̈p. Yɛn cï kuïn cï pam thaal, ku nyuɔp rïŋ ku cam. Ku biäk däŋ de tim acän ke yath luööi. Ku yakï gut a nɔm piny në tim dït nɔm!”

²⁰ Ee kɔc gäm täŋ ee raan cït kë cam ŋeth. Täŋdɛn ë dhɔ̈ɔ̈n ee ye thɛl të wär kaam duëërë yen kony. Acïï bï gäm rɔt nɔn ye yanh muk në yeciin nɔn cïï yen ee yath taitai.

Bɛ̈nydït, Aciëk ku Ye Kony de wëi

²¹ Aye Bɛ̈nydït lueel an, “Yïn Yithriɛl, tak ee kënë, tak nɔn ee yïn awundï. Yïn aa cak ke yï bï aa awundï, ku Yɛn cïï nɔm bï määr në yïn.

²² Yɛn cï awɛ̈ɛ̈cku cuɔth wei cït man ë luäät. Bäär dɔ̈kë rɔt ɛn, ee Yɛn ee raan ë kony yïn.”

²³ Moc kiɛɛu de miɛtëpiɔ̈u, yïn paannhial! Moc kiɛɛu, wek ɣään thuth ke piny! Mockï kiɛɛu në miɛtëpiɔ̈u, wek kur, ku tim ëbɛ̈n tɔ̈u roor! Bɛ̈nydït acï dhuëëŋde nyuɔɔth, në biäk cïï Yen kɔckɛn ke Yithriɛl kony.

²⁴ “Yɛn ee Bɛ̈nydït, konydun, Ee Yɛn ee raan ë cak week. Ee Yɛn Bɛ̈nydït, Aciëŋ de këriëëc ëbɛ̈n. Ee Yɛn a tök Yɛn aa thieth paannhial, wään luɔi ɛn piny, acïn raan cï ya kony.

²⁵ Yɛn cï kɔc ee käŋ caar tɔ cït dhän, ku ta kɔc ee kanhial caar rac piɔ̈ɔ̈th. Ku jääny wël ke röör pelnïïm ku ta ŋïnydɛn de käŋ ee dhɔ̈ɔ̈n.

²⁶ Ku të cɔ̈ɔ̈r awundï, të tuɔɔc ɛn tuc bïï kïïtdï lɔ nyooth, yɛn ee ka cï caarë, ku ka cï kiëëtë tɔ ee yic. lɛ̈kë Jeruthalem an kɔc abïk bɛ lɔ rëër ëtɛ̈ɛ̈n, ku pɛ̈ɛ̈nydït ke Juda bïk bɛ lɔ nyɔk në yïk. Kek ee pɛ̈ɛ̈nydïtkë abïk röt bɛ jɔt në riääkic.

²⁷ Në wɛ̈t de yöök, Yɛn cï Abäpdit tɔ dëu.

²⁸ Guɔ lɛ̈k Thairuth an, “Ee yïn abï bääny muk në nyindï yic, yïn bï kë kaar bä looi looi: yïn bï löŋ tääu piny bïï Jeruthalem nyɔk në yïk ku bä këërkëër de Luaŋdït tɔ tɛ̈ɛ̈uwë piny.’”