Yith 43 - JAM DE NHIALIC 2011

Nhialic Acï Gutguut Lueel Bïï Kɔcke Luök

¹ Yithriɛl, Bɛ̈nydït ë cak week alueel, “Duökï riɔ̈c, wek bä ke kony, we cä ke cɔɔl në rin, wek ee kɔckï.

² Të tëëk yïn në pïïuwiic të thiäŋ, Yɛn bï tɔ̈u wo yïn, kadhal yïn acïkï yïn bï tiaam. Të tëëk yïn në macic, yïn cïï bï nyop, këril them yïn ëbɛ̈n acïn kë bïï luöi yïn.

³ Në biäk ee Yɛn Bɛ̈nydït Nhialicdu, Nhialic Ɣeric de Yithriɛl ɣɔn kony yïn. Yɛn bï Rip pɔ̈l ke bï yï tɔ lääu nɔm, Yɛn bï Ethiopia pɔ̈l kekë Theba.

⁴ Yɛn bï juöör ke piny pɔ̈l agokï we kony wëi, në biäk nhiaar ɛn we ku gäm we dhuëëŋ.

⁵ Du riɔ̈c, Yɛn täu wo yïn! “Gɔl të lɔ aköl amiäk, ku të lɔ aköl athɛ̈i, Yɛn bï kɔcku dɔ̈k nïïm baai.

⁶ Yɛn kɔc ke biäk të lɔ rut yɔ̈ɔ̈k bïk ke tɔ jël, ku kɔc ke wöuwic cïkï keek bï pëën, takkï kɔckï puk röt në piiny mec yiic piiny mec nu ë piny nɔm.

⁷ Keek ayek kɔc ke nɔmdï, ku aake cak keek ke ke bï ya yiɛ̈n dhuëëŋ.”

Kɔc ke Yithriɛl Ayek Cätɔɔ ke Bɛ̈nydït

⁸ Aye Bɛ̈nydït lueel an, “Cöölë kɔckï në luk nɔm. Adekï nyïïn ku acïk cɔɔr, adekï yïth, ku acïk miŋ!

⁹ Cöölë juöör bïk bɛ̈n në luk nɔm. Ee yanhou në yiëthken yiic duëër ka bï tuöl caar? Eeŋa në keyiic cï ka loi röt ee nɔɔnë kɔn lueel? Takkï ee yiëthkë bïï cätɔɔken bïk bɛ̈n nyooth nɔn de kek yic, bïk wël luelkï bɛ̈n tɔ ee yith.

¹⁰ “Kɔc ke Yithriɛl, wek ee cäätɔɔkï, wek aa lac keek bäk aa awuutkï, ke we bï ya ŋic ku gamkï Yɛn, ku bäk yökic nɔn ee Yɛn Nhialic Yatök. Ku cïn yanh däŋ rek rɔt piny ke Yɛn, acïn yanhdäŋ ë cï kɔn tɔ̈u, ku acïn däŋ bï bɛ tɔ̈u.

¹¹ “Ee Yɛn Yatök, Yɛn aye Bɛ̈nydït, Raan töŋ ee Yen duëër we kony.

¹² Yɛn cï kë bï tuöl bɛ̈n caar, ku yɛn cï bɛ̈n bɛ̈n bä we kony. Acïn yanh alei cï kë cït ee kënë kɔn looi, wek ee cäätɔɔkï.

¹³ Yɛn ee Nhialic ku Yɛn täu anandï. Acïn kë duëër ban në riɛldï yic, ku acïn raan duëër kë cä looi waar.”

Kɔc bï ban në Babilon

¹⁴ Nhialic Ɣeric de Yithriɛl, Bɛ̈nydït ee we luök, aye lueel an, “Yɛn bï rem de tɔŋ bï lɔ thɔ̈ɔ̈r ke Babilon tooc, aguɔ we luök, Yɛn bï athïïn ke pänydït dhuɔŋ piny, ku kiɛɛu de kɔcke abï rɔt puk ke ye dhiëëu.

¹⁵ Yɛn ee Bɛ̈nydït, Nhialicduön ɣeric. Yɛn aa cak yïn, Yithriɛl ku Ya melikdun.”

¹⁶ Ɣɔn thɛɛr Bɛ̈nydït acï kueer looi, kueer ee tëëk në wɛ̈ɛ̈ric, kueer ee tëëk në kuëër de pïïuwiic.

¹⁷ Acï rem de tɔŋ ril wat bïï ke lɔ riɔ̈ɔ̈k, rem de tɔŋ de abëël ku jöŋgöör. Acïk lööny piny ku cïkï röt be jɔt, acï ke kuɔɔth wei cï many de alath!

¹⁸ Ku aye Bɛ̈nydït lueel an, “Duökï röt ë duööt në ka cï röt looi thɛɛr, ku nɔn rëër wek në ka ɣɔn thɛɛr cï tuöl nïïm.

¹⁹ Wɔikï ka bä ke piac looi. Acïk röt guɔ looi, aduëër ë tïŋ ënɔɔnë! Yɛn bï kueer ee tëëk ë jɔ̈ɔ̈r yic looi, ku yiɛ̈n week nyïïn ke pïïu ëtɛ̈ɛ̈n.

²⁰ Ayï läi roor abïk A dhuëëŋ guöp, kɔ̈ɔ̈rgɔl ku wuut abïk A piɔɔny, të le Yɛn kiɛɛr tɔ wat ë jɔ̈ɔ̈r yic, ke ya gëm kɔckiën cä lɔc pïïu.

²¹ Ayek kɔc ë luɔɔi keek guöpdï, ku abïk diɛt leec kek ɛn ket.”

Awäny de Yithriɛl

²² Aye Bɛ̈nydït lueel an, “Ku wek aacï dak në Yɛn, Yithriɛl, yïn aacïï Yɛn ee lam.

²³ Yïn aacïï Yɛn ee yiɛ̈n amɛ̈l ke miɔ̈c ye nyop ëbɛ̈n, wek kën Ya dhuëëŋ guöp në miɔ̈c ye nɔ̈k. Wek kën jut gup bä miɔ̈c thiëëc tëde week nɔn ta we bäb në thiëc de wal ŋïr.

²⁴ Wek kën a ɣɔ̈c wal ŋïr, nɔn takï ya kueth në kɔɔl ke läikun. Në nyinden yic wek cï ya doony në awɛ̈ɛ̈c, we cï ya tɔ bäp në awɛ̈ɛ̈ckuön yak ke looi.

²⁵ Ku ŋuɔɔt, ke Ya ye Nhialic, ee we päl awɛ̈ɛ̈ckun, Yɛn ee kënë looi në biäk ee yen ɛn. Yɛn cïï awɛ̈ɛ̈ckun bï muk ka riääk ɛn week.

²⁶ “Lokku në lukic, bɛ̈ɛ̈iyë göönydu! Nyuɔɔthë göönydu, ke bïï ŋic nɔn de yïn nɔm yic!

²⁷ Kuarkuön ɣɔn thɛɛr acïk wäc, bänykun acïk ɛn luöi awäc,

²⁸ ku jɔ bänykun tëdiën ɣeric tɔ rac, yen ayiɛ̈n Ɛn riääk Yithriɛl, Yɛn cï kɔckï tɔ lɛ̈ɛ̈të.”