Yith 42 - JAM DE NHIALIC 2011

Awun de Bɛ̈nydït

¹ Aye Bɛ̈nydït lueel an, “Awundï kï, raan cä gäm riɛl raan cä lɔc, raan miɛt ɛn piɔ̈u wo yen, acä thiɔ̈ɔ̈ŋ në wëikï, ku abï löŋ ŋiëc guiëër juöör ëbɛ̈n.

² Acïï bï wou ku nɔn jɔt e röl nhial nɔn jiëëm kɔc në röldït në kuɛɛr yiic.

³ Acïï agun cï rɔt tiɔ̈ɔ̈t bï dhoŋ kɔ̈u ku nɔn liiu en many de alanh dɛ̈p ëmääth. Abï yic bï tɔ̈u athɛɛr yiɛ̈n kɔc apiɛth.

⁴ Acïï piɔ̈u bï bäp në aŋäth ku cïï bäp ë riëtëpiɔ̈u, abï yic looi ë pinynɔm. Piiny mec atitkï wëëtde aläl.”

⁵ Nhialic aa cak paannhial ku thieth keek piny, ku gëm piny ciɛɛŋ ku këriëëc ëbɛ̈n tɔ̈u thïn, ee pïïr ku wëi gäm kɔcke. Ku ënɔɔnë acïï Bɛ̈nydït Nhialic lɛ̈k awuutke.

⁶ “Yɛn Bɛ̈nydït wek cä cɔɔl ku gäm we piathëpiɔ̈u, ke bä tïŋ nɔn bïï ë yic looi në pinynɔm. Cakaa yïn we yɛn ë mac löŋ në kɔc kedhie, në kueerdu we yɛn we bï ɣɛɛr yiɛ̈n juöör.

⁷ Yïn bï kɔc cï cɔɔr liep nyïïn ku lony kɔc cï mac në ɣööt ke döm col yiic.

⁸ “Ee Yɛn Yatök, Yɛn aye Bɛ̈nydït Nhialicdun. Acïn yanh däŋ rɔm ɛn ke dhuëëŋ wo yen, Yɛn cïï lɛcdï duëër rɔm wo yiëth.

⁹ Ka ɣɔn cä ke caar acïk bɛ̈n ke ke ye yith. Ënɔɔnë wek bä ke lɛ̈k ka cï piac bɛ̈n, na cakaa kek ë ŋoot ke ke kën guɔ tuöl.”

Din ë Piɔ̈ny

¹⁰ Kɛ̈të Bɛ̈nydït din piac cak, kɛ̈tkï lɛcde, wek pinynɔm ëbɛ̈n! Lɛckï wek kɔc ee cath në wïïr, lɛckï wek ka cï cak në abäpdit yic! Kɛ̈tkï wek piiny mec, ku kɔc ëbɛ̈n rɛ̈ɛ̈r ëtɛ̈ɛ̈n!

¹¹ Takkï jɔ̈ɔ̈r ku pɛ̈ɛ̈nydïtke piɔny Nhialic, takkï bɛ̈i ke Kedar piɔny Yen! Takkï kɔc rɛ̈ɛ̈r në pänydïït de Thela moc kiɛɛu de miɛtëpiɔ̈u, në kur nïïm.

¹² Takkï kɔc rɛ̈ɛ̈r në piiny mec gëm lɛc ku dhuëëŋ Bɛ̈nydït!

¹³ Bɛ̈nydït ee lɔ biic ke lɔ piɔ̈t cït rem ë tɔŋ, acï rɔt guiir ke de piɔ̈u tɔŋ. Ee dhiën ë tɔŋ gam ku looi awuɔɔu de tɔŋ, ee riɛlde nyuöth kɔc ke aterde.

Nhialic Aloi Gutguut bïï Kɔcke Kony

¹⁴ Aye Nhialic lueel an, “Yɛn cï mim të bäär yic, Yɛn kën kë lueel kɔckï bɛ̈ɛ̈r. Ku ënɔɔnë kööl bï Yɛn këdäŋ looi acï bɛ̈n, guɔ jɔ dhiau cï tiiŋ rɔ̈p.

¹⁵ Yɛn bï kur kor ku kur dït riɔ̈ɔ̈k ku ta wal yuɔm kekë tiim. Yɛn bï wɛ̈k ke kiɛɛr tɔ ye jɔ̈ɔ̈r, ku ta awuul ke pïïu dëu.

¹⁶ “Yɛn bï cöörkï wat në kueer kën kek kɔn tëëk. Yɛn bï mɔ̈ɔ̈thden tɔ ye ɣɛɛr ku luɔi piny de yic ŋɔny ke lip në kenïïm. Kek gutguut cä lueel ka, ku abä ke muk ke ke cïï mär në yanɔm.

¹⁷ Raan ëbɛ̈n raan ee yath ŋɔ̈ɔ̈th, raan ee ka cï käär tɔ ee yath, abï ke kuɔɔr piny ku tɔ ke yäär gup.”

Kë Pën Yithriɛl Wëët

¹⁸ Aye Bɛ̈nydït lueel an, “Piëŋkï wek kɔc cï miŋ! Bä tiëŋkï tëthiɔ̈k, wek kɔc cï cɔɔr!

¹⁹ De raan cï cɔɔr awär awundï, ku nɔn ee raan cï miŋ wär tuny cä tooc? Eeŋa cï cɔɔr cït raandiën cï rɔ gam; ku nɔn cï cɔɔr cï awun de Bɛ̈nydït?

²⁰ Yithriɛl yïn cï kajuëc tïŋ, ku eeŋö yek lɛ̈k yïn? Yïn de yith yïn ke piŋ ku eeŋö cï piŋ ë yic?”

²¹ Bɛ̈nydït aa mit piɔ̈u ke piathëpiɔ̈nde, acï löŋde ku wëëtde tääu nhial, akɔɔr bïï ë kɔcke aa riëëu guöp.

²² Ku ënɔɔnë kɔcke acï ke peec ku rum keek, acï ke thiɔ̈ɔ̈k në pɔ̈l yiic, acï ke guöör ë ɣööt ke döm yiic. Acïï kuɛ̈l ku rum keek, ke cïn raan töŋ bï ke bɛ̈n luök.

²³ Eeŋa në we yiic raan duëër ee kënë piŋ? Gɔl ënɔɔnë ku lee tueŋ, bäk aa piŋ apiɛth?

²⁴ Eeŋa ë gëm kɔc ke Yithriɛl cuɛ̈ɛ̈r ee kɔc rum? Aa ye Bɛ̈nydït guöpde, raan cuk luöi awäc! Wok kën rëër në kueer köör wook bïï wok rëër ku rïïuku wëët cï gäm wook.

²⁵ Ago wook tɔ yök rac de agönhde ku gumku akuöörkuöör de tɔŋ. Go agönhde dëp cï mac në Yithriɛl yic ëbɛ̈n, ku wok kuc kë loi rɔt, acïn kë cïï wok wëët në ye yic taitai.