Yith 41 - JAM DE NHIALIC 2011

Nhialic Atɔ Yithriɛl Ŋäth

¹ Aye Nhialic lueel an, “Miɛmkï thook ku piɛŋkï Yɛn thok wek piiny mec! Guiɛɛrkï röt bäk göönydun lɛɛr në bäny ke luk nïïm, wek bï dɛk kaam bä wek jam. Bäk mɛtku wonïïm tëtök buk löŋ mac eeŋa de yic.

² “Eeŋa yen ë bïï raan bï kɔc bɛ̈n tiaam, të lɔ aköl amiäk, ku jɔ rɔt looi ke ye raan cï tiam në ɣään cïï yen ke lɔ thïn kedhie? Eeŋa tɔ ye tiam meliik ku juöör? Aye abätäude ke yuöp piny cït abuui. Aye dhɛ̈ŋke ke riäär piny cï wal gɔp ë yom.

³ Ee cath ke kuɛny cök, ke cï rɔt guiir apiɛth, ee rɔt baan ke cïï piny ee jak në ye cök!

⁴ Eeŋa ë loi ee kë cït tuölë? Eeŋa ë luel kueer ye kake ciɛɛŋ thɛɛr muk? Ee Yɛn Bɛ̈nydït, Yɛn ë tɔ̈u ëtɛ̈ɛ̈n të ɣɔn gɔlë käŋ ku Yɛn Bɛ̈nydït, Yɛn bï tɔ̈u ëtɛ̈ɛ̈n në thök de käŋ.

⁵ “Acï kɔc tɔ̈u në wɛ̈ɛ̈r thok tïŋ agokï riɔ̈ɔ̈c, ku päu kɔc ke piny thar ku lɛthë ë keek, gokï keyiic määt ku bïkkï.

⁶ Go atëët ke kony ku jɔkï kepiɔ̈ɔ̈th riit kapäc.

⁷ Go raan atën ee guaŋ lɛ̈k thɛ̈th an, ‘Acï ŋiëc looi!’ Ago raan wën ee yath deŋ abïï lip raan wën ee ye piäät në muthmɛɛr riit piɔ̈u. Ayek lueel an, ‘Acï looi apiɛth,’ ku jɔkï yath dɛɛr në yekɔ̈u ke piëëtkï në muthmɛɛr.

⁸ “Ku wek, Yithriɛl awuutkï, wek ee kɔckiën cä ke lɔc, kuat de Abraɣam raan mɛ̈ɛ̈th wok.

⁹ Wek kɔc cä ke bɛ̈ɛ̈i ë piny thar, wek aa caal ke në aguuk mec ke piny thar, ku lɛ̈k week, an, wek ee awuutkï. Wek kɛ̈n keek rɛɛc, wek cä ke lɔc.

¹⁰ Duökï riɔ̈c, Yɛn tɔ̈u wo week! Yɛn ee Nhialicdun, në cïn kë riääc wek! Wek bä ke tɔ ye kɔc ril ku kuɔny week, wek bä ke gël, ku kuɔny week.

¹¹ “Kɔc göth në week, abïk ayär de tiëm ŋic. Kɔc ee piɔ̈t në week abïk thou

¹² ku abïk liu në pinynɔm.

¹³ Yɛn ee Bɛ̈nydït Nhialicdun, wek bä tɔ ril, ku yɔ̈ɔ̈k week an, ‘Duökï bï riɔ̈ɔ̈c, wek bä ke kony.’”

¹⁴ Aye Bɛ̈nydït lueel an, “Cakaa nɔn koor yïn ku kɔ̈c wäkya, Yithriɛl, duökï riɔ̈ɔ̈c, wek bä ke kony, Yɛn Nhialic Ɣeric de Yithriɛl, Ee Yɛn ee kɔc kony.

¹⁵ We bä tɔ cït tim de käm de rap, tiim piɛth cï piac looi ku amoth. Wek bï kur kɔ̈ɔ̈m ku riäkkï keek, ku kur kor abïk kuɛɛm cït abuui.

¹⁶ Abäk ke wɛɛr ë yomic, abïï yom ke gap wei, ku jɔ amaŋdït ke riäär piny. Ëtɛ̈ɛ̈n wek bï piɔ̈ɔ̈th jɔ miɛt në biäk ee Yɛn Nhialicdun, wek bï Yɛn piɔɔny, yɛn Nhialic Ɣeric de Yithriɛl.

¹⁷ “Të le kɔckï pïïu lɔ kɔɔr, të cïï kek röt ril wei në rou, ke Yɛn Bɛ̈nydït, Yɛn bï lɔ̈ŋden piŋ, Yɛn Nhialic de Yithriɛl, Yɛn cïï kɔckï bï kɔn päl wei.

¹⁸ Yɛn bï kiɛɛr tɔ tëk në kɛm ke kur kor cïn ka ye cil thïn ku nyïïn ke pïïu tëk në wëk yiic. Yɛn bï jɔ̈ɔ̈r puk ke ye awuul ke pïïu ku pɔ̈k piny cï riɛl ke ye nyïïn ke pïïu.

¹⁹ Yɛn bï thidar tɔ cil në jɔ̈ɔ̈ric, ku tiim ke akacia ku rɛ̈t, ku tiim ke olip. Roor abï cil piny cïï wal ë cil thïn, roor de tiim ke enap ku tiim ke juniper ku tiim ke ameth.

²⁰ Kɔc abïk ee kënë tïŋ ku abïk ŋic nɔn ee Yɛn Bɛ̈nydït Yɛn aa loi yen. Abïk jɔ yökic, nɔn yen Nhialic Ɣeric de Yithriɛl, yen aa tɔ ye loi rɔt.”

Bɛ̈nydït agut Yiëth Alueth Nyïïn

²¹ Kë lueel ë Bɛ̈nydït, Nhialic de Yithriɛl kï. “Wek yiëth ke juöör, bɛ̈ɛ̈ikï göönydun. Bɛ̈ɛ̈ikï kë nyooth yicduön tɔ̈u ke week!

²² Bäkkï ee tënë ku caarkï kë bï tuöl, agoku ŋic nɔn bïï yen rɔt lɔ looi. Wëërkï kɔc ke luk ka cï röt kɔn looi ɣɔn thɛɛr, ku lɛ̈kkï wook eeŋö luelkï:

²³ Lɛ̈kkï wook eeŋö bï tuöl wadäŋ, ëtɛ̈ɛ̈n abuk jɔ ŋic nɔn aa wek yiëth! Loi këpiɛth, ku nɔn bɛ̈ɛ̈iyë riääk, thiäŋkï wook në riɔ̈ɔ̈c ku diɛɛr!

²⁴ Week, ku ka yak looi ëbɛ̈n ayek baŋ, kɔc ee we lam ee gök de kërac yen cïk looi!

²⁵ “Yɛn cï raan lɔc, raan rɛ̈ɛ̈r në biäk të lɔ aköl amiäk. Abä bɛ̈ɛ̈i bïï kɔc mak në biäk të lɔ rut. Abï bäny dum yiic cït kë nuai tiɔ̈k, abï ciët raan ee töny cuëëc dum tiɔp piny.

²⁶ Eeŋa cï ye caar në week yiic nɔn duëër ee kënë rɔt looi, agoku jɔ ŋic nɔn luɛɛl wek yic? Acïn raan töŋ në weyiic cï wɛ̈t lueel në biäkde, acïn raan cï kë luɛlkï piŋ!

²⁷ Ee Yɛn Bɛ̈nydït, Yɛn ë kɔn Dhiɔn lɛ̈k wëlpiɛth, Yɛn cï tuuc tuɔɔc Jeruthalem bïï lɔ lueel an, ‘Kɔcku abïkï! Abïk baai!’

²⁸ Na wën aa tiëŋ yiëth yiic, ke cïn raan töŋ ee kɔc riit piɔ̈ɔ̈th, acïn raan töŋ puk thiëcdï nɔm.

²⁹ Kek ee yiëthkë kedhie acïnkï naamden, acïn kë duëërkï looi taitai, kek ee yiëthkë akɔ̈ckï ku acïnkï riɛl.”