Yith 40 - JAM DE NHIALIC 2011

Wël ke Aŋäth

¹ Aye Bɛ̈nydït lueel an, “Dut kɔckï piɔ̈ɔ̈th, dut ke piɔ̈ɔ̈th!”

² Rit kɔc ke Jeruthalem piɔ̈ɔ̈th. lɛ̈kë keek nɔn cïï kek gum arëët të cï bɛ̈ɛ̈r, ku keek ënɔɔnë acï ke päl awɛ̈ɛ̈cken, acä ke luöi këtuc acïn kë cä päl keek në awɛ̈ɛ̈cken yiic kedhie.”

³ Röl adhiau an, “Guiɛɛrkï kueer de Bɛ̈nydït në jɔ̈ɔ̈ric, Napkï kueer de Nhialicda në jɔ̈ɔ̈ric!

⁴ Thiäŋkï wɛ̈k yiic ëbɛ̈n, kiëëtkï kur nïïm ëbɛ̈n, kur kor abïk aa riaaŋ, ku piny de ŋɔny abïï tɔ lip.

⁵ Ku dhuëëŋ de Bɛ̈nydït abïï nyuɔɔth, ku abïï mɛnh ë raan tïŋ ëbɛ̈n. Ku Bɛ̈nydït guöpde acï lueel.”

⁶ Röl adhiau an, “Luel jam!” Guɔ lop an, “Ee jamou yen bä lueel?” “Luel an mɛnh ë raan ëbɛ̈n acït wal, pïïrden acït gaak ye wal moc.

⁷ Wal ayek biɔɔr ku löny gaak, të cïï Bɛ̈nydït yom put tuöc keek. Kɔc acïkï ee gum aläl acïtkï wal.

⁸ Ɣɛɛ, wal ayek biɔɔr ku löny gaak, ku wël ke Nhialicda ayek tɔ̈u aɣet athɛɛr.”

⁹ Dhiɔn, lɔ nhial në kuur bäär nɔm ku luel wëlpiɛth! Dhiɔn, cɔ̈t në röl dït, caalë wëlpiɛth! Luel këriëëc ku du riɔ̈c, lɛ̈kë wuöt ke Juda, nɔn bïï ë Nhialicden!

¹⁰ Bɛ̈nydït Awärjäŋ abɔ̈ bïï bɛ̈n cieŋ në riɛl, abɔ̈ ke kɔckɛn cï keek kony, ku athiɛɛidɛn cï gäm keek.

¹¹ Ee lunyde tiit, cï raan ee thök tiit, abï amɛ̈lke määt yiic, 2 ku boom keek në ye kök ku abï märken wat apiɛth.

Nhialic de Yithriɛl Cïn Kë Thööŋ Kek

¹² De raan duëër dït de abäpdit yic them në yeciin, ku nɔn them en paannhial në yeciin? De raan duëër tiɔɔm de piny nɔm muk në abïny ku nɔn them thiɛk de kuur në kë ye thëm?

¹³ De raan duëër Wëi ke Bɛ̈nydït lɛ̈k kë bïï looi? Eeŋa duëër ye wɛ̈ɛ̈t ku nɔn bïï riit piɔ̈u?

¹⁴ Eeŋa ye Nhialic thiëëc në kë bïï ŋic ku bïï yökic, ku bïï wëët në të ye käŋ luɔi thïn?

¹⁵ Tëde Bɛ̈nydït juöör acïnkï naamden, acïtkï nyin ë pïïu ee thuat, tur mec apiɔlkï cï abuui.

¹⁶ Läi tɔ̈u në roor de Lebanɔn yic ëbɛ̈n acïkï miɔc ye nɔ̈k Nhialicda lëu, ku tiimke alikï, ka cïk mac lëu në dëëp.

¹⁷ Juöör ke piny nɔm acïnkï naamden taitai tëde yen.

¹⁸ Ku eeŋa duëërë thɔ̈ŋ Nhialic? Duëërë täu de Nhialic kiëët adï?

¹⁹ Acïï cït yath ye raan ee thäth looi, kë ye thɛ̈th kum kɔ̈u në adhääp ku jɔ dam piny në kuɛɛt ke ateek.

²⁰ Raan wën cïï ɣööc de ateek ku adhääp lëu, ee rɔt löc tim cïï bï dhiap. Ee rɔt kɔɔr atën piɛth ee guaŋ bïï ye guɛ̈ŋ kë ye tïŋ ke cï bï wïïk.

²¹ Cïï ŋic? Kënë kɔn lɛ̈k ɣɔn thɛɛr? Kɛ̈në piŋ piny nɔm ë gɔl rɔt adï?

²² Aa looi ë raan cï nyuc në thööcde nɔm nhial në piny nɔm ku tënhial kɔ̈u, kɔc ayek ciët amujuŋ të woi yen keek piny, go tënhial thieth cï lupɔ, ku cït paany të ceŋ.

²³ Go bäny ril ëtör bɛ̈ɛ̈i piny ku jɔ ke cïn naamden.

²⁴ Acïtkï wal ë piac cil, cï tääu piny tei ke meiken ë ke tiëc biic. Të tooc ë Bɛ̈nydït yom, ayek guɔ riɛl, ku gɔp yom ke wei cït yäär.

²⁵ Duëërë Nhialic ɣeric jɔ thiɔ̈ŋ ŋö? De raan däŋ cït En.

²⁶ Tïŋ tënhial! Eeŋa cak kuɛl ye tïŋ? Raan ee keek wët bei cït rem de tɔŋ, aŋic yek dï ëtɛ̈ɛ̈n ku aye ke cɔɔl ëtök, tök në rin! Riɛlde adït arëët, acïn töŋ liu në ke yiic!

²⁷ Yïn Yithriɛl, eeŋö ee yïn gööny an kuc Bɛ̈nydït nuandun ku cie diɛɛr të guöm wek në kuöc ciɛɛŋ?

²⁸ Cïï ŋic? Kɛ̈në piŋ? Bɛ̈nydït ee Nhialic tɔ̈u athɛɛr, ee yen aa cak ë piny thar ëbɛ̈n. Acie dak ku acie bäp. Acïn raan ee täŋde yökic.

²⁹ Ee kɔc kɔ̈c ku cïk dak tɔ ril.

³⁰ Ayï dhuök ayek kɔ̈c, kɔc dhuök aduëërkï wïïk në bäp.

³¹ Ku kɔc ee kuɔɔny ŋɔ̈ɔ̈th tëde Bɛ̈nydït abïk riɛlden yök ke cï ŋuak nyin. Abïk röt bɛ jat nhial në kewuök cï cor, abïk aa kat ku cïkï däk, abïk aa cath ku cïkï bäp.