Yith 4 - JAM DE NHIALIC 2011

¹ Të le köölë bɛ̈n, diäär kadhorou abïk mony tök dɔm ku lëkkï yen an, “Wok duëër röt cääm ku yök wo kɔ̈ɔ̈th ɣɔ̈ɔ̈c wapäc, ku yïn limku buk aa lueel an yïn ee monyda, në luɔi cïï wok ayär kën ë wo thiaak bï guum.”

Jeruthalem Apukë Nɔm Athiɛɛide

² Ade kööl bɔ̈, kööl bï Bɛ̈nydït tiim ee luɔk ë mïth piath ëbɛ̈n piny thiɔ̈ɔ̈ŋ tëdïït lääu, ku bïk yïth piath. Kɔc ke Yithriɛl cï döŋ apïr kedhie, abïk piɔ̈ɔ̈th miɛt ku yek kepiɔ̈ɔ̈th biɔ̈ɔ̈k në kɔ̈thiic kɔ̈th cï luɔk pinyden.

³ Raan ëbɛ̈n raan cï nyääŋ Dhiɔn, ku cï döŋ Jeruthalem, kɔc cï Nhialic tɔ döŋ ke ke pïïr, abï ke aa cɔɔl an, “Kɔc ɣeriic.

⁴ Ku në riɛlde Bɛ̈nydït abï löŋ guiir, ku jɔ jur tɔ ɣeric ku wɛɛk awäny de Dhiɔn wei, ku lɔ rim ɣɔn cï lɛ̈u piny ë Jeruthalem.

⁵ Ku në kuur ë Dhiɔn nɔm, ku kɔc cï kenïïm määt ëtɛ̈ɛ̈n, Bɛ̈nydït abï ke tuöc luät aköl ku tol kekë biöl ë mac wakɔ̈u. Dhuëëŋ de Nhialic abï wut kuöm piny ëbɛ̈n ku gël.

⁶ Dhuëëŋde abï pänydït aa gël në tuöc ë piny aköl, ku tɔ ye tëde thiaan, bï yen gël në deŋ kekë amaŋ.