Yith 39 - JAM DE NHIALIC 2011

Kɔc ë Tooc në Babilonia

¹ Në ee kaamë yic, melik de Babilonia, Merodak Baladan wën ë Baladan, ɣɔn cï yen Ɣedhekia piŋ nɔn de yen guöp juäi ku ë guöp pial, acï Ɣedhekia bɛ̈n tuöc awerek ku miɔ̈c.

² Go Ɣedhekia kɔc ë tuucë loor nïïm ku nyuth keek kuɛthde ëbɛ̈n, atek ku adhɛ̈p, ku kak ee luɔk ëbɛ̈n, ku wal ŋïr ke tɔc, ku lɔ wëu ke tɔŋ ëbɛ̈n. Acïn të cï döŋ në ɣööt ye käŋ tɔ̈ɔ̈u thïn ku piny ëbɛ̈n, kë kën nyuöth keek në ciɛɛŋ mɛc ë Ɣedhekia ëbɛ̈n.

³ Na wën ke tiët ë Nhialic Yithaya lɔ tëde melik Ɣedhekia, ku lop an, “Ë ke bɔ̈ tënou ku eeŋö cïk lueel?” Go ë Ɣedhekia bɛ̈ɛ̈r an, “Aake bɔ̈ piny mec, në Babilonia.

⁴ “Eeŋö cïk tïŋ ɣöndït ë bɛ̈ny?” Go ë Ɣedhekia bɛ̈ɛ̈r an, “Acïk këriëëc ëbɛ̈n tïŋ. Acïn të cï döŋ në ɣööt ye käŋ tɔ̈ɔ̈u thïn ke kɛ̈n nyuöth keek.”

⁵ Na wën ke Yithaya ë yöök melik Ɣedhekia an, “Aye Bɛ̈nydït de rɛm lueel an,

⁶ kööl abɔ̈ kööl bïï ë këriëëc ëbɛ̈n jɔt baaidu, këriëëc ɣɔn cïï kuarkun ke tɔ̈ɔ̈u aɣet cï ee köölë abïï ke jɔt, abïï ke lɛɛr Babilonia. Acïn kë bï döŋ.

⁷ Mïth ke mïthkuön kɔ̈k abïï ke lɛɛr ë pɛ̈cic. Abïk lɔ luui ke ke ye rooc baai de melik de Babilonia.”

⁸ Aa ye melik Ɣedhekia tak nɔn bï yen dɛ rëër adïu ku mät në kaam pïïr en, go Yithaya yɔ̈ɔ̈k an, “Jam de Bɛ̈nydït cï lueelë apiɛth.”