Yith 38 - JAM DE NHIALIC 2011

Juän de Melik Ɣedhekia ku Waarde

¹ Në ë kaamë yic melik Ɣedhekia aacï ë jɔk dɔm ku aacï thiɔ̈k ke thuɔɔu, go tiët ë Nhialic Yithaya wën Amodh yen lɔ tïŋ ku lɛ̈k ɛn an, “Alëk ë Bɛ̈nydït yïn an coc kaku ëbɛ̈n jɔŋ nu ë yïguöp acï bï thök, abï yï nɔ̈k.”

² Go Ɣedhekia yenyin guöt piny në päny kɔ̈u ku lɛ̈ŋ an,

³ “Tak Yïnɔm Bɛ̈nydït në luɔi ë yan ye them anandï bä aa raan adöt ku bä aa raan ee këde piɔ̈ndu looi.” Ku jɔ Ɣedhekia dhiau arëët.

⁴ Na wën ke Bɛ̈nydït ë yɔ̈ɔ̈k Yithaya

⁵ bïï yenɔm pɔ̈k tëde Ɣedhekia, ku lɛ̈k yen an, “Kë lueel Bɛ̈nydït Nhialic de kuaar Debid kï: Yɛn ë lɔ̈ŋdu piŋ ku tiëŋ pïïu ke yïn nyin. Yïn bä ŋuak në run kathiëër ku dhïc kɔ̈k bï yïn ke bɛ pïïr.

⁶ Ku yïn bä kony wek ee pänydïït ë Jeruthalem në melik de Athiriya, ku gɛ̈l pänydït.”

⁷ Go Yithaya bɛ̈ɛ̈r an, “Bɛ̈nydït abï yï nyuöth kïn bï ye nyuɔɔth nɔn cï Yen Enɔm bï waar në thöndɛn cï lueel.

⁸ Në kë ye kɔc tëëk ë yenɔm ɣɔn yïk ë melik Aɣadh, Bɛ̈nydït abï atiëp tɔ cot rɔt ciëën në akɛɛth kathiëër.” Go atiëp rɔt pɔ̈k ciëën në akɛɛth kathiëër.

⁹ Na wën aacï melik Ɣedhekia guöp waar në juände, go din ë piɔ̈nyë gɔ̈ɔ̈r:

¹⁰ an, “Aa ya cät an aköölkiën ke miɛtëpiɔ̈uwë. Yɛn bï lɔ paan ë thuɔɔu runkiën kɔ̈k ke pïïr abï ke tɛɛm wei.

¹¹ Aa ya cät an në ee piny de kɔc pïïrë yɛn cïï Bɛ̈nydït bï bɛ tïŋ nyin ku nɔn ee raan däŋ pïïr.

¹² Pïïrdï acï teem kɔ̈u tɔ thök, cït man ë paany cï lɛɛr piny, cït man ë lupɔ cï tɛɛm thok wei. Aa ya cät nɔn tɔ Nhialic pïïrdï thök.

¹³ Wakɔ̈u ëbɛ̈n yɛn ee dhiau në arɛɛm, acït kë de köör dhuuŋ yomkï. Aa cät nɔn tɔ Nhialic pïïrdï thök

¹⁴ Yɛn ë röl kuur ku acïï be ë piŋ, ka yɛn aa dhiau cït guuk. Yɛn ë nyin ŋoot në luɔi wɔi yɛn paannhial. Bɛ̈nydït acï a luäk në nuanë yic ëbɛ̈n.

¹⁵ Eeŋö duɛ̈ɛ̈r lueel? Ee Bɛ̈nydït Yen ë loi ee kënë. Yɛn tuc piɔ̈u, ku yɛn cie niin.

¹⁶ Bɛ̈nydït yɛn bï pïïr në wëlku, wëlku kapäc, tɔ ya waar guöp, ku tɔ ya pïïr.

¹⁷ Tuöcëpiɔ̈ndï abï rɔt puk ke ee mät. Yïn ë ya luök wëi në karɛc yiic ëbɛ̈n Yïn cï ya päl awänydï ëbɛ̈n.

¹⁸ Acïn raan duëër Yï leec paan ë thuɔɔu, kɔc cï thou acïkï piɔ̈nduön adöt duëër ŋɔ̈ɔ̈th.

¹⁹ Ee kɔc pïïr kek aye yïn leec, cït man lɛɛc ɛn Yïn ënɔɔnë. Wärken ke mïth ku märken ke mïth, ayek mïthken lɛ̈k piɔ̈nduön adöt.

²⁰ Bɛ̈nydït yïn ë ya tɔ piɔl guöp. Wok bï thom gut, ku kitku diɛt ke piɔ̈ny, wo bï diɛt kiit ɣöndu, në aköölnyïïn ëbɛ̈n të pïïr wok.

²¹ Acï Yithaya lɛ̈k melik bï miök ë loi në enap tac në ɣäänkɛn cï toŋ nyïïn ku abï guöp waar.

²² Go melik Ɣedhekia tiët luɔp an, “Ee kïn ŋö bï ye nyuɔɔth nɔn bän lɔ Luaŋdït lëu?”