Yith 34 - JAM DE NHIALIC 2011

Nhialic abï Kɔc ke Aterde Luöi Këtuc

¹ Bäkkï, kɔc ke juöör ëbɛ̈n! Matkï wenïïm ku piëŋkï. Takï piny nɔm ëbɛ̈n kekë këriëëc nu thïn bɔ̈ ee tënë ku pïŋ.

² Bɛ̈nydït agöth kekë juöör kedhie, ku rɛmkɛn ke tɔŋ ëbɛ̈n. Acï ke tɔ ye kɔc bïï nɔ̈k.

³ Gupken acï ke bï tɔ̈ɔ̈u, abïk dhɔt piny ke ke cï nhiany ku thiäŋkï piny në aŋuäc, ku kur abïk nïïm aa thiir ëbɛ̈n ë riɛm.

⁴ Akɔ̈l ku pɛɛi ku kuɛl abïk kuɛɛm abïk röt looi ke ke ye abuui. Tënhial abï määr abï ciët biöŋ cï dolic, ku löny kuɛl cï yïth ke tiim ke ŋaap ku nɔn ee enap.

⁵ Bɛ̈nydït acï abätäude kiëët paannhial, ku ënɔɔnë abï Edom yup, kɔc cï ke tɔ ye kɔc bï riɔ̈ɔ̈k.

⁶ Abätäude abï kɔ̈u thiäŋ në riɛmden ku kɔlden, cït man de riɛm ku kɔl de amɛ̈l ku bɔɔth ke miɔ̈c näk. Bɛ̈nydït abï ee miɔ̈cë gam ë pänydït de Bothera yic, abï ë nääkdïïtë looi piny de Edom.

⁷ Kɔc abïk aa wïïk cï ɣɔ̈k roor ku miöör kor, ku piny abï aa thiir ke riɛm thiäŋ ke kɔl.

⁸ Yen kööl bïï Bɛ̈nydït Dhiɔn luök ka, ku guur në kɔc de ater ke yen.

⁹ Kiɛɛr ke Edom abïk röt puk ke ke ye anyam col, ku piny abï dëp ë many de thulpur. Ku baai ëbɛ̈n abï dëp cït anyam col.

¹⁰ Abï dëp aköl ku wakɔ̈u, ku tol abï bɛ̈n bei thïn aɣet athɛɛr. Piny abï tɔ̈u ke cïn kë loi thïn në run juëc, ku acïn raan bï bɛ keny thïn.

¹¹ Agumuut ku gɛk abïk piny lɔ̈ɔ̈k lak. Ee piny bï Bɛ̈nydït bɛ nyɔk ë riäk, ka bï ciët të ɣɔn kën ë piny cak.

¹² Abï ciën rin ke ciɛɛŋ ëtɛ̈ɛ̈n, ku wɛ̈ɛ̈t meliikke abïk ciëm naamden.

¹³ Kuɔɔth ku thil, acïn të cïï kek bï cil thïn piny ayï kɛ̈l ke wuöt yiic, ku kɔ̈ɔ̈rgɔl ku agumuut abïk ceŋ thïn.

¹⁴ Läi roor abïk aa yök ë aŋuööth ëtɛ̈ɛ̈n, ku jɔɔk rac abïk röt aa cɔɔl. Acɔ̈ɔ̈k ke cuɔlëpiny abïk bɛ̈n ëtɛ̈ɛ̈n, ke ke kɔɔr të bï kek lɔ̈ŋ.

¹⁵ Agumuut abïk röt yiɛ̈k ɣööt, ku dhiëthkï toŋ ku kuemkï keek ku titkï keek ëtɛ̈ɛ̈n. Ku cor abïk kenïïm mat ëtɛ̈ɛ̈n, kënë abï aa bɛ̈n ee kënë cök.

¹⁶ Kaarkï awerek de Bɛ̈nydït yic në biäk de ka pïïr, ku kuɛnkï kë cï lueel. Acïn töŋ de kë cï cak bï liu thïn, ku acïn kë bï nɔm ciɛ̈n kë ye kek rou. Acï Nhialic ke yɔ̈ɔ̈k bïk tɔ̈u aya. Yen guöpde abïï ke mat nïïm tëtök.

¹⁷ Ee Bɛ̈nydït Yen abï ke tɛ̈k piny, ku ee raan gäm këde. Abïk piny cieŋ ë run juëc, ku abï aa këden aɣet athɛɛr.