Yith 33 - JAM DE NHIALIC 2011

Lɔ̈ŋ de Kuɔɔny

¹ Amawoou në kɔc ke aterda! Wek ee käŋ riɔ̈ɔ̈k ku wek kënë ë riɔ̈ɔ̈k, wek ee käŋ rum ku wek kënë ë rum. Ku aköölkuön ke rum de käŋ ku riäk de käŋ abï thök, ku keek gupken abïï keek bɛ rum ku riäk keek.

² Bɛ̈nydït kokëpiɔ̈u we wook, ee cï aŋäthda tääu në yïguöp. Ye we gël akööl yiic ëbɛ̈n ku kony wook në akööl ke nuan.

³ Të biök Yïn tɔŋ në nyinda yic, juöör ayek kat në awuɔɔu de tɔŋ.

⁴ Kaken abïï keek nööm ëbɛ̈n, ku jɔt keek ke ke ye ka cï peec, cït man ye kɔyɔm dom tɔ̈c ayï dɔm de mïth ke tiim mak ëbɛ̈n.

⁵ Eeŋö jɔ Bɛ̈nydït dït Aya! Amac këriëëc ëbɛ̈n. Abï Jeruthalem thiɔ̈ɔ̈ŋic në piathëpiɔ̈u ku yic

⁶ ku gämë jur rëër adïu. Ee kɔcke gël anandu ku gëm keek pɛlënɔm ku ŋïnydekäŋ. Ku riëëu bï kek Bɛ̈nydït riëëu yen aye wëukɛn juëc.

⁷ Kɔc ril ke tɔŋ adhiëëukï kuɔɔny. Kɔc cï tuɔɔc an lek mät looi adhiaukï në dhiën rac.

⁸ Kuɛɛr acï ke pɔ̈l, acïn raan ee bɛ cath thïn. Amɛɛt acï ke riɔ̈ɔ̈k ku dhoŋ löŋ cï mac kɔ̈u. Acïn raan be ë riëëu guöp.

⁹ Piny adhɔt ke cïn kë loi thïn, ku acï pɔ̈l. Ruɔɔr ke Lebanɔn acïk biɔɔr, wak ë Caron ee ŋiëc luɔk acï aa jɔ̈ɔ̈r, ku tiim ke Bacan ku Kuur ë Karmel alöönykï yïth piny.

Bɛ̈nydït Ajäny Kɔc ke Aterde

¹⁰ Aye Bɛ̈nydït lɛ̈k juöör an, “Yɛn bï rɔt jɔt ku luööi. Ku nyuɔɔth riɛldiën lëu En këriëëc.

¹¹ Wek ee kiɛɛr cïn thaarde looi, ku wek näk röt wapäc. Wëikï acïtkï many bï we riɔ̈ɔ̈k.

¹² Wek bï kuɛɛm cït kuur cï nyop ë mac, ku ciëtkï kuɔɔth cï nyop ë mac abïk aa ŋeth.

¹³ Takï raan mec ku raan thiɔ̈k ëbɛ̈n piŋ kë cä looi, ku takï ŋic riɛldï.”

¹⁴ Kɔc ke Dhiɔn ee karɛc looi alɛth ë riɔ̈ɔ̈c keek. Ayek lueel an, “Guiëër de löŋ de Nhialic acït many dɛ̈p aɣet athɛɛr. Duëër dɛ raan bï poth në many cït ee kënë?”

¹⁵ Wek duëër pïïr të ya wek yic lueel ku luɔikï. Duökï riɛldun tɔ ye kë math wek kɔc kuanynyïïn ku duökï kumthok ee nööm. Duökï ee mat në kɔc loi kiɛɛr de nääk de raan, ku nɔn loikï karɛc kɔ̈k.

¹⁶ Ëtɛ̈ɛ̈n we bï kony, ka we bï ciët ka nu të cï gël. We bï nïïm dɛ këcam camkï ku pïïu dɛkï.

Dhuëëŋ de Wadäŋ

¹⁷ Wek aya wek bï melik tïŋ ke cï kuɛth ku mɛc piny dïït lääuwic në tuŋ ëbɛ̈n.

¹⁸ Ku wek bï aköölkë riɔ̈ɔ̈c aa tak, ku kɔc athölbö kut, ku kɔc ee kɔc tuöm.

¹⁹ Wek cïï alɛi aman de gup lɛc bï bɛ tïŋ, kɔc ee jam ë thook mɛɛn, thook cäkkï keek ee yök yiic.

²⁰ Tiëŋkï Dhiɔn, pänydïït ye wok dhuëëŋ de Nhialic looi thïn. Tiëŋkï Jeruthalem! Abï aa tëde mät lɔ yic läŋ, bïï ë kɔc rɛ̈ɛ̈r thïn! Abï ciët paany cie bɛ wuuk tëde, ku cïï lɔ̈cke ee bɛ dhöth ananden ku cïï wïïnke ee tuɛny ananden.

²¹ Bɛ̈nydït abï wo nyuöth dhuëëŋde. Wok bï rëër në kiɛɛrdït ku nyïïn ke pïïu dït thook, ku abëël wïïr ke kɔc ke ater acïkï bï aa tem thïn.

^22-23 Tɔŋdɛn biökkï në abëël wïïrken yiic acïnkï thaarden, acïn raan bï jam ë gɛ̈ɛ̈r luɛɛl! Wo bï kajuëc ke rem de tɔŋ de ater tɛ̈k röt, ku abïk juëc aläl ayï ŋɔl abïï tɛ̈k. Bɛ̈nydït guöp yen abï aa meliŋda, abï we mac ë Yen ku gël wook.

²⁴ Në kɔc rɛ̈ɛ̈r pinyda yic, acïn raan bï bɛ dok an de guöp juäi, ku karɛc ëbɛ̈n abïï ke pɔ̈l.