Yith 32 - JAM DE NHIALIC 2011

Melik Piɛthpiɔ̈u

¹ Në akööl bï bɛ̈n ade melik bï bääny muk në piathëpiɔ̈u, ku bäny ke baai abïk baai mac në yic.

² Raan ëbɛ̈n ë keyiic abï ciët gëlgël ë yom ku cït tëde thiaan në amaŋ. Abïk ciët awɛɛŋ ke pïïu wat ë jɔ̈ɔ̈ric, ku cïtkï atïm liir ë kuur dït nu piny tuc cie luɔk.

³ Abïk kenyïïn liep ku woikï kë kɔɔr ë kɔcken.

⁴ Abïk käŋ aa looi ka cïk yök yiic në wëët, ku abïk käŋ aa looi në ŋïnydekäŋ ku abïk yek lueel aa looi.

⁵ Acïn raan bï raan piɔlpiɔ̈u bɛ aa riëëu ayï raan ee kɔc wëŋ.

⁶ Raan piɔlpiɔ̈u aye guɔ ŋic në jamdɛn ë pialëpiɔ̈u ku täŋ rɛɛc kɔɔr bïï looi. Kë ye looi ku kë lueel ayek awäc tëde Bɛ̈nydït, ku acïï raan nɛ̈k cɔk duëër kɔn gäm këciɛm ku cïï raan nɛ̈k rou tɔ dëk.

⁷ Raan dhɔ̈n arac ku karɛc looi, ee kɔc kuanynyïïn nɔ̈k në tör ë lueth, ku cïï ke tɔ yök yicden në gööny yic.

⁸ Ku raan piɛth ee luui apiɛth ku kɔ̈ɔ̈c aril në yicic.

Guiëër de Löŋ ku Kimpiny de Käŋ

⁹ Wek diäär cïn kë dhal week, kɔc cïï diɛɛr, piɛŋkï kë luɛɛl.

¹⁰ Wek bï dɛ ka kueth week ënɔɔnë, ku na lë ruöön wälë, wek bï nuan në luɔi bä wek nïïm ciën mïth ke tiim cï luɔk bäk tet.

¹¹ Wek aa cïn kë dhäl tëde week, ku cäkkï ee diɛɛr, ku ënɔɔnë takï röt lɛthë në riɔ̈ɔ̈c! Yɔ̈ɔ̈tkï lupɔɔ bei ë wekɔ̈ɔ̈th, ku duötkï we yiic anuɛɛr.

¹² Duökï wenïïm në wecin në dhiën ë piɔ̈u, në luɔi cïï duum ke rap ku duum ke tiim ŋic luɔk riɔ̈ɔ̈k,

¹³ ku kuɔɔth ku thil acïk cil piny de kɔckï. Dhiëëukï ɣööt ɣɔn mit ë kɔc piɔ̈ɔ̈th thïn, ku pänydïït piɛth ɣɔn thiäŋ yic ke pïïr.

¹⁴ Acakaa ɣöndït abï nyääŋ piny, ku pänydït abï yic ciɛ̈n raan taitai. Ɣööt ku ɣään cï gël abïk nu në riääkic aɣet athɛɛr. Mul roor abïk aa cath ëtɛ̈ɛ̈n, ku thök abïk aa nyuäth ëtɛ̈ɛ̈n.

¹⁵ Ku Nhialic abï wëike bɛ tuööc. Ago jɔ̈ɔ̈r ɣɔn cï riääk luɔk bɛ nyɔk, ku lok duum në rɛɛp juëc, ku jɔ duum ee luɔk aa roor dït.

¹⁶ Ago yic jɔ aa looi ë jɔ̈ɔ̈ric, ku tɔ̈u piathëpiɔ̈u në duum ee luɔk yiic.

¹⁷ Kë bïï ë piathëpiɔ̈u looi ee mät, ku kë bïï yök në piathëpiɔ̈uwic ee rëër adiu ku aŋäth ɣet athɛɛr.

¹⁸ Kɔc ke Nhialic acïn kë bï kek aa diɛɛr, ku ɣöötken abïk rëër ë mätic ku cïn kë jak keek.

¹⁹ (Ku deŋ kɔɔi abï lööny piny rooric, ku pänydït abï tiɛɛr nɔm piny.)

²⁰ Ee miɛtëpiɔ̈u cït ŋö bï tɔ̈u ke raan ëbɛ̈n në biäk de pïïu juëc bï kɔ̈th tɔ lok, ku wal bï piny thiɔ̈ŋ ëbɛ̈n në biäk de mul ku ɣɔ̈k.