Yith 31 - JAM DE NHIALIC 2011

Nhialic abï Jeruthalem Gël

¹ Amawoou në kɔc ee lɔ Rip lek kuɔɔny kɔɔr! Ayek rem dïït ë tɔŋ de Rip, ku jöŋgöör, ku abëël tɔŋ ŋɔ̈ɔ̈th. Ku acïkï Bɛ̈nydït ee ŋɔ̈ɔ̈th, Nhialic Ɣeric de Yithriɛl, ku cïkï kuɔɔny thiëc tëde yen.

² Aŋic kë looi! Ee riääk tuöc kɔc. Ee këdɛn cï lueel looi, bï yen kɔc ee karɛc looi luöi këtuc ayï kɔc ee keek kony.

³ Kɔc ke Rip acïkï ee yiëth, ayek kɔc tei. Ku jöŋgöörken acïnkï riɛl bɔ̈ nhial. Të le Bɛ̈nydït lɔ lui, ke jur ril abï kuɛɛm, ku jur kɔ̈c ye kony abï wïïk. Keek kedhie abï keek riɔ̈ɔ̈k.

⁴ Go ë Bɛ̈nydït lɛ̈k ɛn an, “Të cuetë köör thɔ̈k, ku nɔn yen adur ë köör, acï awuɔɔu rël ë tïït ee bɛ̈ɛ̈r, ee lɔ ke cäm ë cämde. Yen acït luɔi bï Bɛ̈nydït de rɛm kuur de Dhiɔn bɛ̈n gël. Acïï bïï riääc abï kat.

⁵ Bɛ̈nydït de rɛm abï göör ë Jeruthalem nɔm ke gël cït man ye dit göör ë mïthke kɔ̈ɔ̈th ke ke gël.”

⁶ Go Bɛ̈nydït lueel an, “Kɔc ke Yithriɛl, wek cï ya luöi awäc ku rɛɛckï Yɛn. Ku ënɔɔnë, bäkkï ciëën tëde yɛn!

⁷ Ade kööl bï bɛ̈n, kööl bï raan ëbɛ̈n ë we yiic yanhdɛn rɛɛc cï looi në atek ku adhɛ̈p cuat wei.

⁸ Athiriya Abï riɔ̈ɔ̈k tɔŋ, ku acie riɛl mɛnh ë raan. Kɔc ke Athiriya abïk kat në tɔŋ, ku dhuökken abïï ke tɔ ee lïïm.

⁹ Melikden abï kat në riɔ̈ɔ̈c dït, ku bänykɛn ke tɔŋ abïk riɔ̈ɔ̈c arëët, ka abïk beerdɛn ë tɔŋ nyääŋ piny.” Acïï Bɛ̈nydït lueel, Bɛ̈nydït ye lam në Jeruthalem, ku ye manydɛn de miɔ̈c näk dëp ë Dhiɔn.