Yith 3 - JAM DE NHIALIC 2011

Anuɔɔn ë Jeruthalem

¹ Ënɔɔnë Bɛ̈nydït de rɛm, akɔɔr bïï këriëëc nyaai ëbɛ̈n në Jeruthalem ku Juda, raan ëbɛ̈n ku kak ee kɔc kony. Abï kacaamken ku pïïuken nyaai,

² ku remdɛn ë tɔŋ, ku jöŋgöörken, ku bänykɛn ke luk ku tïtkɛn ke Nhialic, ku tït ee käŋ caar ayï nööŋken,

³ ku bänykɛn ke rem de tɔŋ ku bäny ke baai, ku kɔc ee kɔc riit piɔ̈ɔ̈th, ku raan de nɔm yanh ril ee riääk pɛ̈n bɛ̈n.

⁴ Bɛ̈nydït abï wɛ̈ɛ̈t kor tɔ ee bänyken, ku tɔ mïth thiiakäŋ nu kenïïm.

⁵ Kɔc abïk röt yɔŋ, dhuök acïkï kɔcdïtken bï riëëu, ku cïï kɔc cïn naamden acïkï adhuëëŋken bï riëëu.

⁶ Ade kööl bï bɛ̈n, akööl bï kɔc ke dhiën raan töŋden lɔc ku lëkkï yen an, “Ee yïn ade lupɔduön ceŋ, ku yïn jɔ guɔ aa bɛ̈nyda në akööl ke riääkkë yiic.”

⁷ Ku abï puk nɔm an, “Acie yɛn! Wek cä duëër lëu në kuny. Yɛn cïn nɔm këcam ayï lupɔ aliu. Duökï yɛn tɔ ee bɛ̈nydun!”

⁸ Ɣɛɛ, Jeruthalem ariäk! Ku Juda awiëëk! Në biäk ye kek Bɛ̈nydït wööc piɔ̈u në jam ku luɔi de këriëëc ëbɛ̈n, ku lɛ̈ɛ̈tkï Nhialic Guöpde në dhuëëŋ de yic në kɔc nïïm.

⁹ Luɔi de awɛ̈ɛ̈cken ee rɔt anyooth në kenyïïn. Acïkï keek ee thiaan cït man de kɔc ke Thɔdom. Amawoou, në riäŋ cïk yiɛ̈n röt.

¹⁰ Lɛ̈kkï kɔc piɛthpiɔ̈ɔ̈th an, “Kakun abïk piath në luɔi bä wek piɔ̈ɔ̈th miɛt në käŋiic kak ë luɔidun.

¹¹ Ku lɛ̈kë kɔc ee karɛc looi an, amawoou në week, luɔi de cinken yen abï luöi keek.

¹² Mïth kor ayɔŋkï kɔckï, ku ceŋ diäär keek. Acäk tïŋ ënɔɔnë kɔckï, luɔi kuc ë bänykun week mac, ke cäkï bï ŋic yen kueer wel kek wenïïm thïn

Bɛ̈nydït Aguiir Löŋ de Kɔcke

¹³ Bɛ̈nydït ë rɔt coc ke luel këde göönyde, ku ë rɔt guiir ke bï löŋ de kɔc guiir.

¹⁴ Bɛ̈nydït abï röördït ke wut, ku bäny ke kɔcke bɛ̈ɛ̈i ë luk nɔm. Aake gɔɔny an, “Wek ë duum ke tiim yak, ka ɣöötkun acïk thiäŋ në kak ë nämkï tëde kɔc kuanynyïïn.

¹⁵ Wek cïn nïïm yic bäk kɔckï duöm piny, ku yaŋkï kɔc kuanynyïïn, ee Yɛn Bɛ̈nydït Awärjäŋ yɛn ajam.”

Jäny de Diäär ke Jeruthalem

¹⁶ Acïï Bɛ̈nydït lueel an, “Tiëŋkï luɔi ye diëër ke Dhiɔn ke nïïm ɣääc! Ayek cath ke ke muk ke wuum nhial, ku yek kɔc math nyïïn ku ŋuakkï läk nyin, ku ceŋkï joth në ke kaam.

¹⁷ Ku Bɛ̈nydït abï diëër ke Dhiɔn luöi këtuc ku muut kenïïm ku abï Bɛ̈nydït ke pɔ̈l ke ke cï nïïm baar.”

¹⁸ Ade kööl bɔ̈ kööl bï Bɛ̈nydït këriëëc ye diëër ke Jeruthalem röt leec nyaai, yï joth yek cieŋ në ke kaam ku kenïïm ku ke yiëth,

¹⁹ ku kecin. Abï lupɔɔ yaat wei në ke nyïïn,

²⁰ ku akuupken ku wɛlkɛn yek cieŋ në ke kök, ku ke kɔ̈ɔ̈th,

²¹ ku joth thii yek cieŋ në cin nïïm ku kewuum,

²² ku lupɔɔ lɛ̈kken ëbɛ̈n ku lupɔɔ bär ku atheep yek ket në ke kɔ̈ɔ̈th,

²³ ku aluluutkɛn lɔ bilbil ku lupɔɔ ke linɔn thii ye kek kenyïïn weec, ku lupɔɔ thii lɛ̈k yek dɛɛr në kenïïm, ku ke yiëth, ku lupɔ kɔ̈k lɔ lëëulëëu bär ee ke gël nyïïn tueŋ ku kenïïm.

²⁴ Luɔi duëër en aa miök tum ke go aa ŋuäc yen ŋörkï, ku luɔi duëër en aa thiönh läk ke go aa wïïn kek cieŋkï, ku luɔi duëër en aa nhïm läk cï ŋiëc nai yen nu në kenïïm ke go aa baar enɔm, ku luɔi duëër en aa lupɔɔ läk kek cieŋkï ke go ye anuɛɛr, ku puk läkden rɔt ke ye ayäär!

²⁵ Röör wut abïk thou tɔŋ të ciɛk kek riɛl.

²⁶ Dhuöör ku dhiëëu abï nu wutic cil, ku wut guöpde abï ciët tiiŋ cï nyuc piny, ke cï yɔ̈ɔ̈t kɔ̈u bei.