Yith 29 - JAM DE NHIALIC 2011

Riääk de Jeruthalem

¹ Amawoou në Jeruthalem guöpde, yïïŋ de Nhialic! Amawoou në pänydïït ɣɔn cieŋ ë Debid! Takï ruöön ku nɔn ee run kaarou ke dhuëëŋ tëk,

² ku ëtɛ̈ɛ̈n Nhialic abï riääk bɛ̈ɛ̈i pänydïït ye cɔl an, “yïïŋ de Nhialic.” Abï dɛ dhiëëu ku dhuöör, ku pänydït ëbɛ̈n abï ciët yïïŋ cï riɔk ëbɛ̈n në riɛm.

³ Nhialic abï pänydït mak, ku took cil, ku geeu cil.

⁴ Jeruthalem abï ciët atïm de raan cï thou wiët ë piny thar ke kɔɔr bïï jam, në röl cït kë dɛc bɔ̈ bei ë abuui yic.

⁵ Jeruthalem, juöör alɛi cï yïn mak ëbɛ̈n, abïï ke kuɔɔth wei cït man ë abuui, ku remdɛn ë tɔŋ cï riɔ̈ɔ̈c abïk wɛɛr cï wal ë gɔp yom. Ë thiäu ke kuckï

⁶ Bɛ̈nydït de rɛm abï we luök në rel ye deŋ rel arëët ku lɛthë piny. Abï amaŋdïït ril kekë many dɛ̈p arëët tuööc,

⁷ ku ëtɛ̈ɛ̈n rem de tɔŋ de juöör ëbɛ̈n, kɔc mɛk pänydït de yïïŋ ë Nhialic, kakɛn ë tɔŋ ëbɛ̈n, ku kakɛn ë tɔŋ ëbɛ̈n abïk riääk cït man ë nyuöth, ku nyuuth de wakɔ̈u ku mɛ̈ɛ̈r nɔm ë yen.

⁸ Juöör cï kenïïm mat ke ke mɛk kuur ë Dhiɔn, abïk ciët raan nɛ̈k cɔk nyuöth ke cäm ku pɛ̈ɛ̈c ke nɛ̈k cɔk, ku cït raan nɛ̈k reu ku nyuöth ke dëk ku pɛ̈ɛ̈c ke cï röl ril wei.

Yöök Cïn Raan Piŋe

⁹ Mɔ̈mkï nïïm ku gäikï! Caarkï ke we cïï bï bɛ daai! Wiɛɛtkï ke cïn mɔ̈n cäk dek! Yak tuëk ke we kën mɔ̈u tuc dek!

¹⁰ Bɛ̈nydït ë we tɔ nok, ë döŋ ke ye nïn yen bä wek niin arëët. Tït ke Nhialic aduëërkï aa nyïïn ke kɔc, ku acï Nhialic ke cɔɔr nyïïn.

¹¹ Nyuuth cïï tït ke Nhialic lueel ëbɛ̈n abïï ke thiaan në week, abï ciët awerek cï guur thok. Na lak yiɛ̈n raan ŋic kuɛ̈n ku thiëckï ke bï kuɛ̈n week, abï lueel an, “Acä bï lëu në kuɛ̈n ë luɔi cïï ye guur thok.

¹² Na lɔ gäm raan kuc kuɛ̈n ku lɛ̈kë yen bï kuɛ̈n yïn, abï puk nɔm an, “Akuöc yen kë lueel.

¹³ Acï Bɛ̈nydït lueel an, “Kɔckë ayek röt tɔ ye kɔc lam ɛn, ku jamden ee ɣɔ̈ric, ku piɔ̈ɔ̈thken anukï tëdäŋ pei. Ka yek theek ee lööŋ ke kɔc tei, ku ciɛɛŋ thɛɛr, ka cïk keek tääu ë kenïïm.

¹⁴ Në biäk de ee kënë, yɛn bï kagɛ̈iyë looi në kɔc yiic. Ku ta pɛlënɔm de röör pelnïïm tɔ cïn naamden, ku ta kɔc de ŋïnydekäŋ tɔ kuc käŋ.”

Aŋäth bɔ̈ Wadäŋ

¹⁵ Amawoou në kɔc ee kïïtden thiaan në Bɛ̈nydït! Ayek kïïtden looi ë mɔ̈ɔ̈thic, ku yek tak an cïn raan bï ke tïŋ ku nɔn ŋic kë loikï.

¹⁶ Acïk këriëëc ëbɛ̈n, luööŋ nɔm piny. Ee kënou de naamde ee raan ee töny cuëëc ku ee tiɔp? Duëër kën ë looi raan lɛ̈k raan ë loi yen an, “Acie yïn ë loi yɛn?” Ku nɔn lɛ̈k en an, “Yïn kuc kë loi?”

¹⁷ Në kaam thiin bï bɛ̈n, roor ë Lebanɔn abï rɔt puk ke ë tëde duum, ku tëde duum abï rɔt puk ke ye roor.

¹⁸ Të le ëköölë bɛ̈n, miŋ abï awerek piŋ ke kuen ë röl dït, ku cɔɔr ë rɛ̈ɛ̈r ë cuɔlic abï yenyin liep ku dɛɛi.

¹⁹ Kɔc kuanynyïïn ku kɔc ee röt kuɔɔr piny abïk miɛtëpiɔ̈u bɛ yök tëde Bɛ̈nydït, Nhialic Ɣeric de Yithriɛl.

²⁰ Abï aa thök de kɔc ee kɔc kɔ̈k yɔŋ, ku nyuthkï Nhialic abiaan ë guöp. Raan ee kërac looi ëbɛ̈n abï nɔ̈k.

²¹ Nhialic abï kɔc ee kɔc kɔ̈k nɔ̈k nɔ̈k, ku riëëk kɔc ee kɔc ë karɛc looi pɛ̈n luɔi luiyë keek këtuc, ku kɔc ee käŋ töör ke ke bï kɔc de nïïm yic pɛ̈n luɔi yök kek yicden.

²² Ku ënɔɔnë Bɛ̈nydït Nhialic de Yithriɛl ɣɔn kony Abraɣam në nuanic, aye lueel an, “Kɔckï wek cïï gup bï bɛ yäär anandun, ku wek cïï wenïïm bï bɛ guöt piny në ayäär.

²³ Të la wek mïth bä gäm week tïŋ, abäk jɔ ŋic nɔn ee Yɛn, Nhialic Ɣeric de Yithriɛl. Wek bï A riëëu guöp ku gäikï në Yɛn.

²⁴ Kɔc piɔl piɔ̈ɔ̈th abïk wëët në yöŋ de käŋ yiic, ku kɔc ee dok ananden abïk piɔ̈ɔ̈th miɛt në luɔi bï ë keek wɛ̈ɛ̈t.”