Yith 28 - JAM DE NHIALIC 2011

Ciɛɛŋ de Rut Ayöökkï

¹ Amawoou në ciɛɛŋ de Yithriɛl! Dhuëëŋde athök cï göl de gaak nu ë bänykɛn cï wiɛɛt ë mɔ̈u nïïm. Bänykɛn de gup lɛc acïk röt tɔ piɛth në aŋiëër, ku adhɔtkï piny ke ke thou në mɔ̈u.

² Bɛ̈nydït ade nɔm raan ril ëtör cï kiëët bï keek bɛ̈n mak, raan bï ciët yom dïït put, ku cït amaŋ de deŋ, ku cït amool dïït bɔ̈ ke riŋ ku mool piny ëbɛ̈n.

³ Lɛc de bäny ee wiɛɛtë abïï duöm piny ë kɔc cök.

⁴ Jäl de dhuëëŋ ë bäny ee röt leec abï riäär cït mïth ke ŋaap ee luɔk tueŋ ke mɔ̈i ë ŋoot wei, ye kɔc ke guɔ tet ku cam keek ë nɔn töŋ ë lok kek.

⁵ Ade kööl bɔ̈, kööl bï Bɛ̈nydït de rɛm ciët göl ë dhuëëŋ ë gaak moc tëde kɔckɛn cï döŋ apïïr.

⁶ Abï ŋiëc guiëër ë löŋ gäm kɔc ee löŋ guiir, ku gëm kɔc ee pänydït gël riët de piɔ̈u bï kek pänydït gël në kɔc bï ye mak.

Yithaya kekë Tït ke Juda ee Wiɛɛt ë Mɔ̈u

⁷ Acakaa nɔn ye bäny ke kake Nhialic ku tït wiɛɛt ë mɔ̈u ku yek tuëk. Acïk wiɛɛt ë mɔ̈n tuc arëët ka yek cath ë käŋkäŋ ke ke cï nïïm nuɔɔn. Tït ke Nhialic acïk wiɛɛt ë mɔ̈n tuc ka acïkï nyuuth cïï Nhialic tuööc ee bɛ yökic, ku bäny ke kake Nhialic acïk wiɛɛt ka acïkï göny cï yiɛ̈n keek ee guiir.

⁸ Ku pɛɛm rëër kek ë yenɔm acïk thiɔ̈ɔ̈ŋ nɔm në ŋɔk, ku acïn të cï döŋ ke cïnic acuɔl.

⁹ Ayek kenïïm jääm në këdï. Luelkï an, “Eeŋö ye raanë tak kë wëët? Eeŋa kɔɔr jam lueel? Ee jam rɔ̈ŋ ke mïththii ë nyueth!

¹⁰ Athem luɔi wëët en wook në kïït ë kïït cök, ku këërkëër ë këërkëër cök, ku wëët ë wëëtë cök.”

¹¹ Na cakkï kë luɛɛl piŋ, ke Nhialic abï kɔc alɛi bɛ̈ɛ̈i, kɔc ee jam ë thoŋ mɛɛn, bïk week bɛ̈n wɛ̈ɛ̈t ë piööc.

¹² Ë we gäm lɔ̈ŋ wedhie ku duöt ë piɔ̈u, ku wek cïï jaai bäk këde piŋ.

¹³ Yen kë bï Bɛ̈nydït we wɛ̈ɛ̈t ka kïït ë kïït cök, ku këërkëër ë këërkëër cök, ku wëët ë wëëtë cök. Ku yïn bï aa tuëk të tëëk në kueer bä a nööm yic ëbɛ̈n. Yïn bï yiëk gup buɔ̈t, ku dep week ku leer ë we në pɛ̈cic.

Kuur ë Aguknɔm de Dhiɔn

¹⁴ Në biäk de ee kënë piɛŋkï thöŋ bɔ̈yë tëde Bɛ̈nydït wek bäny ɣɛ̈ɛ̈c wenïïm nu ë Jeruthalem.

¹⁵ Wek jam ke we ɣɛ̈ɛ̈c wenïïm an, “Wok cï löŋ mac në thuɔɔu ku loiku amat në paan ë thuɔɔu. Të le riääk bɛ̈n, acäk ŋic nɔn cïï yen we bï yök, në luɔi cä wek röt kan në tör ë wël ku mɛth ke bï we gël.

¹⁶ Kë lueel ë Bɛ̈nydït Awärjäŋ ë nɔɔnë kï an, “Yɛn tɛ̈ɛ̈u këërkëër ril ku le dïu piny në Dhiɔn. Ku yɛn bï kuur de aguk nɔm ril tääu ë yenɔm, ku acï gäär kɔ̈u ee wëlkë an, ‘Gäm ril ee käŋ guum.’

¹⁷ Yic yen abï aa athëm de këërkëër, ku piathëpiɔ̈u yen abï aa pëk de thëm.” Amaŋ de deŋ abï tör ë lueth ya wek röt kan nap wei, ku amool mändun riɔ̈ɔ̈k.

¹⁸ Löŋduön cäk mac në thuɔɔu abï riɔ̈ɔ̈k, ku riäk amatdun në paan ë thuɔɔu. Të le riääk bɛ̈n ke nap piny we bï tiaam.

¹⁹ Abï week a yup ku be we yup, miäk rial ë ceŋ. Abï tɔ̈u ë weyiëth aköl ku wakɔ̈u. Ku thöŋ piac bɛ̈n të de Nhialic, abï we yiɛ̈n riɔ̈ɔ̈c bï bɛ bɛ̈n!

²⁰ Wek bï jɔ ciët raan nu ë kääŋ yic, raan cï ye them bï tɔ̈c në agen cek aläl nɔm, ka acïn luöi ee yen rɔt riny, ku lupɔ ciek cï ye lëu në kum.

²¹ Bɛ̈nydït abï thɔ̈ɔ̈r cït man ɣɔn thɛ̈ɛ̈r en në kuur ë Peradhim ku në wak ë Gibiɔn yic, në luɔi de yen këdɛn kɔɔr bïï looi, cakaa nɔn dhɛl ë këde kɔc. Abï këde dhil thöl ë luɔi, yen luɔidɛn cï moony.

²² Duökï yöök cän we yɔ̈ɔ̈k puk ke ee kë gɛɛt wek a guöp! Të la week e looi, abï yic riɛl yen pothdun. Yɛn cï kë cï Bɛ̈nydït Awärjäŋ lueel piŋ, luɔi cïï Yen e dhel nɔn bï yen wut riɔ̈ɔ̈k ëbɛ̈n.

Pɛlënɔm de Nhialic

²³ Piɛŋkï kë luɛɛl, pälkï röt piny ku piɛŋkï kë lɛ̈k week.

²⁴ Ye raan ë dom piny puur ke cïï com? Ee piny gɔ̈i anande ku cïï com?

²⁵ Të cïï yen piny kiëët, ku jɔ kɔ̈thke com: yï kɔ̈th ke tiim cɔl dil ku kumin. Acï agamɔ com kekë barli ku rap ku jɔ biäk de domde com në awuööu ëbɛ̈n.

²⁶ Aŋic luɔi bï yen luɔide looi, në biäk cïï Nhialic en wɛ̈ɛ̈t.

²⁷ Acïï thieny ajok ee nööm kɔ̈ɔ̈m en mïth ke tiim ke dil ku nɔn ee kumin, ee thieny piɔl rɔ̈ŋ yen abï nööm luui yen.

²⁸ Acïï agamɔ bï riɔ̈ɔ̈k në käm cïn pëk, aŋic kämden në luɔi yen abël de jöŋgöör käm tɛ̈ɛ̈k në kekɔ̈ɔ̈th nhial ëmääth ke cïï rap bï ɣääriic.

²⁹ Pɛlënɔmë ëbɛ̈n aa bɔ̈ tëde Bɛ̈nydït de rɛm. Kiɛɛr ye Nhialic looi ayek kake pɛlënɔm, ku ayek tiam ananden.