Yith 26 - JAM DE NHIALIC 2011

Nhialic abï Kɔcke Gäm Tiëm

¹ Ade kööl bɔ̈, kööl bï kɔc dinë kiit piny ë Juda: Pänydïïtda aril! Nhialic guöpde Yen agël kɛ̈lke!

² Liɛpkï athïïn ke pänydït ku takkï jur piɛthpiɔ̈u lɔ thïn, jur ye kɔcke yic looi.

³ Yïn, Bɛ̈nydït, aye muk në män cï dikëdikic kɔc ee rëër në gämden yic aril ku yek aŋäthden tääu ë Yïguöp.

⁴ Ŋäthkï Bɛ̈nydït aɣet athɛɛr, në baŋ bï Bɛ̈nydït Nhialic wo gël anande.

⁵ Ee kɔc ɣɔn ë röt tɔ dït kuɔɔr piny, acï pänydït ë rëër kek thïn riɔ̈ɔ̈k, ku jiëp kɛ̈lke piny abïk lɔ thorthor në abuui yic

⁶ Kɔc cï yɔŋ ayek cath ë ye yekɔ̈u ku dumkï piny ë kecök.

⁷ Bɛ̈nydït tɔ kueer de kɔc piɛth lipic, kueer ciɛth kek thïn acï kiëët.

⁸ Wok ee këde piɔ̈ndu kuany cök ku tɛ̈ɛ̈uku aŋäthda në yïguöp, ee Yïn yok kɔɔr në wopiɔ̈ɔ̈th ëbɛ̈n.

⁹ Yïn ya kɔɔr ë Yapiɔ̈u ëbɛ̈n wakɔ̈u, të ye Yïn löŋ de piny guiir kekë kɔc nu thïn, abïk wëët kedhie në piathëpiɔ̈u.

¹⁰ Na cakaa nɔn Yïn piɔ̈u kok wekë kɔc ee karɛc looi, acïkï bï kɔn wëët në luɔi de piathëpiɔ̈u. Acakaa piny de kɔc a piɔ̈ɔ̈th wai ayek ŋoot ke ke loi karɛc, ku jiɛikï në luɔi bï kek dïtdu tïŋ.

¹¹ Acïï ë kɔc ke aterdu ŋic nɔn bï Yïn ke luöi këtuc. Tɔ ke yäär Bɛ̈nydït ku tɔ ke nuan, tɔ ke yök nuan cï kiëët në biäkden. Nyuöth ë keek nhiëër dïït nhiɛɛr Yïn kɔcku.

¹² Yïn bï wo gäm mät, Bɛ̈nydït, këriëëc cuk looi ëbɛ̈n, ee Yïn ee ye luöi wook.

¹³ Bɛ̈nydït Nhialicda, bäny kɔ̈k anukï ë wo nïïm, ku ee yïn ee Bɛ̈nydïïtda Yïtök.

¹⁴ Ënɔɔnë acïk thou ku acïkï bï bɛ pïïr, Atïïpken acïkï röt bï jɔt, në luɔi cïï Yïn ke luöi këtuc ku riäk keek. Acïn raan be ke tak ananden.

¹⁵ Bɛ̈nydït Yïn ë jurda kueet, ku tɔ pinyde tɔ dït në tuŋ thook kedhie, ku kënë acï Yïn yiɛ̈n dhuëëŋ.

¹⁶ Bɛ̈nydït Yïn cï kɔcku luöi këtuc në arɛɛm gokï Yïn lɔ̈ŋ.

¹⁷ Bɛ̈nydït Yïn ë wo tɔ dhiau, cït man ye tiiŋ dhiëth dhiau në arɛɛm.

¹⁸ Wok aa tök në arɛɛm, ku acïn kë cuk yök thïn. Acïn kë cuk looi kony wok pinyda, acïn kë cuk lëu ë luɔɔi.

¹⁹ Kɔckuɔn cï thou abïk bɛ pïïr! Gupken abïk röt dɔ̈k ë pïïr yic. Kɔc nin në rɛ̈ŋken yiic ëbɛ̈n abïk pääc ku kïtkï ë miɛtëpiɔ̈u. Cït man ye thɛ̈ny thiin lɔ bilbil piny tɔ dëk, yen abï Bɛ̈nydït kɔc cï thou thɛɛr bɛ tɔ pïïr.

Guiëër de Löŋ ku Guiɛɛr de Käŋ

²⁰ Kɔckï, lakkï në ɣöötkun yiic, ku thiäkkï ɣöötkun në we kɔ̈ɔ̈th. Thiankï röt në kaam thiin akäŋ aɣet të le agönh ë Nhialic thök.

²¹ Bɛ̈nydït abɔ̈ të rëër en thïn paannhial, bï kɔc ke piny nɔm bɛ̈n luöi këtuc në biäk de awɛ̈ɛ̈cken. Kɔc ɣɔn ye luc në cuëër abïk ke nyuɔɔth, ku piny acïï kɔc ɣɔn cï nɔ̈k bï bɛ thiaan.