Yith 25 - JAM DE NHIALIC 2011

Din de Piɔ̈ny

¹ Bɛ̈nydït Yïn ee Nhialicdï, Yïn bä dhuëëŋ guöp ku lɛɛc rinku. Yïn cï kagɛ̈iyë looi, në piɔ̈nduön adöt Yïn cï kakuön cï kiëët ɣɔn thɛɛr looi.

² Yïn cï pɛ̈ɛ̈nydït puk ke ke ye dhuur nɔm ku riäk ɣäänkɛn cï gël. Ɣään ë yïk ë kɔckuɔn ke ater keek acï jäl aɣet athɛɛr.

³ Kɔc ke juöör ril abïk Yï piɔɔny, Yïn bïï ë riɔ̈ɔ̈c në pɛ̈ɛ̈nydït ke juöör ee kɔc kuur.

⁴ Kɔc kuanynyïïn ku kɔc cïn käŋ acïk kɔt të nu Yïn ku acï ke kony në akööl ke nuan. Acï ke gäm gëlgël në amaŋ ku atïm gël keek në atuöc kɔc ke akuöörkuöör ayek kɔc mak cït man amaŋ de rut ë ɣöt kɔ̈u.

⁵ Acït atuöc de piny cï riɛl. Ku Yïn Bɛ̈nydït, Yïn ë kɔc ke aterda tɔ lɔ lik, Yïn ë kiɛɛu de kɔc ke akuöörkuöör tɔ lɔ lik, cït man ye luät tuöc de aköl tɔ lir.

Nhialic Akïït dhuëëŋ de Këcam

⁶ Eenë në kuur ë Dhiɔn nɔm Bɛ̈nydït de rɛm abï dhuëëŋ de këcam luöi juöör ke piny nɔm, dhuëëŋ de këcam cuai arëët ku mɔ̈n mit.

⁷ Eenë abï luän ë dhiënëpiɔ̈u ɣɔn nɔ̈ɔ̈k ë juöör nïïm ëbɛ̈n nyaai ëthiäu.

⁸ Ku Bɛ̈nydït Awärjäŋ abï thuɔɔu riɔ̈ɔ̈k aɣet athɛɛr! Abï pïïu wɛɛc wei ë kɔc nyïïn kedhie, raan ëbɛ̈n, ku nyiɛɛi ayär cïï kɔcke nuan ë piny nɔm ëbɛ̈n. Acïï Bɛ̈nydït lueel guöpde!

⁹ Të le yen rɔt looi, abï raan ëbɛ̈n aa lueel an, “Yen ee Nhialicda! Wo cï aŋäthda tääu ë Yeguöp, ku ë wo luök. Yen ee Bɛ̈nydït! Wok cï aŋäthda tääu në Ye guöp, ku ënɔɔnë wok mit piɔ̈ɔ̈th ku yok dɔl në luɔi cï Yen wo kony.”

Bɛ̈nydït abï Mowap Luöi Këtuc

¹⁰ Bɛ̈nydït abï kuur ë Dhiɔn gël, ku kɔc ke Mowap abï ke dum yiic ë kɔc cök, cït man ye anin dum yic të nuɛɛi ë tiɔp.

¹¹ Abïk kecin aa riny cï ka kuaŋ, ku abï Nhialic ke kuɔɔr piny, ku abïk cin dïïr ke cïn kë lëukï.

¹² Abï ɣään bär ke Mowap cï gël riɔ̈ɔ̈k, ku jiëp kɛ̈l ke piny në abuui yic.