Yith 23 - JAM DE NHIALIC 2011

Thön në biäk de Ponicia

¹ Kënë ee jam në biäk de Tayer. Dhuöörkï në dhiën ë piɔ̈u, wek abëël wïïr ëbɔ̈ ë Tarcic! Në luɔi cïï Tayer riɔ̈ɔ̈k taitai, abï ciën ɣööt ayï të ye abëël wïïr mac. Wään bïï abëëlkun ciëën ë Thaiperuth, yen aa piɛŋ wek thok.

² Dhiaukï, wek kɔc ke Thidon ee käŋ ɣaac! Wek ee kɔc tuɔɔc

³ lɔŋ de wɛ̈ɛ̈r, bïk aa ɣööc ku ɣɛɛckï rap ku kak ee luɔk ë Rip në Kiir yɔu, ku ɣööc aa looi në juöör ke piny nɔm.

⁴ Pänydït de Thidon, yïn ë yäär! Wɛ̈ɛ̈r kekë abäpdit dït thuth, acïk yï rɛɛc ku luelkï an, “Yɛn kën nɔm kɔn dɛk mïth. Yɛn cïn nɔm mïthwät ayï duet cä kɔn muk.”

⁵ Acakaa kɔc ke Rip të le kek thoŋ de Tayer piŋ, abï dɛ dhiënë piɔ̈u dït arëët.

⁶ Dhuöörkï në dhiëëu, wek kɔc ke Ponicia! Themkï bäk kat ke we lɔ Tarcic!

⁷ Kënë duëër aa Tayer pänydïït de miɛtëpiɔ̈u, wään yïk ɣɔn thɛɛr? Ee yen pänydït wään ee kɔc tuɔɔc ë wɛ̈ɛ̈r lɔŋtui, bïk wuöt lɔ ɣap?

⁸ Eeŋa ë kïït luɔi bïï ee kënë lööny ë Tayer kɔ̈u, yen pänydïït ee käŋ ɣaac, ku bänyke dhuëëŋ gup ë piny nɔm?

⁹ Aa kïït ë Bɛ̈nydït de rɛm. Aa kïït në luɔi bï yen lɛcden tɔ kääc në biäk de kë cïk looi, ku bïï kɔckɛn ye riëëu kuɔɔr piny

¹⁰ Lak cuɔmkï piny, wek kɔc nu ë Tarcic! Acïn raan bï we bɛ kony.

¹¹ Bɛ̈nydït ë Yecin riɛny ë wɛ̈ɛ̈r nɔm, ku jiëp ciɛɛŋ piny. Ë kɔc ke Kanaan yɔ̈ɔ̈k bïk ɣään ke ɣööc riɔ̈ɔ̈k.

¹² Pänydït de Thidon, miɛtëpiɔ̈ndu ë thök, ku kɔcku acï ke yɔŋ. Cak an cïk kat ke ke lɔ Thaiperuth, aŋootkï ke ke cïï bï lɔ̈ŋ.

¹³ (Aa ye kɔc ke Babilonia, acie kɔc ke Athiriya kek ë tɔ läi roor nöm Tayer. Aa ye kɔc ke Babilonia kek ë took wut në aloc bär, ku dhoŋkï ɣään ke riɛl de Tayer piny, ku nyiëëŋkï pänydït piny ke cï riääk)

¹⁴ Dhuöörkï në dhiëëu, wek kɔc ke abëël wïïr ke Tarcic! Pänydïït ya wek röt kan ë riɔ̈ɔ̈k.

¹⁵ Kööl abɔ̈, kööl bï kɔc nïïm määr në Tayer në run kathiërdhorou, run ke pïïr de melik. Të cïï ë runkë thök, Tayer abï ciët akɔɔrröör në dit yic:

¹⁶ Nööm thomdu. Ku wil wut kɔc acïk nïïm määr në nhiëërdu! Cɔ̈ŋë ku be dindu kiit ke yï bï röör bɛ tɔ bɔ̈ tëde yïn.

¹⁷ Të cïï run kathiërdhorou thök, Bɛ̈nydït abï Tayer bɛ dɔ̈k në ɣööcdɛn thɛɛric, ku abï rɔt riöp wuöt ke ciɛɛŋ ke piny nɔm ëbɛ̈n.

¹⁸ Wëu le yök në ɣööc yic, abï ke gäm Bɛ̈nydït. Acïï ke bï tɔ̈ɔ̈u tëmec, ku kɔc ee Bɛ̈nydït lam abïk wëuke nööm ɣɔɔc kek ke këcam ku lupɔɔ kɔɔrkï.