Yith 22 - JAM DE NHIALIC 2011

Thön në biäk ë Jeruthalem

¹ Kënë ee jam në biäk de Nyuuth de Wak. Eeŋö loi rɔt? Eeŋö tɔ kɔc ke pänydït loi dhuëëŋ ëbɛ̈n në ɣööt nïïm nhial?

² Pänydït ëbɛ̈n ade yic anuɔɔn, ë thiäŋ kekë awuɔɔu ku miɛtëpiɔ̈u. Kɔckuön cï thou ee tɔŋë yic, aake cïï thou ke ke thäär.

³ Bänykun ëbɛ̈n aake cï kat, go ke dɔm ke ke cïn winh töŋ cïk guɔ moc.

⁴ Ënɔɔnë nyääŋë ya piny ke ya dhiëëu kɔckiën cï thou. Ku duökï them bäk ya duut piɔ̈u.

⁵ Kënë ee kööl de riɔ̈ɔ̈c, ku tiëm, ku anuɔɔn në Wak ë Nyuuth yic, ku acïï Bɛ̈nydït Awärjäŋ tuöc wook. Kal ë pänydïïtda Jeruthalem acï thuöör piny, ku kɔc dhiën kɔɔrë kuɔɔny acï piŋ ë kur yiic.

⁶ Rem de tɔŋ de Eelam acïk bɛ̈n ke ke cath ë jöŋgöör kɔ̈ɔ̈th, ke ke muk wiɛth ke dhɛ̈ŋ. Ku rem de tɔŋ de Kir acïk köötken guiir.

⁷ Ku wɛ̈k ŋic luɔk ke Juda acïk thiäŋ në abëël ke tɔŋ, ku rem de tɔŋ cath ë jöŋgöör kɔ̈ɔ̈th, acïk kɔ̈ɔ̈c ë kɛ̈l ke Jeruthalem thok.

⁸ Kak ee Juda kony acï ke gɔ̈p bei ëbɛ̈n. Na lɔ ee kënë tuöl, kë yï bïï ka ye kɔc ke thɔ̈ɔ̈r bei të ye ke looi thïn.

⁹ Wek cï ɣään cï riääk në kal ë pänydït de Debid kɔ̈u tïŋ ke ke juëc, ku yak pïïu kueet në wɛ̈k yiic.

¹⁰ Wek cï ɣööt ke Jeruthalem kueen, ku wek cï ɣööt jäp piny ke we bï ɣään wään cï riääk në kal ë pänydït kɔ̈u yïk.

¹¹ Wek cï pul wec ë pänydït thar, ke bï pïïu ee wat ke ke lɔ në awuöl thɛɛr yic aa muk. Ku wek kën këde Nhialic gam, Raan ë kïït ee kënë ɣɔn thɛɛr, ku tɔ ee kënë loi rɔt.

¹² Bɛ̈nydït Awärjäŋ aa cɔl week bäk bɛ̈n dhiau ku dhuöörkï, ku mɔ̈tkï wenïïm në dhiënë piɔ̈u ku cieŋkï lupɔɔ ke cuɔl.

¹³ Ke we dɔl ku luɔikï dhuëëŋ de miɛtëpiɔ̈u. Wek cï thök ku ɣɔ̈k nɔ̈k bäk keek cuet, ku dɛ̈kkï ë mɔ̈u. Ku yak lueel an, “Bäk ciëmku ku dëkku në luɔi bï wok thou miäk.”

¹⁴ Acïï Bɛ̈nydït de rɛm guöpde lɛ̈k ɛn lueel an, “Kërɛɛcë acïï bïï päl keek në pïïrden yic ëbɛ̈n. Acä lueel Yɛn Bɛ̈nydït Nhialic de rɛm.”

Cebana Ayöökë

¹⁵ Bɛ̈nydït Awärjäŋ ë ya yɔ̈ɔ̈k laar tëde Cebana, bɛ̈ny muk ka baai de Bɛ̈ny ku lɛ̈k en an,

¹⁶ “Ye tak eeŋa? Kë tɔ yïn guëŋ rɔt raŋ ë kuuric?

¹⁷ Yïn duëër aa raan de naamde, ku Bɛ̈nydït abï yï jat nhial ku cuɛt yï wei.

¹⁸ Abï yï jat nhial cït man ë kura ku cuɛt yïn wun mec lääuwic. Yïn bï thou ëtɛ̈ɛ̈n në abëël ke jöŋgöör ku lɔ̈m, ka wään yïn rɔt lɛɛc në keek. Yïn ë guöp yäär tëde raan rëër yïn baaide.

¹⁹ Bɛ̈nydït abï yï nyaai tëduön ë luɔi, ku bïï yïn piny nhial të ɣɔn tɔ̈u yïn thïn.”

²⁰ Go Bɛ̈nydït lɛ̈k Cebana an, “Të lee ee kënë lɔ tuöl, Yɛn bï awundï Eliakim wën ë Ɣilikia cɔɔl.

²¹ Yɛn bï lupɔduön ë bääny kekë thiööth tääu në yekɔ̈u, ku gäm riɛl wään tɔ̈u ke yïn ëbɛ̈n. Ku abï ciët wun Jeruthalem ke Juda.

²² Abä gäm riɛl ëbɛ̈n në melik cök, käu de Debid. Abï mukthɛ̈ɛ̈r ke ɣön de luɔi muk, kë cï liep acïn raan bï ye guur, ku kë cï guur acïn raan bï ye liep.

²³ Abä piäät piny aril cït man ë loc, ku abï aa awaŋ de dhuëëŋ tëde baaide ëbɛ̈n.

²⁴ “Ku kɔc baaiden ku kɔc raan ë yen ëbɛ̈n, abïk röt aa kan ë yen. Abïk röt aa dhɔ̈ɔ̈r në yen cït man ye cuöp kekë abïïny nöök në löny cï piäät piny aril ë päny kɔ̈u!

²⁵ Të lee ee kënë lɔ tuöl, löny wään cï piäät aril, abï rɔ luek ku wïïk. Ku yen abï aa thök de ka cï nöök ë yekɔ̈u kedhie.” Acïï Bɛ̈nydït de rɛm lueel.