Yith 21 - JAM DE NHIALIC 2011

Nyuuth në Biäk de Wïïk de Babilon

¹ Kënë ee jam në biäk de Babilonia. Cït man ye kɔc piny nap ë jɔ̈ɔ̈ric, yen abï riääk bɛ̈n piny de yic riɔ̈ɔ̈c.

² Yɛn ë nyuuth de yic riäŋ rac ku riɔ̈ɔ̈c tïŋ. Rem de tɔŋ de Eelam ku Media amɛkkï rem de tɔŋ ë Media, ku tookkï pɛ̈ɛ̈nydït! Bɛ̈nydït abï nuan cïï Babilon luöi kɔc tɔ thök.

³ Kë cä tïŋ ku piɛŋ në nyuuth yic ë ya thiɔ̈ɔ̈ŋ në arɛɛm ku riɔ̈ɔ̈c, cït arɛɛm de tiiŋ kɔɔr dhiëth.

⁴ Yɛn ë piɔ̈u päu ku lɛthë ya në riɔ̈ɔ̈c. Yɛn aa kɔɔr luɔi bï wakɔ̈u bɛ̈n, ku acïn kë cï yiɛ̈n ɛn ee riɔ̈ɔ̈cdït yen ë bïï.

⁵ Në nyuuth yic këcamdït ë kiëët, biök bïï ë kamaan nyuc acï keek thieth. Aciëmkï ku adëkkï. Go jam caal ë thiäu an, “Bäny ke rem de tɔŋ! Kiëëtkï köötkun!”

⁶ Na wën ke lëk ë Bɛ̈nydït ɛn an, “Lɔ ku kuany raan tït, ku lɛ̈kë yen an luel kë woi ë yïnyin

⁷ Na cï kɔc tïŋ ke ke cath në jöŋgöör kɔ̈ɔ̈th rou ku rou, ku kɔc cath ë mul kɔ̈ɔ̈th, ku thɔ̈rɔ̈ɔ̈l kɔ̈ɔ̈th, abïï ke dhil döt ë daai apiɛth.”

⁸ Go raan tït cööt an, “Bɛ̈ny yɛn aa kääc tëdiën yan tïït aköl ku wakɔ̈u.”

⁹ Kɔc acïk guɔ bɛ̈n ëthiäu! Kɔc nu ë jöŋgöör kɔ̈ɔ̈th aciɛthkï ë rou ku rou. Aŋoot raan tït ke ciɛɛl thok an, “Babilon ë wïïk! Yiëthkɛn yek lam adhɔtkï piny ke ke cï dhuɔɔŋ.”

¹⁰ Kɔckiën ke Yithriɛl we cï kɔ̈ɔ̈m cït man ë agamɔ, ënɔɔnë wek cä guɔ lɛ̈k thoŋ piɛth cä piŋ tëde Bɛ̈nydït de rɛm, Nhialic de Yithriɛl.

Thön në biäk ë Edom

¹¹ Kënë ee jam në biäk de Edom, Ade raan cɔl ɛn ë Edom an, “Raan tït ee nɛn yen bï piny ruu? Lɛ̈kë yɛn ee nɛn yen bï wakɔ̈u thök?”

¹² Guɔ bɛ̈ɛ̈r an, “Piny abï ruu ku abï wakɔ̈u abï bɛ bɛ̈n. Na kɔɔr bä bɛ lop, bä ciëën bä bɛ̈n lop.”

Thön në biäk Arabia

¹³ Kënë ee jam në biäk de Arabia. Wek kɔc ke Dedan, wek kɔc ee cath në abëël ee piɔ̈ɔ̈t në jɔ̈ɔ̈r piny de Arabia yic.

¹⁴ Miackï kɔc ee bɛ̈n tëde week ke ke nɛ̈k reu në pïïu. Wek kɔc ke piny de Tema, miackï kɔc bɔ̈ ke ke riŋ në kacaam.

¹⁵ Kɔc akɔtkï në abätɛ̈ɛ̈u kɔɔr bïï ke nɔ̈k thook, kɔc kɔt në wiɛth ke dhaŋ kɔɔr bïï ke moc, kɔc kɔt në katuc thook ke tɔŋ.

¹⁶ Go Bɛ̈nydït lɛ̈k ɛn an, “An në ruöön tökic ëgök kɛk ë dhiën de Kedar abï thök.

¹⁷ Kɔc ke dhɛ̈ŋ kek aye jööt ke Kedar, ku ee kɔc liiakäŋ kek abï döŋ apïïr. Acïï lueel Yɛn Bɛ̈nydït Nhialic de Yithriɛl.”