Yith 2 - JAM DE NHIALIC 2011

Män bï Tɔ̈u Athɛɛr

¹ Kënë ee wël cïï Nhialic ke gäm Yithaya wën de Amodh në biäk de Juda ku Jeruthalem.

² Në akööl bï bɛ̈n tueŋë, kuur ee yen kɛ̈ɛ̈c ë Luaŋdït ë yenɔm abï aa yen ee tëde naamde në keek kedhie, aloocdïït bäär wär kur nïïm ëbɛ̈n. Juöör ke piny nɔm, abïk aa bɛ̈n kekë wɛ̈l röt ëtɛ̈ɛ̈n,

³ Ku abï kɔcke aa lueel an, “Bäkkï, lokku ë kuur ë Bɛ̈nydït nɔm të nu ë Luaŋdïït de Nhialic de Yithriɛl thïn, ku ëtɛ̈ɛ̈n abï wo nyuöth kë buk looi, wok bï cath në kueerdɛn cï lɔcic. Në biäk ye wëët ë Bɛ̈nydït bɛ̈n ë Dhiɔn, në Jeruthalem yen En jam ke kɔcke.”

⁴ Abï ateer tɔ kääc në kɛm ke juöördït ke piny nɔm. Abïk abätɛ̈ɛ̈uken thɔ̈ɔ̈th ke ke ye pur, ku tɔɔŋken ke ke ye leem ke tëm. Juöör acïkï tɔŋ bï bɛ aa lɛɛr, ku nɔn bekï tɔŋ kiëët.

⁵ Ënɔɔnë wek kuat ë Jakop, jɔku cath në ɣɛɛric, ɣɛɛr cï gäm wook në Bɛ̈nydït!

Kɔc ke Lɛc abï ke Riɔ̈ɔ̈k

⁶ Nhialic Yïn ë kɔcku rɛɛc kuat ë Jakop! Në luɔi cïï kek ciɛɛŋ de juöör tɔ̈u të lɔ aköl amiäk dɔmic, cït läm de yiëth, ku cäär ë tït ë kɔc ke Pilithiin.

⁷ Pinyden acï thiäŋ ke atek ku adhɛ̈p ka kuɛthden acïn guut, ku thiäŋ pinyden ke jöŋgöör ka abëël ke tɔŋ cïï kɔ̈ɔ̈th tɛɛm

⁸ Ku pinyden athiäŋ ke yiëth ye lam, ku ayek kak ë cuëckï në cinken lam.

⁹ Raan ëbɛ̈n abï dhɔ̈l guöp ku jɔ aa woi ke cïn naamde. Du ke pɛ̈l awäc Bɛ̈nydït!

¹⁰ Abïk thiaan në pɔ̈liic piny ku lɔ kɔ̈k thiaan në kuriic, themkï bïk röt kual në agönh ë Bɛ̈nydït ku riɛldïïtde ku dhuëëŋ!

¹¹ Ade kööl bɔ̈, kööl bïï dït ye raan rɔ tɔ dït kääc, ku riäk lɛc. Ku ëtɛ̈ɛ̈n Bɛ̈nydït Yetök Yen abï aa mɔ̈k nhial.

¹² Në ee köölë Bɛ̈nydït de rɛm abï raan ril ëbɛ̈n kuɔɔr piny, kɔc ee ke nïïm ɣääc ëbɛ̈n ku yek lueth töör.

¹³ Abï tiim ke thidar ke Lebanɔn ku tiim ke ɣok ke Bacan yiɛp piny.

¹⁴ Abï kurdït ku kur kor kiëët nïïm,

¹⁵ ayï alooc bäär ëbɛ̈n ku ɣään cï gël ëbɛ̈n.

¹⁶ Ayï abëël wïïr dït läk ke Tarcic abï ke mou.

¹⁷ Dït enɔm de mɛnh ë raan abï tɔ kääc, ku riäk lɛcden. Yiëth ye lam abïk määr taitai,

¹⁸ ku Bɛ̈nydït Yetök Yen abï aa mɔ̈k nhial në ëköölë.

¹⁹ Kɔc abïk mol në pɔ̈liic piny, ku lɔ kɔ̈k thiaan në kɔ̈k ke kuriic, themkï bïk röt kual në agönh ë Bɛ̈nydït, ku riɛldïïtde ku dhuëëŋ, të le Yen Bɛ̈n bïï piny bɛ̈n lath.

²⁰ Të le köölë bɛ̈n, abïk yiëthkɛn ë cïk thɔ̈ɔ̈th në adhääp ku ateek ɣɔn yek lam cuɛ̈t luɔny ku ŋaplaŋathɔ̈ɔ̈t.

²¹ Të le Bɛ̈nydït piny bɛ̈n lath, kɔc abïk thiaan në pɔ̈liic, ku kɔ̈k ke kuriic, themkï bïk röt kual në agönh ë Bɛ̈nydït, në biäk de riɛldïïtde ku dhuëëŋ.

²² Duökï aŋäth ee tääu në raan ee thou guöp. Eeŋö yen ee piathden?