Yith 19 - JAM DE NHIALIC 2011

Nhialic abï Rip Luöi Këtuc

¹ Kënë ee jam në biäk de Rip. Bɛ̈nydït abɔ̈ Rip ke riŋ arëët ë luät kɔ̈u. Yiëth ke Rip alɛthë keek në Ye nɔm, go kɔc ke Rip röt päl wei ë riɔ̈ɔ̈c.

² Aye Bɛ̈nydït lueel an, “Yɛn bï tɔŋ tɔ loi rɔt ë Rip, ku ta raan kekë mänhë thäär, ku raan ke raan thiëëk kek. Pänydït kekë pänydït, ku melik de ciɛɛŋ kekë melik de ciɛɛŋë abïk bääny tɛ̈ɛ̈r.

³ Kɔc ke Rip acïkï piɔ̈ɔ̈th bï riɛl, yɛn bï täŋden liääp. Abïk kuɔɔny aa thiëëc tëde yiëthken, ku abïk lɔ ku lopkï kɔc ee cɔ̈ɔ̈r, ku thiëkkï wëi ë kɔc cï thou në kë bï looi

⁴ Yɛn bï Rip tääu në raan tuc arëët cin, melik ee kɔc kuur bï keek mac. Acä lueel, Yɛn Bɛ̈nydït de rɛm.”

⁵ Pïïu ke Kiir abïk lɔ piny, ku jɔ Kiir dëu ë määth.

⁶ Nyïïn ke Kiir abïk dëu, wëk ke Rip abïk yiic ŋuäc në luɔi bï aguöt ku wal tɔ̈c ee luɔk ë Kiir yɔu ëbɛ̈n biɔɔr,

⁷ ku kɔ̈th cï com ë Kiir yɔu ëbɛ̈n abïk biɔɔr ku gɔpë ke wei.

⁸ Raan ëbɛ̈n raan ee këde pïïrde yök në dɛ̈p Kiir, abï aa kïm ku dhiɛɛu, alabithɔɔken ku boiken abïk ciɛ̈n naamden.

⁹ Kɔc ee lupɔ ke linɔn looi abïk piɔ̈ɔ̈th ŋɛɛr,

¹⁰ kɔc ee lupɔɔ, ku atëët ke luɔi abïk dhuɔɔŋ ku jiethkï piɔ̈ɔ̈th.

¹¹ Bäny ke wut ë Dhowan ayek kɔc piɔlpiɔ̈ɔ̈th! Kɔc pelnïïm ke Rip ayek wël ke dhɔ̈ɔ̈n guiëër keek! Eeŋö duëër kek kenïïm lɛc ë melik nɔm, an wok ee käu de kɔc ɣɔn pelnïïm, mïth ke meliik ɣɔn tueŋ?

¹² Melik de Rip, nu röörkuön pelnïïm ënou? Tɛk däŋ aduëërkï yïn lëk kë cïï Bɛ̈nydït de rɛm kiëët ë biäk de Rip.

¹³ Bäny ke Dhowan ku Mempeth apiɔlkï piɔ̈ɔ̈th. Adï ee kek wat dhiëënken, ku ënɔɔnë acïk Rip mɔ̈ɔ̈r.

¹⁴ Acïï Bɛ̈nydït keek tɔ gɛm wël ke anuɔɔn. Në biäk de ee kën, Rip ee kërac ëbɛ̈n looi, ka cï ciët raan cï wiɛɛt ë mɔ̈u ee rieth ë ŋɔkke yiic.

¹⁵ Acïn raan ë Rip, raan kueth ku nɔn ee raan cïn käŋ, nɔm kekë yɔ̈l, kër ke aköt ku aguöt, raan duëër kuɔɔny bɛ̈ɛ̈i.

Rip abï Bɛ̈nydït Lam

¹⁶ Kööl abɔ̈ kööl bïï ë kɔc ke Rip röt kuɔɔr piny cï diäär. Abïï ke lath në riɔ̈ɔ̈c të le kek Bɛ̈nydït de rɛm tïŋ ke jɔt yeciin bïï ke luöi këtuc.

¹⁷ Kɔc ke Rip abïk riɔ̈ɔ̈c në Juda të lee ë keek täk nïïm në kööl cïï Bɛ̈nydït de rɛm riäŋden guiir.

¹⁸ Të lee köölë bɛ̈n, pɛ̈ɛ̈nydït ke Rip kadhïc abïk aa jam në thoŋ de Ɣeberuu. Kɔc nu ëtɛ̈ɛ̈n abïk aa kuëëŋ në rin ke Bɛ̈nydït de rɛm. Pänydïït tök abïï cäk an, “Pänydïït de akɔ̈l.”

¹⁹ Të lee köölë bɛ̈n, abï dɛ yïïŋ ë Bɛ̈nydït piny de Rip, ku mën ë kuur bï gäm En në aken ë Rip nɔm.

²⁰ Abïk aa kïn nyooth rëër ë Bɛ̈nydït de rɛm në Rip. Na le kɔc tɔ̈u ëtɛ̈ɛ̈n yɔŋ ku lek kuɔɔny cɔɔl tëde Bɛ̈nydït, abïï ke tuöc raan bï keek luök.

²¹ Bɛ̈nydït abï rɔt nyuöth kɔc ke Rip, ku abïk ŋic ku lamkï, ku abïk gäm ka näk ku miɔ̈c. Ku abïk gutguut aa lɛ̈k Bɛ̈nydït ku gɛmkï kë cïï kek gutguut lueel.

²² Bɛ̈nydït abï kɔc ke Rip luöi këtuc, ku ëtɛ̈ɛ̈n abï ke tɔ dem. Abïk röt pɔ̈k En, ku abï lɔ̈ŋden piŋ ku tɔ keek dem.

²³ Të lee köölë bɛ̈n, abï dɛ kueer lääuwic në kaam de Rip ku Athiriya. Kɔc ee wuötkë kaarou abïk aa lɔ ku lek bɛ̈n në kɛmken, ku ee juöör kaarou abïk aa lam ëtök.

²⁴ Të lee köölë bɛ̈n, Yithriɛl abï mat ke Rip ku Athiriya, ku ee juöörkë kadiäk abïk aa thiɛɛi de piny nɔm ëbɛ̈n.

²⁵ Bɛ̈nydït de rɛm abïï ke thieei ku lueel an, “Wek bä thieei, Rip, kɔckï, ku Athiriya wek aa cak keek, ku wek Yithriɛl wek ee kɔckiën cä lɔc.”