Yith 18 - JAM DE NHIALIC 2011

Nhialic abï Kuc Luöi Këtuc

¹ Amawoou në riääk bï piny de Kuc yök, piny dhɔt pïïu ke kiir ë yekɔ̈u, ku abëël ke waikɛn ë gɛ̈ɛ̈r acï ke wuök pet ke ke kuany kiiric.

² Në ye pinyë yic tuuc ayek bɛ̈n ke ke cath Kiir në abël ë cuëc aguöt. Pɔ̈kkï röt wutic, tuuc ŋic riŋ! Pɔ̈kkï jam nɔm pinyduön cï tekic në kiɛɛr, yiɛ̈nkï juöörkuön ril aläl, kɔc bär ku tɛ̈ckï gup, kɔc ye kɔc riɔ̈ɔ̈c në keek ë piny nɔm ëbɛ̈n.

³ Piŋ yïn raan ëbɛ̈n ceŋ piny nɔm! Woi yɛn gut beerdï piny ë kur nïïm! Të kuɔɔth ɛn kaaŋ ke piŋ!

⁴ Go ë Bɛ̈nydït lɛ̈k ɛn an, “Yɛn bï piny lieec ëmääth ke Ya nu paannhial cït man ye thɛ̈c rɔt looi në wɛ̈ɛ̈ric në tuöc ë piny akööl ke tëm, ku cït man ye akɔ̈l riau ë tuöc de aköl.

⁵ Ke enap ee kënë guɔ määtic, të ye gaak jɔ löny piny ëbɛ̈n ku jɔ enap lɔ ke lok, kɔc ke ater abïk Ethiopia dap riɔ̈ɔ̈k, cït man ye lem kër tɛ̈m bei në tim de enap guöp.

⁶ Gup ke rem ë tɔŋden abïï ke päl diɛt nhial ku läi roor. Abï diɛt ke ŋueet mɔ̈i ku ciɛm läi keek rut.”

⁷ Kööl abɔ̈, kööl bïï Bɛ̈nydït de rɛm miɔ̈c de dɔm tëde kɔc ke piny cï tekic në kiɛɛr, jur ril aläl, kɔc bär ku tɛ̈ckï gup, kɔc ye kɔc riɔ̈ɔ̈c në keek ë piny nɔm. Abïk bɛ̈n ë kuur ë Dhiɔn nɔm, të ye Bɛ̈nydït de rɛm lam thïn.