Yith 17 - JAM DE NHIALIC 2011

Nhialic abï Thiriya ku Yithriɛl Luöi Këtuc

¹ Go Bɛ̈nydït lueel an, “Damathko acï bï bɛ aa pänydït, abï ya dhuur de ɣööt cï riääk.

² Pɛ̈ɛ̈nydït ke Thiriya abï ke pɔ̈l aɣet athɛɛr. Abïk aa tëde nyuäth ë thök ku ɣɔ̈k, ku acïn raan bï ke cuɔp wei.

³ Yithriɛl abï nɔm ciën tëde riɛl, ku ciɛɛŋ de Damathko abï nɔm ciɛ̈n nɔm lääu. Kɔc lik ke Thiriya cï döŋ apïïr abïk gup yäär cï mïth ke Yithriɛl. Acä lueel, Yɛn Bɛ̈nydït de rɛm.”

⁴ Go Bɛ̈nydït lueel an, “Ade kööl bɔ̈, kööl bïï dhuëëŋ de Yithriɛl thök, ku juëc de kake abïï ë kuany ë nyin löökic.

⁵ Yithriɛl abï ciët dom de anyuɔl cït tök ku tem, abï yic ciɛ̈n raan cï dom cï nyääŋ piny ë wak de Repaim yic, të cï ë ye tet ëbɛ̈n.

⁶ Ee kɔc lik tei kek abï döŋ apïïr, ku Yithriɛl abï ciët tim de olip cï tet nɔm ëbɛ̈n në mïth, ale döŋ ke ye mïth kaarou ku nɔn yek diäk në yenɔm nhial ya, ku nɔn ee ka lik cï döŋ në kër nu të lɔ pinyë. Acä lueel, Yɛn Bɛ̈nydït Nhialic de Yithriɛl.”

⁷ Të le köölë bɛ̈n, kɔc abïk röt lɔ kɔ̈ɔ̈r kuɔɔny tëde Aciëŋden, Nhialic Ɣeric de Yithriɛl.

⁸ Acïkï röt bï bɛ kan në yïkkɛn ë loikï në kecin, ku nɔn ŋäthkï ka cïk guaŋ, cït kïn de yanh tik Acera ku yïk ye wal ŋïr nyop ë kenïïm.

⁹ Të le köölë bɛ̈n, pɛ̈ɛ̈nydït cï ŋiëc gël abï ke pɔ̈l, ku nyiëëŋ ë keek piny ke ke cï riääk, cï pɛ̈ɛ̈nydït wään nyiëëŋë piny në kɔc ke Ɣib, ku kɔc ke Amor ɣɔn kɔt kek në mïth ke Yithriɛl.

¹⁰ Yithriɛl wek cïï nïïm määr në Nhialic ɣɔn luäk week, ku gël week cï kuur dït. Ënɔɔnë we cï röt cuöm duum yaath, në luɔi bä wek yiëth lei aa lam.

¹¹ Ku të ciɛk kek nyok ku mockï gaak, në kööl man ë com ë ke, abï ŋoot ke cïn kë bäk tem. Ku kë bï tɔ̈u ee nuan ku arɛɛm cie dem.

Kɔc ke Ater acï Ke Tiaam

¹² Juöör ril bï bɛ̈n piɔ̈t ë Yithriɛl acïk awuööu pɔ̈l cï pïïu ke wɛ̈ɛ̈r, ku cïtkï kuëër de apiöŋ dït.

¹³ Juöör abïkï cït man ë kuëër riŋ arëët, ku acï Nhialic ke rɛ̈l yiic, gokï röt miɛɛt ciëën, acï ke kuaath cï tɔɔr nu ë kur yiic, ku cïtkï wal riŋ ë kɔɔric.

¹⁴ Thëën ayek riɔ̈ɔ̈c tɔ loi rɔt, ku miäk rial acïk jäl. Kënë ee yen ee täu ë raan ëbɛ̈n, raan yak pinyda.