Yith 16 - JAM DE NHIALIC 2011

Tän de Mowap Cïn Aŋäth

¹ Në Thela ë kueer ë jɔ̈ɔ̈ric kɔc ke Mowap, acïk amääl tuöc kuur de nyan de Dhiɔn, ke ye miɔ̈c de miɛtëpiɔ̈u.

² Atïtkï në kiir de Arnon yɔu kek duet ke Mowap acïn kë lëukï, ayek lɔ ciëën ku lek tueŋ, acïk ciët diɛt cï cuöp bei në ɣöötken yiic.

³ Acïk lɛ̈k kɔc ke Juda an, “Lɛ̈kkï wook kë buk looi. Kony wook cït tim ye atïmde liɛɛr në tuöc de aköl kääc cil, ku tɔ wo lɔ̈ŋ në atïmdu yic. Wok ee kɔc ë bɔ̈ ke wo riŋ, thian wook të cïn raan bï wo yök.

⁴ Tɔ wo rɛ̈ɛ̈r pinydun. Kony wook në kɔc kɔɔr bïk wook riɔ̈ɔ̈k.” (Akuöörkuöör ku riääk abïk thök, ku kɔc ee wuöt riɔ̈ɔ̈k abïk jäl.

⁵ Na ë le ke raan töŋ de käu de Debid abï aa melik, ku abï kɔc mac në piathëpiɔ̈u ku nhiëër agɔk. Abï yic dap looi, ku abï löŋ ŋiëc aguiir.)

⁶ Aye kɔc ke Juda lueel an, “Acuk piŋ luöi ye kɔc ke Mowap kenïïm ɣääc. Aŋicku nɔn ye kek kɔc aluɛth ee röt leec, ku lɛcden ee ɣɔ̈ric.”

⁷ Kɔc ke Mowap abïk dhiau në biäk de nuan cï ke yök. Abïk dhiau kedhie të le kek këcam mit ɣɔn yek cam në Kirɣereth tak. Abï keek thɛl ë bäp ë piɔ̈uwic.

⁸ Duum thiääk në Ɣecbon ku duum ke tiim ke Thibima acï ke riɔ̈ɔ̈k, kek duum wään ye mɔ̈nden bäny ke juöör tɔ wiɛɛt. Në kööl tök këër ë tim aaye cuaar abï ɣet pänydït de Jadher, ku lee ë jɔ̈ɔ̈ric të lɔ aköl amiäk, ku lee të lɔ aköl athɛ̈i lɔŋ de Wɛ̈ɛ̈r de Amilɔ.

⁹ Ënɔɔnë yɛn dhiëëu tiim ke Thibima cït man dhiëëu ɛn Jadher. Ku löny pïïukï në biäk de Ɣecbon ku Eliɛla, në luɔi cïn en tëm bï kɔc tɔ mit piɔ̈ɔ̈th ëtɛ̈ɛ̈n.

¹⁰ Acïn raan mit piɔ̈u në duum ŋic luɔk yiic. Acïn raan kit dit ku nɔn moc kiɛɛu de miɛtëpiɔ̈u në duum yiic. Acïn raan ee enap dhiim looi yen mɔ̈u, kiɛɛu de miɛtëpiɔ̈u acï thök.

¹¹ Yɛn kïm në dhiënëpiɔ̈u në biäk de Mowap, ku jiɛth piɔ̈u në biäk de Kirɣereth.

¹² Kɔc ke Mowap anɛ̈kkï röt piny ke ke lɔ në kuurdɛn yaath nɔm, ku lek lɔ̈ŋ tëdɛn ɣeric, ku acïn piath bïï luöi keek.

¹³ Yen jam cï Bɛ̈nydït kɔn lueel ka në biäk de Mowap.

¹⁴ Ku ënɔɔnë aye Bɛ̈nydït lueel an, “Në run kadiäk yiic ëdhöc, kuɛth dïït de Mowap abï määr. Ayï kɔc juëcke abïk thök, ee kɔc lik kek bï döŋ apïïr, ku abïk nïïm ciën riɛl.”