Yith 13 - JAM DE NHIALIC 2011

Nhialic abï Babilon Luöi Këtuc

¹ Kënë ee jam në biäk de Babilon, jam wään cïï Nhialic gäm Yithaya wën de Amodh.

² Në kuur cie luɔk nɔm yen aa jɔt ë beer ë tɔŋ nhial! Mɔ̈ckï kiɛɛu rem de tɔŋ ku jatkï we kök nhial ke ye kë nyuth keek, luɔi bä wek thook ke kal ë pänydïït ɣɛ̈ɛ̈c yenɔm lɔ mak.

³ Bɛ̈nydït ë remdɛn ë tɔŋ ɣɛ̈ɛ̈c yenɔm cie riɔ̈ɔ̈c cɔɔl, bïk tɔŋ ɣeric bɛ̈n biök ku lui këtuc kɔc cï Yen ke gɔ̈th ke keek.

⁴ Piɛŋkï awuɔɔu në kur nïïm, ee röl de kɔc juëc aläl, ee röl ë juöör ku ciɛɛŋ ke piny nɔm mɛ̈ɛ̈t kenïïm. Bɛ̈nydït de rɛm de tɔŋ akïït remdɛn ë tɔŋ ke bï lɔ thɔ̈ɔ̈r.

⁵ Aake bɔ̈ tëmec ë wuöt ke piny thar yiic. Bɛ̈nydït abï pinynɔm riɔ̈ɔ̈k ëbɛ̈n në agönhde.

⁶ Arɔ̈ɔ̈l në arɛɛm! Kööl ë Bɛ̈nydït ë thiɔ̈k, kööl bï Nhialic Awärjäŋ riääk bɛ̈ɛ̈i.

⁷ Raan ëbɛ̈n abï yecin dhuk, ku raan ril piɔ̈u ëbɛ̈n abï ciën aŋäth.

⁸ Keek kedhie abïk riɔ̈ɔ̈c ku abïï arɛɛm ke tiaam, cït arɛɛm de tiiŋ dhiëth. Abïk röt aa liec ë ŋäny ŋäny në riɔ̈ɔ̈c, ku dëpkï nyïïn ë liapliap në ayäär.

⁹ Kööl ë Bɛ̈nydït abɔ̈, ee kööl de tuöcdɛn cï Yen gɔ̈th arëët ku ŋeeny arëët. Piny abï aa jɔ̈ɔ̈ric ku raan ee kërac looi ëbɛ̈n abï riɔ̈ɔ̈k.

¹⁰ Kuel ke paannhial ëbɛ̈n ku kuut ke kuɛl acïkï bï riau, ku akɔ̈l abï cuɔl të bïï yen thok, ku pɛɛi acï bï ruɛl.

¹¹ Aye Bɛ̈nydït lueel an, “Yɛn bï riääk bɛ̈ɛ̈i piny ku luöi këtuc kɔc ee karɛc looi ëbɛ̈n, në biäk de karɛckɛn. Yɛn bï raan ëbɛ̈n kuɔɔr piny raan ee yenɔm ɣääc, ku luöi këtuc raan de guöp lɛc ee kɔc kuur.

¹² Kɔc cï döŋ apïïr abïk dhal cït man adhääp.

¹³ Yɛn bï paannhial niɛŋ, ku ta piny lɛthë abï rɔt wuuk tëde, në kööl bän agönhdï nyuɔɔth, Yɛn Bɛ̈nydït de rɛm.

¹⁴ “Alɛi rɛ̈ɛ̈r ë Babilon abïk kat ke ke bɛ̈k wuötken, abïk wɛɛr cït ŋeer kɔt ë yiëëp, ku cïtkï thök cïn nïïm tïït.

¹⁵ Raan lee dɔm abï thäär abï thou.

¹⁶ Ku cuɛ̈ɛ̈në mïthkɛn kor kɔ̈ɔ̈th abïk thou ke ke daai, ku yak ɣöötken yiic ku wïïtë diäärken.”

¹⁷ Aye Bɛ̈nydït lueel an, “Yɛn tooc jur cɔl Mede bïï Babilonia lɔ mak. Acïkï atek ee cieŋ, ku cïkï piɔ̈ɔ̈th mit në ciëŋ de adhɛ̈p

¹⁸ Në dhɛ̈ŋken ku në wiɛthken abï kek ke wɛ̈ɛ̈t dhuök nɔ̈k. Acïn kokëpiɔ̈u bïk nyuöth kor ku acïn mïth dït bïk pɔ̈l.

¹⁹ Babilonia yen aye ciɛɛŋ dik në wuötiic ëbɛ̈n, yen ee kë ye kɔcke röt lɛɛc. Ku Yɛn Bɛ̈nydït, Yɛn bï Babilon pɔ̈k piny cït man ë kë cä luöi Thɔdom ku Gomoora!

²⁰ Acïn raan töŋ bï bɛ rëër ëtɛ̈ɛ̈n. Acïn Arab bï paanyde bɛ piäät ëtɛ̈ɛ̈n, ku acïn tïn bï ɣɔ̈kke bɛ aa nyuääth ëtɛ̈ɛ̈n.

²¹ Abï aa të bï läi ke jɔ̈ɔ̈ric aa rëër thïn ku yïk agumuut ɣöötken, ku wuut abïk rëër ëtɛ̈ɛ̈n, ayï bɔɔth roor abïk aa thuëëc ëtɛ̈ɛ̈n.

²² Ɣööt bär ku ɣööt ke bääny ayek awuɔɔu de aŋuööth ku kɔ̈ɔ̈rgɔl aa gamic ëbɛ̈n. Kööl de Babilon ëbɛ̈n! Aköölke acïk thiɔ̈k ë thök.”