Yith 11 - JAM DE NHIALIC 2011

Ciɛɛŋ de Mät

¹ Acït man ye tim cï yep lɔ̈ɔ̈k nyok, yen acït mei de Jethe abï käude rɔt jɔt, ka melik cï piac dɔm abï bɛ̈n bei në käu de Debidic.

² Wëi ke Bɛ̈nydït abïk En gäm pɛlënɔm, ku ŋïnydekäŋ ku tëët bï yen kɔcke ŋiëc mac. Abï këde Bɛ̈nydït piɔ̈u ŋic ku abïï riëëu,

³ ku abï miɛtëpiɔ̈u yök në rïïu rïïu En En. Acïï löŋden bï guiir në kë cï tïŋ në yenyin ku nɔn ee kë cï piŋ në yeyïc,

⁴ abï löŋ de kɔc kuanynyïïn guiir ë piathëpiɔ̈u, ku ee yic de kɔc cïn nïïm riɛl kuöny keek. Në kë cï lueel abï kɔc tɔ luɔiyë këtuc, ku kɔc ee karɛc looi abïk thou.

⁵ Abï kɔcke mac në piathëpiɔ̈u ku yic.

⁶ Aŋuööth kekë amɛ̈l abïk aa rëër ëtök ë mätic, ku tɔ̈c kuëc piny kekë amithöök ke bɔɔth. Daau ke ɣɔ̈k ku aduur ke köör abïk cam ëtök, ku abïï meth keek aa tiit.

⁷ Ɣɔ̈k ku kɔ̈ɔ̈r ayuääl abïk cam ëtök, ku dɛɛuken ku aduurken abïk tɔ̈c ëtök ë mätic. Kɔ̈ɔ̈r abïk aa cam ë wal cï ɣɔ̈k.

⁸ Acakaa meth acïn kë bï ye wääth të ciɛk en thuëëc në kërɛɛc de thok wurïï lɔ̈ɔ̈m.

⁹ Në Dhiɔn nɔm kuur ɣeric de Nhialic, abï ciɛ̈n kë bï raan luöi buɔ̈t ku nɔn ee kërac. Piny abï nɔm thiäŋ ke ŋïny de Bɛ̈nydït cït man ee wɛ̈ɛ̈r thiäŋ në pïïu.

Kɔc cï Peec Abïk Bɛ̈n Ciëën

¹⁰ Ade kööl bɔ̈, kööl bïï ë melik däŋ bɛ dɔm në mei de Jethe ke yen ee kïn bï juöör aa nyuööth. Abïk kenïïm mat pänydɛn dït ë bääny ku gëmkï riëëu.

¹¹ Të lee köölë bɛ̈n, Bɛ̈nydït abï riɛlde bɛ looi ku bïï kɔc baai, kɔckɛn wään cï döŋ Athiriya ku Rip, ku piny de Pathroth, ku Kuc ku Eelam, Ku Babilonia ku Ɣamath ku wɛ̈th thook ku tuöör ke wɛ̈ɛ̈r yiic.

¹² Bɛ̈nydït abï beer jat nhial, ke bï ë juöör ŋic nɔn mɛ̈ɛ̈t En kɔckɛn ke Yithriɛl ku kɔckɛn ke Juda yiic, kɔc cï thiäi. Ku bïï ke ciëën në aguuk ke piny yiic kaŋuan.

¹³ Ciɛɛŋ de Yithriɛl acïï tiɛɛl bï bɛ aa dɔ̈m këde Juda, ku Juda acïï bï aa raan ater de Yithriɛl.

¹⁴ Keek kedhie abïk Pilithiin aa mak të lɔ aköl athɛ̈i, ku yiɛkkï kɔc rɛ̈ɛ̈r të lɔ aköl amiäk. Ku abïk piiny ke kɔc ke Edom ku Mowap peec, ku abï ë kɔc ke Ammon keek riëëu.

¹⁵ Bɛ̈nydït abï Baar ë Thueth tɔ dëu, ku abï yom tuc bɛ̈ɛ̈i ku tɔ wɛ̈ɛ̈r ë Yuparat tɔ dëu, ku nyiëëŋ nyïïn thiiakäŋ kadhorou piny, ago raan ëbɛ̈n keek aa teem ke ke lɔ lɔɔk.

¹⁶ Abï dɛ kueer dït ee jäl në Athiriya, bïï kɔckɛn ke Yithriɛl cï döŋ apïïr ëtɛ̈ɛ̈n tëëk ke ke bɔ̈, cït man ɣɔn de yen kueer ë bïï kuarken bei paan ë Rip.