Yith 1 - JAM DE NHIALIC 2011

¹ Awerekë ade yic nyuuth ɣɔn cï Nhialic ke nyuöth Yithaya wën Amodh, në biäk de Juda ku Jeruthalem, në akööl ɣɔn ye Yudhia ku Jotham ku Aɣadh ku Ɣedhekia meliik ke Juda.

Nhialic Agäk Kɔcke

² Go Bɛ̈nydït lueel an, “Yïn piny ku paannhial piɛŋkï kë luɛɛl! Mïthkiën wään cä muk acïk A rɛɛc thok.

³ Ɣɔ̈k aŋickï raan de keek, ku ŋic mul të ye wuönden ke cääm. Ku acïï kɔckiën ke Yithriɛl ee ŋic aya. Acïkï ee yökic taitai.”

⁴ Amawoou në week, jur ee karɛc looi, kɔc ɣɛ̈ɛ̈c awɛ̈ɛ̈c thiek! Mïth ke kɔc ee karɛc looi! Wek cï Bɛ̈nydït rɛɛc, Nhialic Ɣeric de Yithriɛl ku wɛ̈lkï wekɔ̈ɔ̈th En.

⁵ Eeŋö ŋuɔɔt wek ke we jai? Kaarkï bï wo luöi këtuc aläl? Yithriɛl, nɔmdu ka cï thiäŋ ke tëtöök ku piɔ̈ndu ëbɛ̈n ayï täŋdu, acï jɔk ke dɔm.

⁶ Gɔl në yïnɔm ale guööt në yïcök acïï piɔl. Tëtöök cï kuëër ku ɣään cï piɔ̈ɔ̈ny ëbɛ̈n akënë keek deer nyïïn ku kënë keek tɔc nyïïn ë miök.

⁷ Wundun acï riɔ̈ɔ̈k ku pɛ̈ɛ̈nydïtkun acï ke nyuɔp piny në mac. Në we nyïïn ka wek lɔ ke we woi kɔc lei ke ke nöm pinydun ku riäkkï këriëëc ëbɛ̈n.

⁸ Nyan de Dhiɔn ë nyääŋ piny yetök ke cï tuɔɔk ke cït kë cïn raan gël en, ku yen ë ciët aduël ku nɔn ee kät ye raan dom tiit.

⁹ Të ë Bɛ̈nydït de rɛm ë kën kɔc kɔ̈k pɔ̈l apïr, adï cï Jeruthalem riɔ̈ɔ̈k taitai, cït man ë Thɔdom ke Gomoora.

¹⁰ Piɛŋkï jam de Bɛ̈nydït, wek kɔc ke Thɔdom! Yak wëët de Nhialicda piŋ, wek kɔc ke Gomoora.

¹¹ Acï Bɛ̈nydït lueel an, “Yak tak eeŋö duëër e miɔ̈cduön yak nɔ̈k ëbɛ̈n luöi Yɛn? Yɛn ë dɛk miɔ̈c juëc ke amɛ̈l yak gäm Ɛn ke ke ye miɔ̈c ye nyop ëbɛ̈n, ku lɔ kɔl de ɣɔ̈kkuön cuɛi. Yɛn cïï piɔ̈u ee miɛt në rim ke miöör, ku rim ke amɛ̈l ku nyök bɔɔth.

¹² Eeŋa cï we thiëëc bäk kakë ëbɛ̈n yiɛ̈n Ɛn të bä wek A bɛ̈n lɔ̈ŋ? Eeŋa cï we thiëëc bäk kakë looi ëbɛ̈n, ke ke dum ɣöndiën ɣeric yic?

¹³ Acïn naamde të bɛ̈ɛ̈i wek miɔ̈ckun, ee gök de kërɛɛc maan yen miɔ̈c de wal ŋïr cäk nyop, ku yɛn cïï dhuëŋkuön ke yï pɛɛi ë piac wil duëër gam, ayï kööl ë Thabath ku lɔ kööl de lɔ̈ŋ de amatnɔm, acïï awɛ̈ɛ̈ckun ke riɔ̈ɔ̈k ëbɛ̈n.

¹⁴ Yɛn man Dhuëëŋduön ë pɛɛi piac wil, ku akööl ke lɔ̈ŋ, ayek kathiek cän ke bäp në ɣɔ̈ɔ̈cden.

¹⁵ “Të la wek we cin taar në lɔ̈ŋ, wek cä bï lieec, na we cak lɔ̈ŋ në lɔ̈ŋ yïndï, ke acä bï piŋ, në luɔi cïï cinkun thiäŋ në rim.

¹⁶ Wakkï röt ke we bï ɣɛɛr. Takkï karɛc ya woi ke ke luɔikï kääc ëbɛ̈n. Ɣɛɛ, takkï luɔi de kërac kääc,

¹⁷ ku wɛ̈ɛ̈tkï bäk yic aa looi. Abäk dhil tïŋ ke yic ye looi, ku kuɔnykï kɔc cï yɔŋ, ku yak mïth abɛɛr gäm yicden ku kuɔnykï diëër abɛɛr.”

¹⁸ Aye Bɛ̈nydït lueel an, “Ënɔɔnë, jɔku jam thöl ëtök. Na cak karɛckun thiɛth aläl, wek bä waak, abäk ɣɛɛr cït kɔi ke deŋ, na cäk thiɛth cït riɛm we bï ɣɛɛr abäk ciët alath. Acakaa nɔn cï yïn riɔk abä thiɛth aläl, yïn bï ɣɛɛr abä ciët alath.

¹⁹ Na lak A lɔ riëëu, ke wek bï kapiɛth bïï piny ke luɔk aa cam.

²⁰ Ku na lak A rɛɛc thok, ke wek bï nɔ̈k abäk thou, ee Yɛn Bɛ̈nydït Yɛn ë jam.”

Pänydïït ee Karac Looi

²¹ Pänydïït ɣɔn piathëpiɔ̈u, acï ciët tiiŋ akɔɔrröör! Ɣɔn tueŋ aa thiäŋic ke kɔc piɛthpiɔ̈ɔ̈th, ku ënɔɔnë ee kɔc ee kɔc nɔ̈k kapäc kek cï döŋ thïn.

²² Jeruthalem ɣɔn tueŋ yïn aa cït ateek, ku ënɔɔnë yïn ë ciɛ̈n naamdu, yïn aa cït mɔ̈u piɛth, ku ënɔɔnë yïn ë döŋ ke yï ye pïïu.

²³ Bänyku ayek A rɛɛc, ku mɛ̈ɛ̈thkï në cuɛ̈ɛ̈r, ku ayek miɔ̈c ku kumthok nööm kedhie. Acïkï mïth abɛɛr ee kony ë gööny yic, ku cïkï gööny de diëër abɛɛr cï yiɛ̈n keek ee piŋ.

²⁴ Ku ënɔɔnë piŋ kë lueel ë Bɛ̈nydït de rɛm, Nhialic Töŋ de Yithriɛl an, “Yɛn bï rɔt guöör në week kɔc ke aterdï, ke we cïï A bï bɛ nuaan.

²⁵ Yɛn bï Yanɔm wɛ̈l week në agɔ̈th, ka wek bä tɔ agɔk cït man ye wëëth lëëŋ abï lɔ kïr, ka Yɛn bï acoldun ëbɛ̈n nyaai.

²⁶ Wek bä gäm bäny ku kɔc ee we jääm cït kɔckuön wään tueŋ. Ka Jeruthalem abï bɛ aa cɔɔl an, pänydïït de piathëpiɔ̈u, pänydït adöt.”

²⁷ Në biäk piɛth ë Bɛ̈nydït piɔ̈u abï Dhiɔn kony, ku raan lɔ yepiɔ̈u puk thïn abï kony në piathëpiɔ̈u.

²⁸ Ku Yen abï raan ëbɛ̈n dhuɔŋ piny, raan lɔ Yen rɛɛc thok ku looi kë rac, abï raan cïï këde ee piŋ ëbɛ̈n nɔ̈k.

²⁹ Wek bï gup aa riɔ̈ɔ̈c në luɔi cä wek tiim ke ɣok kɔn lam, ku luɔikï wɛl ee luɔk ë duum yiic ke ke ye ka yaath.

³⁰ Wek bï aa biɔɔr cït tim de ɣok kɔɔr thuɔɔu, ku dom cïn pïïu piɔk en.

³¹ Cït man ye wal dëp në atiam ë mac, yen acït luɔi bï kɔc ril riɔ̈ɔ̈k në luɔidɛn ë karɛc yek looi, ku acïn raan bï riääkde tɔ kääc.