Wɛ̈ɛ̈t 9 - JAM DE NHIALIC 2011

¹ Ee yic, yɛn cï yanɔm tak në ee kakë kedhie, guɔ tïŋ nɔn ye kɔc piɛthpiɔ̈ɔ̈th ku kɔc pelnïïm ku luɔiden ëbɛ̈n tɔ̈u në Nhialic ciin, ku raan akuc kë bï rɔt looi në pïïric, nɔn ee nhiëër ku nɔn ee män en bï yök.

² Acïn akeu, Yen ee thon töŋë ee bɛ̈n tëde kɔc ee karɛc looi ku kɔc piɛthpiɔ̈ɔ̈th, ku kɔc piɛth ku kɔc rac, ee kë töŋë yen ee raan ëbɛ̈n yök, ee kë töŋë tëde raan piɛthpiɔ̈u ku raan ee karɛc looi, ku ee kë töŋë tëde raan piɛth ku raan rac, ee kë töŋë tëde raan ee miɔ̈c näk gam ku raan cïn kë ye gam. Cït man nu yen kekë raan piɛth anu kekë raan rac aya, ku nu kekë raan ee gutguut lueel anu kekë raan ee riɔ̈ɔ̈c në luɛl ë gutguut.

³ Kënë ee kërac në käŋ kedhie ka ye looi ë piny nɔm, ee kë töŋë ee bɛ̈n tëde kɔc kedhie. Ku ayadäŋ, të pïïr kek ë piny nɔm ayek piɔ̈ɔ̈th thiäŋ në karɛc ku tɔ̈u miɔ̈ɔ̈l në kepiɔ̈ɔ̈th, ku ëtɛ̈ɛ̈n ke ke jɔ lɔ paan ë thuɔɔu.

⁴ Ku raan ëbɛ̈n, raan rɛ̈ɛ̈r ke kɔc pïïr ade nɔm aŋäth, ka jöŋ cïn naamde ku pïïr aŋuän në köör cï thou.

⁵ Kɔc pïïr ayek ŋic nɔn bï kek thou, ku kɔc cï thou acïn kë yek ŋic. Acïnkï nïïm ariöp däŋ. Ayï luɔɔi ye kɔc kenïïm tak në keek aliu taitai.

⁶ Nhiëërden, ku mänden ku tiɛɛlden, acïk riäär në keek ëtök. Acïn kë cï döŋ taitai kë bïk bɛ rɔm në kɔc pïïr në ka loi yiic ëbɛ̈n ë piny nɔm.

⁷ Lɔ tueŋ, cam kuïndu ke yï mit piɔ̈u, ku dek mɔ̈ndu në piɔ̈n mit, Nhialic amit piɔ̈u në kakuön cï looi.

⁸ Ye kakuön kë dhuëëŋ cieŋ kedhie në aköölnyïïn.

⁹ Ye piɔ̈u miɛt wekë tiiŋdu, në aköölkuön ɣɔ̈ric ke pïïr cïï Nhialic gäm yïn ë piny nɔm, ye piɔ̈u miɛt wekë yen, në baŋ yen këduön ë yök në luɔi riildu yic ëbɛ̈n cï looi ë piny nɔm.

¹⁰ Ye këduön loi looi apiɛth në riɛldu ëbɛ̈n, në biäk liu ë luɔi ku täk ku ŋïnydekäŋ ayï pɛlënɔm paan ë thuɔɔu wën bï yïn lɔ thïnë.

¹¹ Ku yɛn cï rɔt puk guɔ këdäŋ tïŋ ë piny nɔm, acie raan ŋic kat yen ee tiam aköölnyïïn, acie jööt kek ee tɔŋ tiaam aköölnyïïn, acie kɔc pelnïïm kek ee këcam yök aköölnyïïn, acie kɔc tiëër nïïm kek ee kuɛth aköölnyïïn, acie kɔc ŋic käŋ kek ee miɛtëpiɔ̈u yök tëde kɔc aköölnyïïn. Piäl ë guöp ee këde raan ëbɛ̈n.

¹² Acïn raan ee köölde ŋic, ee lööny ë kërac yic ëthiäu cït man ye dit kɛɛc në wïn ë dɛ̈pic ku cït man ye rec kɛɛc ë bɔi yic.

Pɛlënɔm Apiɛth në Pialëpiɔ̈u

¹³ Ade këdäŋ cä bɛ tïŋ ë piny nɔm, yɛn cï pɛlënɔm tïŋ ade naamdɛndït tëde yɛn.

¹⁴ Aa de wun thiinë lik ë kɔc thïn, wunë acïï melik ril bɛ̈n mak, ku took wut ku gɛɛu keek cil në gök de këril.

¹⁵ Ku wunë aa tɔ̈u ë raan pelnɔm kuanynyin thïn, ku yen ë pɛlënɔmdɛnë adï cï ee wunë bɛ̈n luök. Ku acïn raan cïï yenɔm bɛ̈n tak në yen.

¹⁶ Guɔ jɔ lueel an, “Pɛlënɔm awär riɛl. Cakaa nɔn cïï kek pɛlënɔm de raan kuanynyin biɔɔn, ku cïkï lööŋke piŋ.

¹⁷ Piŋ de lööŋ ke raan pelnɔm ee jam ëmääth, aŋuän në piŋ de rël ye bɛ̈ny kɔc rɛ̈l në amatnɔm de kɔc piɔlpiɔ̈ɔ̈th yiic.

¹⁸ Pɛlënɔm aril awär wëu ye ke tɔŋ thɔ̈ɔ̈r, ku raan töŋ ee karɛc looi aduëër kapiɛth juëc riɔ̈ɔ̈k.