Wɛ̈ɛ̈t 8 - JAM DE NHIALIC 2011

¹ Eeŋa cït raan pelnɔm? Ku ŋic wɛ̈ɛ̈r de käŋiic? Pɛlënɔm ee ye riaau nyin, ku wɛ̈ɛ̈r täu ye raan yenyin nyuiin.

Riëëuwë Bɛ̈ny

² Gam löŋ de bɛ̈ny, në biäk cï yïn gutguut looi në Nhialic nɔm.

³ Du rɔt tɔ mec në bɛ̈ny lɔ̈ɔ̈m, cakaa yïn ë cïï piɔ̈u mit we yen, në biäk ee bɛ̈ny këdɛn nhiɛɛr në yepiɔ̈u looi.

⁴ Jam de bɛ̈ny ëbɛ̈n atɔ̈u ë riɛl në kecök, ku eeŋa bï ye lɛ̈k en an, “Eeŋö ee kë loiyë?

⁵ Ariɔ̈ny de löŋ acïn kërɛɛc ee ye yök, ku raan pelnɔm aŋic kueer bï yen ë looi, ku kööl bï yen ë looi.

⁶ Ka këriëëc ëbɛ̈n ade köölde, ku kueerde, cakaa nɔn cïï ë diɛɛr tääu në raan yeth ke ye këthiek.

⁷ Acïn raan ŋic kë bï rɔt looi ë woyiic, ku eeŋa duëër ye lɛ̈k wook?

⁸ Acïn raan de riɛl bï yen wëike gël, ku raan acïn nɔm riɛl bï yen kööl ë thuɔɔu pëën. Ee tɔŋ cïn raan duëër poth thïn. Ayï luɔɔi rac aya, acïï wärken duëër kony.

Kɔc Rac ku Kɔc Piɛthpiɔ̈ɔ̈th

⁹ Yɛn aa tïŋ ee kakë kedhie, wën jan ka loi röt ë piny nɔm thɔ̈ɔ̈ŋ, ade kööl ye raan ril kathiek tääu në kɔc yiëth, jieeth ke piɔ̈ɔ̈th.

¹⁰ Guɔ kɔc ee karɛc looi tïŋ acï ke ŋiëc tɔ̈ɔ̈u ë rɛ̈ŋken yiic, ku aake ye bɛ̈n tëɣeric ku bïk bei, ku wën bïï ë kɔc ciëën ë rɛ̈ŋ nïïm, aleec ë kɔc keek në pänydïït wään looi kek karɛcken thïn. Kënë aya ee ɣɔ̈ric.

¹¹ Eeŋö ye kɔc karɛc dap looi? Ee biäk cïï kɔc ë karɛc looi ee dap luöi këtuc aruööthic.

¹² Na cak raan ee karɛc looi awɛ̈ɛ̈c looi raan bɔt ku ŋoot ke pïïr, ka ŋiɛc këriëëc ëbɛ̈n abï dikëdik kekë kɔc ee Nhialic riëëu.

¹³ Ku acïï bï dikëdik kekë kɔc ee karɛc looi. Acïkï bï ceŋ, cït man atiëp, në biäk cïï kek Nhialic ee riëëu.

¹⁴ Ku tïŋ ɣɔ̈ric däŋ ee rɔt looi ë piny nɔm, në akööl kɔ̈k, kɔc piɛth piɔ̈ɔ̈th ayek ariöp de kɔc ee karɛc looi yök, ku yök kɔc ee karɛc looi ariöp de kɔc piɛth piɔ̈ɔ̈th, guɔ lueel an, kënë ayadäŋ ee ɣɔ̈ric.

¹⁵ Ka kë duɛ̈ɛ̈r piɔɔny ee pinyë nɔm ee piɔ̈n mit de raan, në biäk cïn en kë cï yök: kë cï yök yetök ee luɔɔi bï yen cam ku dëk ku jɔ piɔ̈u miɛt, yen ee kënë aduëër läk ke yen në luɔide yic, në ee pïïr cïï Nhialic gäm en ë piny nɔm.

¹⁶ Wën cän a piɔ̈u wɛ̈l pɛlënɔm, ku ka loike ë piny nɔm bä keek ŋic, acä yök nɔn cïï raan duëër niin wakɔ̈u ku aköl.

¹⁷ Guɔ luɔɔi de Nhialic tïŋ ëbɛ̈n, luɔɔi looi ë piny nɔm acïï raan duëër yökic. Na ciɛk rɔt näk piny në luɔi ke kɔɔr, ka cïï yök, na cak raan pelnɔm lueel an ŋic, ka cï bï yökic.