Wɛ̈ɛ̈t 7 - JAM DE NHIALIC 2011

Ciët në biäk de Pïïr

¹ Piath ë rin ke raan awär miök tum tuc ë ɣööcde, ku kööl ë thuɔɔu awär kööl ë dhiëth.

² Lɔ de raan ɣön ë dhiëëu aŋuän në lɔ ɣön ë dhuëëŋ, në luɔi ye thuɔɔu kɔc pïïr täk nïïm nɔn yen kueer le ë mɛnh ë raan thïn ëbɛ̈n ka.

³ Dhiënëpiɔ̈u apiɛth në dɔl, në biäk ye dhiënëpiɔ̈u raan tɔ wɛ̈ɛ̈t.

⁴ Raan pel nɔm ee piɔ̈u tɔ̈u baai nu ë dhiëëu thïn, ku tɔ̈u piɔ̈n ë raan piɔlpiɔ̈u baai looi ë dhuëëŋ thïn.

⁵ Gääk de raan pel nɔm awär pïŋ de diɛt ke raan piɔlpiɔ̈u.

⁶ Dɔl de raan piɔlpiɔ̈u acït atenyteny de many de thil ë töny thar, ku kënë ayadäŋ ee ɣɔ̈ric.

⁷ Ee yic, të cï raan pelnɔm lɔ në mɛthic ka cï dhɔ̈n, ku kumthok ee raan riɔ̈ɔ̈k.

⁸ Thök de këdäŋ awär gölde. Ku liɛɛrëpiɔ̈u awär lɛc.

⁹ Du ee dap gɔ̈th, ee dhɔ̈n yen agɔ̈th muk në yepiɔ̈u.

¹⁰ Du ee thiëc an, “Eeŋö wɛ̈ɛ̈r akööl ɣɔn tueŋë akööl ciëënkë?” Lop cït ee kënë acïn yic pɛlënɔm.

¹¹ Pɛlënɔm apiɛth, acït ka ye raan pïïr ke lɔ̈ɔ̈k lak.

¹² Ku pɛlënɔm ee raan gël cït man ee wëu raan gël, ku kë de pɛlënɔm naamde arëët, ee luɔi yen wun gël wëi.

¹³ Ye luɔɔi de Nhialic tak. Eeŋa duëër kë cï Nhialic tɔ ŋɔl bɛ nyɔk ë rïc?

¹⁴ Ye piɔ̈u miɛt në akööl piɛth, ku akööl ke nuan, ye takic ayadäŋ nɔn Yen Nhialic Yen ee keek looi kedhie, ku acïn raan ŋic kë bï rɔt lɔ̈ɔ̈k looi miäk.

¹⁵ Në ë pïïrdiën ɣɔ̈ricë yɛn ë käŋ tïŋ kedhie, ade raan piɛthpiɔ̈u ë thou në piathëpiɔ̈nde yic, ku rɛ̈ɛ̈r raan ee karɛc looi ë run juëc në karɛcke yiic.

¹⁶ Du yïpiɔ̈u tɔ piɛth aläl, ku du yïnɔm tɔ pel aläl, eeŋö bï yïn rɔt riɔ̈ɔ̈k?

¹⁷ Du rɔt tɔ rac aläl, ku du rɔt tɔ ye raan piɔlpiɔ̈u, eeŋö bï yïn rɔt tɔ thou, ke aköölku ë ke ŋoot?

¹⁸ Apiɛth bä kënë looi, ku du däŋë päl, ye tɔ̈u në kaamic, ku raan ee Nhialic riëëu aduëër poth në keyiic kedhie.

¹⁹ Pɛlënɔm aduëër raan pelnɔm gäm riɛl awär kë duëër ë bäny kabɛ̈t luöi wut.

²⁰ Ku ee yic, acïn raan piɛthpiɔ̈u nu ë piny nɔm ee këpiɛth looi ku cie wäc.

²¹ Ayadäŋ, du këriëëc ëbɛ̈n ee kɔc lueel ee mukic, ku na lɔ looi, ke yïn bï raan lui ke yïn piŋ alɛ̈ɛ̈t yïn,

²² ku yïn, ye ŋic ayadäŋ në yïpiɔ̈u nɔn cï yïn kɔc kɔ̈k kɔn läät raanjuëc.

²³ Kakë kedhie acä ke them bä nɔm pɛl, luɛɛl, an, “Yɛn bï nɔm pɛl. Ku akën ke bɛ̈n lëu.

²⁴ Pɛlënɔm amec ku anu tëthuth aläl, eeŋa duëër e cuööp?

²⁵ Yɛn cï yanɔm wël yöŋ de käŋiic, ke ya kɔɔr a nɔm, bä pɛlënɔm yök, ku kaaric, bän täu de käŋ ŋic, ku ŋiɛc rac de dhɔ̈ɔ̈n, ku miɔ̈ɔ̈l kekë pialëpiɔ̈u.

²⁶ Yɛn cï këtuc thok wär thuɔɔu yök, tiiŋ cït bɔi ku cït ciin wïn ë dɛ̈p. Raan ee Nhialic riëëu abï poth në ye tiiŋë ciin, ku kɔc ee awɛ̈ɛ̈c looi abïï ke dɔm.

²⁷ Go raan kɔɔr pɛlënɔm lueel, an, Tiëŋkï, kë cä yök kï, Yɛn cï kënë mät däŋë, ke ya bï täu de käŋ yök,

²⁸ Wään ŋuɔɔt ɛn ke ya kɔɔr a nɔm, acïn kë cä yök. Ee mony tök tei yen piɛth piɔ̈u në agum de rööriic, ku acïn tiiŋ töŋ cä yök ë diääriic.

²⁹ Ku kë töŋ cä ŋic kï an, Nhialic ë raan cak ke piɛth piɔ̈u, ku ye raan ee rɔt yal në kuɛɛrkɛn kɔ̈kiic.