Wɛ̈ɛ̈t 6 - JAM DE NHIALIC 2011

¹ Yɛn cï kërɛɛc däŋ tïŋ ë piny nɔm, këthiek dïït cï tääu në kɔc yiëth.

² Raan cï Nhialic gäm kajuëc, ku dhuëëŋ, ka acïn kë bï yen bɛ dak në ka kɔɔr ë yepiɔ̈u ëbɛ̈n, ku akën ë Nhialic gäm riɛl bï yen ke cam, ee raan däŋ yen ee ke cam, kënë ee ɣɔ̈ric, ee këtuc thok arëët.

³ Na de raan nɔm bɔt ë meth, ku pïïr në run juëc, ku cïï piɔ̈u ee kuɛth në kapiɛth ke pïïr tɔ̈u në yen, ku kënë ŋiëc thiɔ̈k ayadäŋ, aya lueel, an, mɛnh athɔ̈ɔ̈r bei aŋuän në yen.

⁴ Në biäk ye bɛ̈n athɔ̈ɔ̈r bei ɣɔ̈ric, ku lee ë mɔ̈ɔ̈thic, të cïï rinke ee bɛ piŋ.

⁵ Cak an kën aköl tïŋ nyin ku cïn kë cï ŋic, ku yen lɔ̈ŋde aŋuän në lɔ̈ŋ de ee monydïïtë.

⁶ Cakaa yen ë duëër pïïr agum de ruöön raanrou, ku cïn miɛtëpiɔ̈u cï cak yök në kake yiic, ke yen ee tëtöŋë yen ale kek thïn.

⁷ Luɔɔi ril ye raan looi ëbɛ̈n ee biäk de thoŋde, ku acie kuɛth.

⁸ Ee piath ŋö wɛ̈ɛ̈r raan pelnɔm raan piɔlpiɔ̈u? Ku këpiɛth ŋö tɔ̈u ke raan kuanynyin ŋic rëër ke kɔc?

⁹ Pëk ee raan pëk në ke tɔ̈u në yenyin tueŋ yen aŋuän në wïl ye raan piɔ̈u wïl ke kɔɔr kɔ̈k. Ee kë ɣɔ̈ric, acït cum de yom cök.

¹⁰ Këriëëc ëbɛ̈n nu ë piny nɔm aa yök ke ŋic ɣɔn thɛɛr, ku aŋic raan nɔn cï yen duëër kɛ̈ɛ̈k kekë raan wär en në riɛl.

¹¹ Të dïït ë jam, ke ɣɔ̈ric ee dït, ku eeŋö bï raan yök thïn?

¹² Ku eeŋa ŋic këpiɛth rɔ̈ŋ kekë mɛnh ë raan në ye nïn lik ɣɔ̈ric ee tëëk cït man ë atiëp ë piny nɔm? Eeŋa bï raan lɛ̈k kë bï rɔt looi në yecök të cï yen jäl?