Wɛ̈ɛ̈t 5 - JAM DE NHIALIC 2011

Du gutguut ee dap looi

¹ Ye rɔt tiit të le yïn ɣön ë Nhialic. Ye lɔ ëtɛ̈ɛ̈n ke yï bï wëët, yen aŋuän në miɔ̈c de kɔc piɔlpiɔ̈ɔ̈th, kuc nɔn ye kek karɛc looi.

² Du gutguut ee guɔ lɛ̈k Nhialic në yïliep ku nɔn ee yïpiɔ̈u, në luɔi nu Yen nhial, ku yïn nu piny, ka ye jamdu tɔ koor.

³ Cït man ye jamdït pialëpiɔ̈u bɛ̈ɛ̈i, yen acït jamëpiɔ̈u ee nyuöth bɛ̈ɛ̈i.

⁴ Ka të lëk yïn Nhialic gutguut, du ee gääu ke kɛ̈në looi, ye gutguutdu looi. Acïï piɔ̈u ee miɛt ke raan piɔlpiɔ̈u.

⁵ Apiɛth cïï gutguut bï lueel, gutguut cïï bï looi.

⁶ Du yïthok tɔ thelë awäcic, ke yï cïï bɛ̈ny ë kake Nhialic bï yɔ̈ɔ̈k an, yɛn cï awäc looi në kuëëŋ cï yɛn kuëëŋ. Ku eeŋö bï yïn Nhialic tɔ göth ke yïn në kë bä lueel, ku bïï këduön ë loi në yïciin riɔ̈ɔ̈k?

⁷ Ee luɔɔi ee nyuöthdït ku jamdït ɣɔ̈ric bɛ̈ɛ̈i, ka Nhialic Yen ee riëëu.

Pïïr ee Ɣɔ̈ric

⁸ Të tïŋ yïn piny ayɔŋë kɔc kuanynyïïn thïn ku jɔt yicden në riɛl, ke yï du gäi. Në luɔi ye bɛ̈ny nɔm dɛ raan mät ke yen nu në yenɔm, ku ade bäny dït kɔ̈k mät ë keek nu ë kenïïm.

⁹ Ku keek kedhie, ayïï melik aya ee tëm de rap ŋɔ̈ɔ̈th.

¹⁰ Raan ee wëu nhiaar acie kuɛth në keek, ku nhiëër ë kajuëc, acïn kë ye yök thïn. Kënë aya ee ɣɔ̈ric.

¹¹ Juëc de kake raan, ee dɛ thook juëc cam keek, ku kë ye raan de keek yök thïn, ee luɔi yen ke woi në yenyin.

¹² Raan ee lui ë yecin ee niin apiɛth, na cï cak cam ku nɔn kën cam arëët, ku juëc de kake raan kueth ayek en pɛ̈n nïn.

¹³ Yɛn cï kërɛɛc de jiɛthëpiɔ̈u tïŋ ë piny nɔm, kɔc ayek röt kuɛ̈t kajuëc, bï ke yiɛ̈n riääk.

¹⁴ Ayek kajuëcken riɔ̈ɔ̈r në thëm rɛɛcdɛn ye kek käŋ thɛm nïïm, abï mïthken döŋ ke cïn kë bïk lɔ̈ɔ̈k yök.

¹⁵ Raan ee bɛ̈n në yeciin ku abï jäl në yeciin, piny nɔm acïn kë bï yen yeciin muk.

¹⁶ Cït man ee raan bɛ̈n, yen aye yen jäl, ku kë ye yök thïn në luɔɔide yic ëbɛ̈n, cie yom? Ku kënë ayadäŋ ee kërɛɛc de jiɛthëpiɔ̈u.

¹⁷ Në pïïr de raan yic ëbɛ̈n raan ee rɛ̈ɛ̈r ë mɔ̈ɔ̈thic ku diɛɛric, ku agɔ̈thic ku juäi yic.

¹⁸ Tiëŋkï, kë cä yök kë rɔ̈ŋ ee luɔɔi bïï ë raan cam ku dëk, ku bï kuɛth yök në luɔɔide yic në akööl lïk ke pïïr ë piny nɔm, akööl cïï Nhialic gäm en ke ye biäkde.

¹⁹ Ayadäŋ, na cï Nhialic raan gäm kajuëcke, ku riɛl bï yen ke cam, ku gëm biäkde, ku yök miɛtëpiɔ̈u në luɔɔide yic, ee miɔ̈c de Nhialic.

²⁰ Në biäk cï Nhialic yen tɔ mit piɔ̈u, acie bɛ diɛɛr në lik de nïnke në piny nɔm.