Wɛ̈ɛ̈t 3 - JAM DE NHIALIC 2011

Këriëëc ëbɛ̈n ade Köölde

¹ Këriëëc ee rɔt looi ë piny nɔm ëbɛ̈n, ee rɔt looi në akööl cïï Nhialic ke mac.

² Ade kööl de dhiëth, ku ade kööl de thuɔɔu, ade kööl ë cum, ku kööl ë nyuɛ̈n bei.

³ Ade kööl ë näk, ku kööl de pialëguöp, ade kööl ë dhoŋ piny, ku ade kööl ë yïk.

⁴ Ade kööl ë dhiëëu, ku kööl ë dɔl, ade kööl ë dhiënëpiɔ̈u, ku kööl ë miɛtëpiɔ̈u.

⁵ Ade kööl ee kur cuat wei, ku kööl ee kur määt yiic, ade kööl ë ciëm ë thok, ku kööl cïn ciëm ë thok.

⁶ Ade kööl ë kɔ̈ɔ̈r ë käŋ, ku kööl ë päl ë käŋ, ade kööl ë muk ku kööl ë cuɛt wei.

⁷ Ade kööl de rɛ̈t ë käŋ, ku kööl ë kɔ̈c ë käŋ, ade kööl ë mim ku kööl ë jam.

⁸ Ade kööl ë nhiëër, ku kööl ë män, ade kööl ë tɔŋ, ku kööl de mät.

⁹ Eeŋö ye raan yök ë luɔɔi rilde yic ëbɛ̈n?

¹⁰ Yɛn cï luɔɔi cïï Nhialic tääu në kɔc yiëth tïŋ.

¹¹ Acï këriëëc ëbɛ̈n tɔ läk në köölde. Ku acï tän athɛɛr cak ë kɔc piɔ̈ɔ̈th ayadäŋ, ke ke cïï kë cï Nhialic looi ee yökic, gɔl të ɣɔn thɛɛr gɔl ë käŋ aɣet cï thökde.

¹² Aŋiɛc nɔn cïn en këpiɛth duëër ë raan looi, të cï en piɔ̈u miɛt ku looi këpiɛth të pïïr en.

¹³ Wook wodhie wok duëër cam ku dëkku ku mitku piɔ̈ɔ̈th në karil cuk looi. Ee miɔ̈c de Nhialic.

¹⁴ Aŋiɛc an, këriëëc ëbɛ̈n ee Nhialic looi, abï rëër aɣet athɛɛr. Acïn kë duëërë ye ŋuak nyin ku acïn kë duëërë nööm thïn. Aye Nhialic looi ago kɔc yen riëëu.

¹⁵ Ka tul ënɔɔnë, ku kë bï bɛ tuöl acï kɔn tuöl ɣɔn tueŋ. Nhialic ee ka cï röt kɔn looi bɛ tɔ tul.

Kuöc Guiëër ë Löŋ nu ë Piny nɔm

¹⁶ Ku ayadäŋ yɛn cï këdäŋ tïŋ ë piny nɔm, tëde guiëër de löŋ acïn löŋ ye ŋiëc guiir thïn, ku tëde piathëpiɔ̈u kërac anu thïn.

¹⁷ Guɔ jɔ lɛ̈k rɔt an, “Nhialic abï löŋ de kɔc guiir atuc kedhie, kɔc piɛth piɔ̈ɔ̈th ku kɔc rac. Në biäk de yen kööl cï Nhialic kiëët në baŋ ë luɔɔi ku këriëëc ëbɛ̈n.

¹⁸ Guɔ jɔ lueel në yapiɔ̈u an, Nhialic athem wook, ke bï nyuöth wook nɔn kït wok ë läi.

¹⁹ Ku cït man ee raan thou, lɛ̈i ee thou ayadäŋ, ayek wëi kedhie, ku ayek thou kedhie. Raan acïï ŋuän në lɛ̈i, këriëëc ëbɛ̈n ee ɣɔ̈ric.

²⁰ Keek kedhie abïk lɔ ee të töŋë, aake bɔ̈ në abuui yic, ku abïk bɛ lɔ ë abuui yic kedhie.

²¹ Eeŋa ŋic en nɔn ye wëi ke raan lɔ nhial, ku ye wëi ke läi lɔ ë piny thar?

²² Aya tïŋ nɔn cïn en këpiɛth duëër ë raan looi, ee luɔɔi bïï yen piɔ̈u miɛt ë luɔɔide yic, në baŋ ee yen biäkde ë pïïric. Ku eeŋa bï ye bɛ̈ɛ̈i, raan bï ye bɛ̈n tɔ tïŋ kë bï rɔt lɔ̈ɔ̈k looi ë yecök të cï en thou?