Wɛ̈ɛ̈t 2 - JAM DE NHIALIC 2011

¹ Guɔ rɔt jɔ yɔ̈ɔ̈k an, apiɛth tei, yɛn bï miɛtëpiɔ̈u jɔ them ënɔɔnë. Ku tïŋ, kënë ayadäŋ acä yök ke ee ɣɔ̈ric.

² Guɔ lueel an, dɔl ee miɔ̈ɔ̈l, ku nɔmde akou yen miɛtëpiɔ̈u?

³ Në baŋ kɔɔr ë piɔ̈ndï pɛlënɔm, ku kaar bä pialëpiɔ̈u tiaam, guɔ lueel an, bä yapiɔ̈u tɔ mit në mɔ̈u, ku ja piɔ̈u lɔ yum. Ku aya tak nɔn duëër en aa kueer piɛth, kueer bï raan pïïrdɛn thiinë thöl ë piny nɔm.

⁴ Yɛn cï luɔɔi dït looi, yɛn cï rɔt yiëk ɣööt, ku cuöm rɔt duum.

⁵ Yɛn cï rɔt luöi duum, ku cuöm ke yiic tiim de mïth kithiic.

⁶ Yɛn cï rɔt luöi awuul ye ke tiim ke roordiën cä com piɔɔk.

⁷ Yɛn cï röör ku diäär lïïm ɣɔɔc, ku dɛ nɔm lïïm ë dhiëth baaidï. Ku yɛn de nɔm luny de thök ku ɣɔ̈k ayadäŋ, awär kɔc ë cï kɔn tɔ̈u ë yanɔm tueŋ ë Jeruthalem.

⁸ Ku ayadäŋ, yɛn cï rɔt kuöt adhɛ̈p kekë ateek, ku kajuëc ke meliik ke wuötdït cä peec. Yɛn de nɔm kɔc ee ket röör ku diäär, ku diëër mäthkiën juëc, kake miɛtëpiɔ̈u de moc.

⁹ Guɔ jɔ aa raandït. Ku wäär kɔc kedhie, kɔc ë kɔn nu ë yanɔm tueŋ ë Jeruthalem. Ku rɛ̈ɛ̈r pɛlënɔmdï ke yɛn ayadäŋ.

¹⁰ Kë ye piɔ̈ndï kɔɔr ëbɛ̈n aya nööm, yɛn kën rɔt pɛ̈n miɛtëpiɔ̈u. Yɛn cï piɔ̈u miɛt në luɔɔi dït cä looi, ku kënë aaye ariöp de luɔɔidï ëbɛ̈n.

¹¹ Ku të yan ka cä looi në yacin woi, ku luɔɔidïït cä kiëët, këriëëc ëbɛ̈n të tiëŋ ɛn en, ee ɣɔ̈ric, acït cum de yom cök. Acïn kë cä yök ë piny nɔm.

¹² Guɔ rɔt jɔ puk, ku tak yanɔm bä pɛlënɔm kekë miɔ̈ɔ̈l ku pialëpiɔ̈u tïŋ. Eeŋö duëërë raan bɔ̈ ë melik cök jɔ looi, kë kën ë kɔn looi?

¹³ Ku acä yök an, “Pɛlënɔm apiɛth në pialëpiɔ̈u, cït man piɛth ë ɣɛɛr në mɔ̈ɔ̈th.

¹⁴ Raan pelnɔm ee daai, ku raan piɔlpiɔ̈u ee cath ë mɔ̈ɔ̈thic.” Ku acä bɛ̈n yök aya, nɔn ye kek thou kedhie.

¹⁵ Guɔ rɔt yɔ̈ɔ̈k an, “Kë bï raan piɔlpiɔ̈u yök abï ya yök ayadäŋ, ka eeŋö jɔ yɛn nɔmpɛl aya?” Guɔ rɔt jɔ yɔ̈ɔ̈k an, “Kënë aya ee ɣɔ̈ric.”

¹⁶ Në biäk ë raan pelnɔm ku raan piɔlpiɔ̈u, acïï keek ee tak kedhie, kɔc abïk nïïm määr të cïï ë kaam tëëk. Amawoou! Eeŋö ye raan pelnɔm thou cït raan piɔlpiɔ̈u.

¹⁷ Ka yɛn man pïïr, në biäk de luɔɔi ee looi ë piny nɔm acï ya jieeth piɔ̈u. Yen ëbɛ̈n ee ɣɔ̈ric, ee cum de yom cök.

¹⁸ Ku yɛn cï luɔɔidït cä looi ëbɛ̈n ë piny nɔm maan, në biäk bän ke dhil nyäŋ raan bï lɔ̈ɔ̈k bɛ̈n ë yacök.

¹⁹ Ku eeŋa ŋic en nɔn bï aa raan pelnɔm ku nɔn ee raan piɔlpiɔ̈u? Ku abï ya bɛ̈ny de kake luɔɔidït cä looi ë piny nɔm në pɛlënɔmdï, kënë aya ee ɣɔ̈ric.

²⁰ Guɔ nɔm jɔ mum në biäk de kakiën ke luɔɔidït cä looi ëbɛ̈n ë piny nɔm.

²¹ Në biäk ye raan luɔɔidïtde looi në pɛlënɔm, ku ŋïnydekäŋ kekë tëët, ku abï kake kedhie dhil nyäŋ raan kën ke looi. Kënë aya ee ɣɔ̈ric ku ee gök de kërac.

²² Eeŋö ee raan yök në luɔɔidïtde yic ëbɛ̈n ku ka ye kɔɔr në yepiɔ̈u ë piny nɔm?

²³ Aköölke yiic kedhie ayek arɛɛm, kekë jiɛthëpiɔ̈u. Ayï wakɔ̈u aya acïï piɔ̈u ee lɔ̈ŋ. Kënë aya ee ɣɔ̈ric.

²⁴ Acïn këpiɛth duëër raan looi, të cïn cäm kekë dëk, ku yök miɛtëpiɔ̈u në luɔɔidïtde yic, kënë ayadäŋ, acä tïŋ aa bɔ̈ tëde Nhialic.

²⁵ Të cïn Nhialic, eeŋa duëër cam, ku eeŋa duëër miɛtëpiɔ̈u yök?

²⁶ Raan ee Nhialic tɔ mitpiɔ̈u aye gäm pɛlënɔm, ku ŋïnydekäŋ ku miɛtëpiɔ̈u, ku raan ee karɛc looi aye Nhialic gäm luɔɔi de mɛ̈ɛ̈t ë käŋiic ku kun de käŋ nïïm, bï ke lɔ gäm raan mit ë Nhialic piɔ̈u ke yen. Kënë ayadäŋ ee ɣɔ̈ric, acït cum de yom cök.