Wɛ̈ɛ̈t 12 - JAM DE NHIALIC 2011

¹ Yak Aciëŋdun tak në akööl ke dhuöökdunic, të ŋoot akööl rac ke ke kën bɛ̈n. Akööl bä wek e lueel an, “Yɛn cïï piɔ̈u mit wo pïïr.”

² Ee akööl bï ɣɛɛr de akɔ̈l, ku pɛɛi ku kuɛl lɔ durdur, ku jɔ luäät rëër cït luän ë deŋ ariël cie jäl.

³ Kööl jɔ yï atit ɣöt (cɔl cin) lath, ku cï röör ril (cɔl cök) röt goŋ, ku kääc kur ke guär (cɔl lec) në luɔi cïï adɛɛu lɔ lik, ku cï wɛ̈ɛ̈t daai ë awëërnyïïn (cɔl nyïïn) lɔ mudhur,

⁴ ku thiök (yï thoŋ nhial ke thoŋ piny) athïïn ke kuɛɛr, ku cïï kur ke guär (cɔl lec) yiic ee bɛ tïc ëgɔk, ku jɔ raan aa pääc të ŋoot ë piny në kiɛɛu de amɔ̈ɔ̈r, ku cï duet ke diɛt röt lɔ piny (luɔi cï miiŋ bɛ̈n).

⁵ Ee jɔ riɔ̈ɔ̈c në lɔ në ɣään thöny, ku ye riɔ̈ɔ̈c në cäth ë kuɛɛriic, ku ee nɔm biöör ke luɔu cït tim alemon cï gaak moc, ku cït gɔn cath ke thuet rɔt, ku mɛ̈l në ka yepiɔ̈u ke kɔɔr ëbɛ̈n, raan alɔ ɣön bïï lɔ cieŋ athɛɛr. Ku ëtɛ̈ɛ̈n kɔc ë dhiau abïk piny wil ke ke dhiau ë kuɛɛriic.

⁶ Wën jɔ kuat ateek kɔ̈u cuän, ku jɔ aduŋ de adhääp yeyic mat, ku cï gul ë pïïu kuɛɛm ë awaŋ nɔm, ku lööny atök yiith.

⁷ Ku abuui ee rɔt dak në abuui yic tën ë bïï yen thïn, ku wëi abïk röt dak tëde Nhialic Raan ë gëm ke wook.

⁸ Ke lueel raan kɔɔr pɛlënɔm an, këriëëc ëbɛ̈n ee ɣɔ̈ric, ee gökdïït ë ɣɔ̈ric.

Kë Lueel Ëbɛ̈n

⁹ Ku däŋ piɛɛth ë raan kɔɔr pɛlënɔm, në pɛlënɔmde ee kɔc wɛ̈ɛ̈t në ŋïnydekäŋ, ku mɛ̈ɛ̈t kɛ̈ŋ juëc yiic ku them keek ku kɔɔr ke yiic ku jɔ ke guiir në gök de tëët.

¹⁰ Ku them bï wël ke miɛtëpiɔ̈u kɔɔr, ku në piɔ̈n ɣɛɛrde gɛ̈ɛ̈r wël yith piny.

¹¹ Jiɛɛm ke kɔc pelnïïm acïtkï thieec ye ɣɔ̈k dɔk, ku kɛ̈ŋ cï määtiic ayek tɔ̈u cït löny cï piäät piny aril, aake gɛmë në Tïn töŋ cɔl Nhialic.

¹² Mɛnhdï, ye rɔt tiit në kë bä ŋuak në kekɔ̈ɔ̈th, gäär ë awereek juëc acie thök, ku kuɛ̈ndïït agök ee raan tɔ bäp.

¹³ Kë ciëën bä lɛ̈k yïn në ee kakë cök kedhie yekï: Ye riɔ̈ɔ̈c në Nhialic, ku döt lööŋke, në baŋ ye kënë luɔɔi de raan ëbɛ̈n.

¹⁴ Në biäk ye Nhialic löŋ de ka yek looi ëbɛ̈n guiir, ayï ka cï moony, nɔn yek ke kapiɛth ku nɔn ee karɛc.