Wɛ̈ɛ̈t 11 - JAM DE NHIALIC 2011

Kë ye Raan Pelnɔm Looi

¹ Ye yïciin pɔ̈l, këduön cï dɛɛny tueŋ aye lɔ yök kɔ̈u në kööl liu.

² Ye këdu rɔm wekë kɔc kadhorou ayï kɔc kabɛ̈t në baŋ kuc yïn piäl ë guöp duëër rɔt looi ë piny nɔm.

³ Na cï luäät thiäŋ ë pïïu, aye wäl ë piny nɔm, ku na cï tim wïïk të lɔ wöuwic, ku nɔn ee të lɔ rut, të cï yen wïïk thïn, yen aye yen tɔ̈u thïn.

⁴ Raan ë yom woi acie com, ku raan ee diɛɛr arëët ë luäät acï bï tem.

⁵ Cït man kuc ë raan kueer ye wëi bɛ̈n ë yomiic në amadhiënh ë tiiŋ liacic, yen akuc ë raan luɔi de Nhialic ë cak këriëëc ëbɛ̈n.

⁶ Ye com miäk rial ku thëën ayadäŋ. Në baŋ kuc yïn nɔn ee cum tök yen bï piath awär däŋë, ku nɔn bï kek luɔk kedhie.

⁷ Apiɛth bï raan piɔ̈u miɛt të ŋoot en ke ye akɔ̈l tïŋ nyin,

⁸ cakaa yen ë pïïr ë run juëc ke mit piɔ̈u, ke bï dhil ŋic ayadäŋ nɔn bïï runkɛn cïï yen ke akɔ̈l bï tïŋ nyin juëc. Ka cï bɛ̈në kedhie ayek ɣɔ̈ric.

Yöök de Dhuök

⁹ Wek dhuök, miɛtkï piɔ̈ɔ̈th në dhuöökdunic. Yak piɔ̈ɔ̈th miɛt të ŋuɔɔt wek ke we ye dhuök. Luɔikï ka kaarkï bäk ke looi, ku kuanykï kake piɔ̈ɔ̈thkun cök. Ku ŋiɛckï nɔn bï Nhialic löŋdun guiir në këriëëc yak looi yic ëbɛ̈n.

¹⁰ Nyaaikï jiɛthëpiɔ̈u në täŋdun yic, yak röt theek në ka bï arɛɛm bɛ̈ɛ̈i në wegup. Wek cïï bï rëër ke we ye dhuök anandun, dhuöök ee ɣɔ̈ric.