Wɛ̈ɛ̈t 10 - JAM DE NHIALIC 2011

¹ Pialëpiɔ̈u thiinakäŋ aduëër pɛlënɔm kekë dhuëëŋ tiaam, cït man ye luaŋ cï thou acidhanh de miök tum tɔ ŋuäc.

² Piɔ̈n de raan pelnɔm ee yenɔm wɛl cuëëc, ku piɔ̈n de raan piɔlpiɔ̈u ee yenɔm wɛl ciɛɛm.

³ Na cak raan piɔlpiɔ̈u cath kueer, acïï käŋ ee yökic, ku aye raan ëbɛ̈n guɔ ŋic nɔn piɔl en piɔ̈u.

⁴ Të cï bɛ̈nydu piɔ̈u diu ke yïn, du luɔɔidu päl ë yenɔm, awänydït aduëër ë puɔ̈l të pɛ̈l yïn rɔt piny.

⁵ Yɛn cï kërac tïŋ ë piny nɔm, awäny ye bɛ̈ny looi.

⁶ Kɔc piɔlpiɔ̈ɔ̈th aye keek tääu nhial, ku kɔc kueth aye keek tääu në kɔc cök piny.

⁷ Yɛn cï lïïm tïŋ ke ke cath ë jöŋgöör kɔ̈ɔ̈th, ku cath adhuëëŋ piny në kecök cït man ë lïïm.

⁸ Të cï raan pul wec, ee yen ee lööny thïn, të cï raan tëëk ë päny kɔ̈u, aye kërac kac.

⁹ Na ye raan guaŋ në kur, ka ye kur yiëk guöp tëtöök. Na ye raan tiim ɣääriic, ka ye rɔt tääu në riɛkic.

¹⁰ Raan cïï yiëp ee theer thok ku tɔ juc, ee dak në ɣɛ̈ɛ̈r ë tiimiic, ku pɛlënɔm ee tiëm bɛ̈ɛ̈i.

¹¹ Na cï kërac raan kac ke kënë kɔn gël, ke gëlde acïn naamde.

¹² Wël ye raan pelnɔm lueel, ayek en tɔ nhiaar guöp, ku raan piɔlpiɔ̈u aye liemde riɔ̈ɔ̈k.

¹³ Aye gɔl në jam dhɔ̈ɔ̈n, ku thïk kecök në wël rac ke miɔ̈ɔ̈l.

¹⁴ Raan piɔlpiɔ̈u ee jam cuuth. Acïn raan ŋic kë bï tuöl, ku acïn raan bï wok lɛ̈k kë bï rɔt lɔ̈ɔ̈k looi në wocök.

¹⁵ Luɔidït de raan piɔlpiɔ̈u ee yen nɔ̈k guöp, arëk abï kueer bï yen lɔ wut kuc.

¹⁶ Amawoou në yïn, yïn wun ee bɛ̈nyde meth, ku ye adhuëëŋ ke wunde miäk adurduur nööm ke ye thaardɛn ë cämdït.

¹⁷ Thieithieei në yïn, yïn wun ee bɛ̈nyde wën ë bɛ̈ny ku ye adhuëëŋ ke wunde këcamdït luöi röt në thaar rɔ̈ŋ, në biäk de riɛl ë guöp ke cie wiɛ̈ɛ̈t ë mɔ̈u.

¹⁸ Ku yen aye ɣööt ke adaakrɔt kuëër, abï awïïk ke ɣööt lööny ë pɛ̈ɛ̈nyiic.

¹⁹ Thar ë dɔl ee kuɛth, ku ye miɛtëpiɔ̈u këde mɔ̈u, ku jɔ wëu këriëëc aa looi ëbɛ̈n.

²⁰ Ayï täŋdu yic, du bɛ̈ny kɔn läät ku nɔn yen raan kueth, cakaa yïn ë tɔ̈u ë biökku nïïm, yïc acïn athïn aduëër ë yom yiɛ̈n keek.