Wɛ̈ɛ̈t 1 - JAM DE NHIALIC 2011

Pïïr ee Ɣɔ̈ric

¹ Jiɛɛm ke raan kɔɔr pɛlënɔm, wën ë Debid, meliŋ ë Jeruthalem.

² Na wën ke lueel raan kɔɔr pɛlënɔm an, “Ee ɣɔ̈ric, këriëëc ëbɛ̈n ee ɣɔ̈ric, ee gökdïït ë ɣɔ̈ric.

³ Eeŋö ye raan yök, në luɔɔidɛn ril ye looi ëbɛ̈n ë piny nɔm?

⁴ Remë ee bɛ̈n ku jël remë, ku piny ee rɛ̈ɛ̈r cït mande.

⁵ Akɔ̈l ee thok bɛ̈n, ku le piny, ku dap rɔt dak tën ë bïï yen thok thïn.

⁶ Yom ee puɔ̈t ke lɔ wöuwic, ku puk rɔt të lɔ rut, ku ye yenɔm wiëël, ku bïï lɔ tën ë bïï yen thïn.

⁷ Kiɛɛr kedhie ayek wɛt ë wɛ̈ɛ̈r yic, ku wɛ̈ɛ̈r acie thiäŋ, të wën yen ë bïï kiɛɛr thïn, yen aye kek bɛ lɔ.

⁸ Käŋ kedhie ayek kɔc tɔ bäp, acïï raan ke duëër lëu në luɛɛl. Nyin acie kuɛth ë daai, ayï yïth acie thiäŋ në pïŋ.

⁹ Kë cï tuöl abï bɛ tuöl, kë cï kɔn looi abï bɛ looi. Acïn kë cï piac looi ë piny nɔm.

¹⁰ De kë duëër ë raan lueel an, “Tiëŋkï! Kënë ee piacë looi? Aa tɔ̈u ee tënë ɣɔn thɛɛr. Aa tɔ̈u ee tënë ke wo kën kɔn bɛ̈n.

¹¹ Ka thɛɛr acïï keek ee tak. Ayïï ka bï bɛ bɛ̈n acïï keek bïï tak në kɔc bï bɛ̈n në kecök.

Kë cïï Raan Kɔɔr Pɛlënɔm Yök

¹² Yɛn raan kɔɔr pɛlënɔm, yɛn aaye melik de Yithriɛl ë Jeruthalem.

¹³ Yɛn cï rɔt gäm kuɛ̈n ku kɔ̈ɔ̈r ë käŋiic ë pɛlënɔm, ka ye looi ë piny nɔm kedhie. Ee luɔɔi ril yen cïï Nhialic gäm kɔc.

¹⁴ Yɛn cï luɔɔi ee looi ë piny nɔm ëbɛ̈n tïŋ, keek kedhie ayek ɣɔ̈ric, cït cum de yom cök.

¹⁵ Kë cï ŋɔl acïï duëër tɔ lɔ rïc. Ku kë liu acïï duëërë kueen.

¹⁶ Guɔ rɔt yɔ̈ɔ̈k an, “Tïŋ, yɛn cï aa raandït ku cä pɛlënɔm dït yök, awär kɔc cï kɔn kuum ë yanɔm tueŋ kedhie ë Jeruthalem. Yɛn cï gök de pɛlënɔm kekë ŋïnydekäŋ yök.”

¹⁷ Ku ja yanɔm kiɛm piny bä ŋïnydekäŋ kekë pɛlënɔm ŋic, ku ŋiɛc miɔ̈ɔ̈l kekë pialëpiɔ̈u. Guɔ ee kënë yök ayadäŋ nɔn cït en cum de yom cök.

¹⁸ Në biäk ye pɛlënɔm dït bɛ̈n kekë jiɛthëpiɔ̈u dït, ku raan ee ŋïnydekäŋ ŋuak ee dhiënëpiɔ̈u ŋuak.