Tito 3 - JAM DE NHIALIC 2011

Rëër de Kërthiaan

¹ Ye ke täk nïïm ke ke bï aa rëër ë bäny cök, ku rëërkï ë kɔc nu ë kenïïm cök, ku yek löŋ piŋ, ku yek luɔi piɛth ëbɛ̈n dap gam.

² Ku ë cïn raan yek lat, ë cïn akɔ̈ŋ yek kɔɔr, ë ke ye jam ëmääth, ku bïk kuur ee kek röt kuɔɔr piny cï dikëdik nyuöth raan ëbɛ̈n.

³ Ku wook ayadäŋ wok aaye kɔc cïn nïïm wään thɛɛr, kɔc ee löŋ rɛɛc piŋ, kɔc cï math, wok ee ye lïïm ke ŋɔ̈ɔ̈ŋ ee wo dɔm ŋɔ̈ɔ̈ŋ kithic, ku yok lïïm ke kamit yok kɔɔr ë wopiɔ̈ɔ̈th, wok aaye tɔ̈u ke wo racpiɔ̈ɔ̈th deku yiic tiɛɛl, ku man kɔc wook, ku manku röt.

⁴ Na wën, aacï piath ë piɔ̈n ë Nhialic Konyda tïc, piath piɛth en piɔ̈u kekë kɔc, ku tiëc nhiëër nhiɛɛr en kɔc,

⁵ ke jɔ wo kony wëi, ku acie në luɔi de këpiɛth cuk looi wogup, ee kok de yenpiɔ̈u en aa kony en wook, në wɛ̈k de dhiënh cï wo bɛ dhiëëth, ku në cäŋ cï Wëidït ɣer wo bɛ cak.

⁶ Kek Wëi cï luööŋ ë wogup abuk kuɛth ë keek në Yecu Kërtho Konyda,

⁷ luɔi bï wo tɔ piɛthpiɔ̈ɔ̈th në dhuëëŋ de yenpiɔ̈u, ago wo tɔ ye kɔc bï käŋ lɔ̈ɔ̈k lak në aŋäth ŋɛ̈ɛ̈th wok pïïr athɛɛr.

⁸ Ee jam yic ee kënë. Ku yɛn de piɔ̈u luɔi bï yïn kakë aa ŋak nïïm arëët, ke kɔc cï Nhialic gam ke ke bï röt tiit apiɛth, agokï aa cool ë loi luɔi piɛth. Kakë apiɛthkï ku adekï naamden tëde kɔc.

⁹ Ku kääcë ya në lop ee kɔc luɔp ë ɣɔ̈ric, ku jam në këde kuarken ë kɔc, ku ateer, ku teer ee kɔc teer në këde löŋ, kakë acïn këpiɛth ee yök thïn, ee ka ɣäär yiic.

¹⁰ Raan ee wëët yalic, të cï yïn e jɔ̈ɔ̈ny raantök ayï raanrou, ke jɔ rɛɛc.

¹¹ Luɔi ŋic yïn en an, raan cït ee kënë acï enɔm cɔ̈k wei, ee këdäŋ wööc, ku acïï rɔt jɔ̈ɔ̈ny etök.

Wëët Ciëën

¹² Të tuɔɔc ɛn Artema tëde yïn, ayï Tukiko, ke yï cök ë them yïn bɛ̈n bï yïn bɛ̈n të nuö yɛn Nikopoli: në luɔi cän e dhel ë yapiɔ̈u nɔn bän rut thöl ëtɛ̈ɛ̈n.

¹³ Cök ë ruɛc yïn Dhena raan ŋic löŋ kek Apolo ë kueerden, ke cïn kë bï dak tëde keek.

¹⁴ Ayï kɔckuɔ aya tɔ ke wëëtë apiɛth ke ke bï aa cool ë loi luɔi piɛth, agokï kë pïïr kek aa yök, ku cïkï ee tɔ̈u ke ke cïï lok.

¹⁵ Yïn thiëëc kɔc rɛ̈ɛ̈r në yɛn ëtök kedhie. Thiëc kɔc nhiaar wook në gäm. Ë dhuëëŋdepiɔ̈u ë ye tɔ̈u ke week wedhie Amiin