Tito 2 - JAM DE NHIALIC 2011

Wëët Piɛth

¹ Ku yïn, ye käŋ lueel ka röŋ në wëët piɛth.

² An, ë röördït ë ke ye röt tiit apiɛth, ku yek kɔc piɛth nïïm, kɔc ee nïïm tiëër, kɔc ee tɔ̈u apiɛth ë gäm, ku nhiëër, ku ruötëpiɔ̈u.

³ Yen abï yïn diëër dït yɔ̈ɔ̈k aya an, bïk aa tɔ̈u ë täu de kɔc ɣerpiɔ̈ɔ̈th, ke ke cïï bï aa mantuum, ku cïkï bï aa lïïm ke mɔ̈n dït, abïk aa kɔc ee wëët ë këpiɛth,

⁴ ku bïk diëër kor aa wɛ̈ɛ̈t ke ke bï röörken nhiaar, ku nhiaarkï mïthken,

⁵ ke ke bï aa diëër ee nïïm tiëër, diëër ɣerpiɔ̈ɔ̈th ëtop, diëër ee tɔ̈u ë dhiënken, diëër piɛth, ee jam de röörken gup piŋ, ke jam ë Nhialic ke cïï bï aa läät.

⁶ Ku yöökë dhuök ayadäŋ an, yek nïïm tiëër.

⁷ Ku yïn bï rɔt tɔ ye raan bï kɔc këde dɔmic, në luɔi piɛth ëbɛ̈n: tɔ wëëtdu tɔ̈u ke cïnic kënhiany, ke ye wëët thiek, cïnic ruëëny.

⁸ Ye jam ë jam piɛth, jam cïï duëërë jɔ̈ɔ̈ny, ke raan de ater ke yïn ke bï yäär, ke cïn jam rɛɛc duëërë lueel ë këda.

⁹ Ku yöök lïïm an, bïk rëër ë bänyken cök, bänyken gup, agokï ke tɔ mit piɔ̈ɔ̈th ë këriëëcic ëbɛ̈n, ku cïkï löŋ ë bɛ̈ɛ̈r,

¹⁰ ku cïkï käŋ ë nööm ëcuëër, ku bïk käŋ aa döt apiɛth, agokï wëët de Nhialic Konyda aa kiir e këriëëcic ëbɛ̈n.

¹¹ Dhuëëŋ de Nhialic piɔ̈u ë jɔ tïc dhuëëŋ bïï kunydewëi yiɛ̈n raan ëbɛ̈n.

¹² Ee wo wɛ̈ɛ̈t an, buk kuny kuc Nhialic riëëu jäi, ku jiëikï ŋɔ̈ɔ̈ŋ de ka ke piny nɔm, agoku rëër ke wo ye nïïm tiëër, ku piɛthku piɔ̈ɔ̈th, ku yok Nhialic riëëu ee pinyë nɔm ënɔɔnë,

¹³ ku yok aŋäth cï thieei tiit, ku titku tuöl bï dhuëëŋ de Nhialicdandït ku Konydan Yecu Kërtho tuöl,

¹⁴ raan cï rɔt gäm thuɔɔu në biäkda, luɔi bï en wo wɛ̈ɛ̈r bei ë luɔi racic ëbɛ̈n, ago jur mɛɛn tɔ ɣerpiɔ̈u ëtop abï aa këde, jur lëthic ë luɔi piɛth.

¹⁵ Ye kake lueel, riit yïn ke kɔc piɔ̈ɔ̈th, ku jäny keek në riɛl ëbɛ̈n. Ë cïn raan bï yï biɔɔn.